1 Va Korindo 4:1-21

  • Vakalei va sesamẽla oku kala vakuacili (1-5)

  • Oku liketisa Kuakristão (6-13)

    • “Pokoli kovina via sonehiwa” (6)

    • Akristão va linga ndocitalukilo (9)

  • Paulu o lekisa esakalalo komãla vaye kespiritu (14-21)

4  Ca sesamẽla okuti omanu va tu tenda ndoloñuatisi* via Kristu haetu tu vakalei kalumbu a kola a Suku.  Kuenje ca sesamẽla vakalei oku lilekisa okuti vakuacili.  Nda nda sombisiwa lene, ale lombonge,* ka ci kuete esilivilo lialua. Ndaño ame, si lisombisa ame muẽle.  Momo sia kũlĩhĩle eci ci ndi pisa. Haimo lumue, eci ka ci lomboloka okuti ndi tendiwa ndukuesunga; pole, Yehova eye o ndi sombisa.  Ko ka sombisi osimbu otembo yaco ka yeyile, okuti toke eci Ñala eya. Eye o nena kutanya ovina via wunda vowelema, haeye o situlula ovipango viovutima kuenje omunu lomunu o tambula epandiyo li tunda ku Suku.  A vamanji, nda tiamisila ovina evi kokuange kuenda ku Apolosi oco cu kuatisi okuti vu lilongisila kongangu yetu onumbi eyi: “Pokoli kovina via sonehiwa,” okuti ka vu lipandi lepela, sanga wameli ku umue loku pembula ukuavo.  Nye cu ku velisapo okuti ukuẽle o sule? O kuete nye okuti kua ci tambuile? Nda wa ci tambula o lipandela nye ndu okuti kua ci tambuile?  Anga wekuti ale? Wa lingi ale olohuasi? Wa fetiki ale oku viala osimbu ka tua kailepo? Ndi livela nda wa fetikili ale oku viala ndolosoma, okuti letuvo tu viala kumue lene.  Momo ci kasi ndu okuti etu tuvapostolo, Suku wa tu kapa kesulilo ndava va pisiwila oku fa, omo tua linga ndocitalukilo koluali, ci kale kovangelo, ci kale komanu. 10  Etu tuaveke omo lia Kristu, ene puãi vu kuete olondunge vu Kristu; etu tua hongua, pole, ene wa pami; ene wa sumbiwi, etu puãi tu sepuiwa. 11  Toke cilo tu kasi lonjala, lenyona, tu kasi epẽle,* tu tipuiwa kuenda tu kasi ndomanu ka va kuete olonjo, 12  kuenda tu lingainga upange lovaka etu muẽle. Eci omanu va tu sepula, tu va sumũlũisa; eci tu lambalaliwa, tu pandikisa; 13  eci va tu lundila, tu tambulula lumbombe;* toke cilo tua linga ndeliño lioluali kuenda onasi yovina viosi. 14  Si kasi oku soneha ovina evi oco ndu kutisi osõi, pole, ndi ci lingila oku u lunguli ndomãla vange va soliwa. 15  Ndaño vu kuete 10.000 kalongisi vu Kristu, haimo lumue ka vu kuete va isia valua; momo vu Kristu Yesu nda linga isiene omo liolondaka viwa. 16  Ndu pingi okuti vu linga olosetukuli viange. 17  Eli olio esunga lieci ndu tumisili Timoteo, momo omõlange wa soliwa vu Ñala, haeye nda kolela. Eye o wivaluisi olonumbi* nda kuama kupange wa Kristu Yesu, lovina nda longaisa kovitumãlo viosi kuenda kakongelo osi. 18  Vamue va kasi oku lipanda lepela loku sima okuti siya vali kokuene. 19  Puãi, nda Yehova wa panga ndopo ndiya kokuene, pole, si ka kũlĩhĩsa olondaka viava va lipanda lepela, te unene wavo. 20  Momo Usoma wa Suku ka u tiamisiwila kolondaka, te kunene. 21  Vu yongola nye? Ndiya kokuene loluhava, locisola, ale lutima wonjuka?

Footnotes

Ale, “akuenje.”
Ale, “ekanga.”
Lit., “oku kala ño ndoto.”
Lit., “tu livondelela.”
Lit., “olonjila viange.”