1 Va Korindo 3:1-23

  • Va Korindo handi vakuetimba (1-4)

  • Suku eye o ci kulisa (5-9)

    • Olondingupange via Suku (9)

  • Oku tunga lovina vi puluka kondalu (10-15)

  • Ene vunembele ya Suku (16, 17)

  • Olondunge violuali uveke ku Suku (18-23)

3  A vamanji, sia tẽlele oku vangula lene ndomanu vakuespiritu, pole, nda vakuetimba, okuti ndomãla vu Kristu.  Ndo tekoli lasenjele, halokuliako kua kõla, omo okuti handi ka wa pameli. Ndaño cilo, lopo ka wa pameli,  momo handi wakuetimba. Osimbu pokati kene pali ukuse lovama ha wakuetimbako hẽ kuenda ka wendaendi ndeci omanu va endaenda?  Eci umue a popia hati, “Ame nda tiamẽla ku Paulu,” ukuavo hati, “Nda tiamẽla ku Apolosi,” ka wa tuwili hẽ ndomanu vaño?  Apolosi eye elie? Paulu elie? Ovo olondingupange ndeci Ñala a va kundika omunu lomunu oku u tavisi.  Ame nda kũla, Apolosi wa tapela, pole, Suku wa kulisa,  ci kale u wa kũla, ci kale u wa tapela vosi yavo hacimueko, te Suku o kulisa.  Una o kũla la una o tapela va lisoka,* pole, omunu lomunu o tambula onima yaye ndeci ca sesamẽla upange waye.  Momo tulondingupange kumue la Suku. Ene wupia lia Suku, haene wunjo yi kasi oku tungiwa la Suku. 10  Omo nda kundikiwa ohenda ya piãla ya Suku, nda seveta ociseveto ndutungi* wa loñoloha, puãi umue wiñi wa tungilako. Pole, omunu lomunu a lavulule ndomo a tungilako. 11  Momo lomue o tẽla oku seveta ociseveto ciñi, te lika ca sevetiwa ale, cokuti Yesu Kristu. 12  Nda umue o tungila kociseveto caco ulu, opalata, ovawe a tĩla, pamue oviti, owangu, ale ovisiakiti, 13  upange womunu lomunu u limbukiwa,* momo eteke liaco liu limbukisa, omo u situluiwa londalu kuenje ondalu yi seteka upange womunu lomunu ndeci a kasi oku tunga. 14  Nda upange womunu umue wa tungilako u tumala, omunu waco o tambula onima; 15  nda upange womunu u pia, omunu waco o pesela, pole, eye muẽle o popeliwa ndomunu wa puluka kondalu. 16  Ka wa kũlĩhĩli okuti ene vunembele ya Suku kuenda okuti espiritu lia Suku li kasi vokati kene? 17  Nda umue o nyõla onembele ya Suku, omunu waco Suku u nyõlavo; momo onembele ya Suku yi kola kuenje ene, ene vunembele yaco. 18  Lomue ka ka likembe eye muẽle: Nda umue pokati kene o sima okuti ukualondunge voluali lulo,* a linge eveke, hã ha lingi ukualondunge. 19  Momo olondunge violuali lulo ku Suku uveke, omo ca sonehiwa citi: “Eye o kuata vakualondunge koku lunguka kuavo.” 20  Kuenda vali hati: “Yehova wa kũlĩha okuti ovisimĩlo via vakualondunge viesanda.” 21  Omo liaco, lomue ka ka lipandele omanu; momo ovina viosi viene, 22  ci kale Paulu, ci kale Apolosi, ale Kefa,* pamue oluali lulo, ale omuenyo, loku fa, pamue ovina via cilo, levi vi laika oku iya, ovina viosi viene; 23  kuenje ene puãi wa tiamẽli ku Kristu; Kristu puãi wa tiamẽla ku Suku.

Footnotes

Ale, “oku kuata ocimãho cimuamue.”
Ale, “usongui wupange wa loñoloha.”
Lit., “u ka situluiwa.”
Ale, “koloneke vilo.” Tala Elomboluilo.
O tukuiwavo Petulu.