1 Va Korindo 16:1-24

  • Oku konguila olombongo Akristão ko Yerusalãi (1-4)

  • Esokiyo liovongende a Paulu (5-9)

  • Esokiyo lia Timoteo la Apolosi lioku nyula (10-12)

  • Alungulo kuenda ovilamo (13-24)

16  Catiamẽla koku kongola olombongo vioku kuatisa olosandu, kuami olonumbi nda eca kakongelo o ko Galatia.  Keteke liatete kosemana omunu lomunu a seleke cimue ci li soka lepondolo liaye, okuti eci njiya ka ku vetiyiwa vali oku kongola.  Eci ndi pitĩla numa alume wa tukuli vovikanda viene okuti va koleliwa, oco vambate ombanjaile yene yocisola ko Yerusalãi.  Nda ca ngecelela oku endavo, ovo va enda lame.  Pole, eci ngenda ko Makedonia njiya kokuene, momo mita vo Makedonia;  pamue citava okuti ndi kala lene olosãi viombambi, okuti vu ndi sindikila kuosi ngenda.  Si yongola oku pita ño ombamba, momo ndi lavoka oku kala oloneke vimue lene nda Yehova wa panga.  Pole, ndi kala ko Efeso toke Kocipito co Pendekoste,  momo kua njulukila epuluvi linene* lioku linga upange walua, pole kuli ovanyali valua. 10  Eci Timoteo a pitĩla a lianje, okuti ka kuata ohele osimbu a kala pokati kene, momo o kasi oku linga upange wa Yehova ndeci ame. 11  Lomue ka ko tombe. U sindikili vonjila yaye lombembua, okuti iya kokuange, momo ndu lavoka kumue la vamanji vakuavo. 12  Catiamẽla ku manjetu Apolosi, ndo livondela calua oco a ende kokuene la vamanji vakuavo. Puãi ka ca kaile ocipango caye oku enda cilo, pole, eye o ka enda eci a kuata epuluvi. 13  Lavululi, pami vekolelo, kuati utõi kuenda talami ngõ. 14  Ovina viosi vu linga, vi lingi locisola. 15  Cilo a vamanji ndu handeleki: Wa kũlĩhi okuti vakuanjo ya Stefana ovo apako atete ko Akaya kuenda ovo va lieca olumue koku kuatisa olosandu. 16  Vu sukila oku pokola komanu va soka ndava kuenda oku pokola ku vosi va kuatisa haivo va talavaya calua. 17  Pole, nda sanjukila oku iya kua Stefana, kua Fortunato kuenda Akaiko, momo va ñuatisa osimbu ka wa kali kulo. 18  Momo ovo va kavuluisa utima wange lowu wene. Omo liaco, sumbili omanu va soka ndava. 19  Akongelo o ko Asia vo tumisi ovilamo. Akuila la Priska kumue lekongelo li kasi konjo yavo vo lamisipo locisola vu Ñala. 20  Vamanji vosi vo lamipo. Lilami pokati lasipulo ocisola. 21  Ame ndi Paulu, ocilamo cange ndi ci soneha leka liange muẽle. 22  Nda umue ka sole Ñala, a siñaliwe. A Ñala yetu, enju! 23  Ohenda ya piãla ya Ñala Yesu yi kale lene. 24  Ocisola cange ci kale lene vosi vu kasi vu Kristu Yesu.

Footnotes

Lit., “epito linene.”