1 Va Korindo 14:1-40

  • Olongavelo vioku imba owanji loku vangula alimi a litepa (1-25)

  • Olohongele Viakristão via sokiyiwa ciwa (26-40)

    • Ocikele cakãi vekongelo (34, 35)

14  Lekisi ocisola kuenda likolisili* oku kuata olongavelo viespiritu, ca piãla enene koku imba owanji.  Momo u o vangula alimi a litepa, ka popi lomanu, te la Suku, momo lomue u yeva, pole, o vangula elumbu li kola lespiritu lia Suku.  Kuenje u o popia ovitumasuku a pamise, a vetiye kuenda a lembeleke omanu lolondaka viaye.  U o popia alimi, o likolisa eye muẽle, puãi u o popia ovitumasuku, o pamisa ekongelo.  Nda yonguile okuti ene vosi vu popia alimi a litepa, puãi ca velapo kokuange ceci okuti vu imbi owanji. U o popia ovitumasuku wa velapo una o popia alimi, te nda eye o pitiya* okuti ekongelo li kolisua.  Puãi cilo, a vamanji, nda ndiya kokuene loku popia alimi, cu kuatisi ndati nda siu wĩhi esituluilo, ale ukũlĩhĩso, ocitumasuku cimue, pamue elongiso limue?  Eci ci sokisiwa lovina ka vi kuete omuenyo ndeci, olombendo ale ohalupa, okuti vieca ocileñi. Nda ka vieci alaka ocili, ci limbukiwa ndati nda olumbendo ale ohalupa yi kasi oku sikiwa?  Nda olumbeta ka lu eci ocileñi ci limbukiwa, u o limalehela uyaki elie?  Cimuamue haico, nda ene vu popia velimi ka li lomboloka, omanu va kuata ndati elomboloko lieci ci kasi oku popiwa? Vu vangula ño lofela. 10  Voluali muli alimi aiñi aiñi, ka mu kambi elimi limue okuti ka li lomboloka. 11  Momo nda elimi limue ka li ndomboloka ndi kala ndocingendeleyi ku o popia elimi liaco, lu o popia o linga ndocingendeleyi kokuange. 12  Omo okuti vu kasivo lombili yoku kuata olongavelo viespiritu, likolisiliko oku sanda olongavelo vi pamisa ekongelo. 13  Kuenje u o popia elimi limue liñi a likutilile okuti o tẽla oku li pitiya.* 14  Momo nda ndi likutilila kelimi limue, eyi ongavelo yespiritu ya nyĩhiwa, pole, si kuata elomboloko vutima. 15  Oco hẽ, nye ci lingiwa? Ndi likutilila longavelo yespiritu, pole, ndi likutililavo lutima wange. Njimba ovisungo longavelo yespiritu, pole, njimbavo ovisungo lutima wange. 16  Handi vali, nda weca esivayo longavelo yespiritu, omunu waño pokati kene o popia ndati hati, “Amene” kolopandu viove, nda eye ka kũlĩhĩle eci o kasi oku popia? 17  Ocili, ove o kasi oku eca olopandu lonjila yiwa, pole, omunu ukuavo ka kasi oku pamisiwa. 18  Ndi pandula Suku omo mbangula alimi alua okuti ene vosi vu sule. 19  Pole, hĩse ndi vangule olondaka vitãlo vekongelo lutima wange* oco ndi longisevo vakuetu, okuti oku longisa* lekũi liolohulukãi liolondaka kelimi limue ci sule. 20  A vamanji, kolondunge ko ka lingi ndomãla, kevĩho lingi ndomãla; puãi kolondunge lingi ndakulu vendamba. 21  Vocihandeleko mua sonehiwa okuti: “‘Ndi vangula lomanu ava lelimi liofeka yikuavo kuenda olondaka viofeka yikuavo, pole, lopo ka va njevi,’ oco Yehova a popia.” 22  Puãi alimi ka a lingi ondimbukiso kuava va tava, te kuava ka va tavele, osimbu okuti ovitumasuku ka vi kasi kuava ka va tavele, te kuava va tava. 23  Nda ekongelo liosi lia liongoluila pamosi kuenda vosi va vangula alimi a litepa kuenje mu iñila omanu vaño ale vana ka va tavele, ka va popi hẽ okuti wa lingi ayui? 24  Pole, nda vosi yene vu kasi oku imba owanji kuenje mu iñila omunu waño ale una ka tavele, o sepuiwa kuenda o konomuisiwa la vosi. 25  Elumbu liutima waye li situluiwa okuti, o wila posi loku fendela Suku, poku popia hati: “Suku o kasi pokati kene.” 26  A vamanji nye ci lingiwa? Eci vu liongoluili pamosi umue o tukula osamo, ukuavo o longisa, ukuavo o tukula esituluilo a mola, ukuavo o vangula elimi liofeka yikuavo kuenda ukuavo o pitiya eci ca popiwa. Ovina viosi vi lingiwile oku kolisa. 27  Nda umue o vangula elimi limue, a ci linge lika lomanu vavali ale vatatu kuenje va li kuame kuenda ku kale umue o pitiya.* 28  Nda ka pali umue o pitiya,* eye ka ka vangule vekongelo, a vangule lika liaye kuenda la Suku. 29  Ecelela okuti ovaprofeto vavali ale vatatu va vangula kuenje vakuavo va kũlĩhĩse elomboloko liaco. 30  Nda umue wa tumala pokati kavo wa tambula esituluilo limue, u wa kala oku vangula tete a liweke. 31  Momo vosi yene vu pondola oku imba owanji omunu lomunu lonjanja yaye, okuti vosi va lilongisa kuenda vosi va kolisiwa. 32  Ovaprofeto va sukila oku talavaya ciwa longavelo yaco yespiritu. 33  Momo Suku hayeko Suku yombuanja, puãi yombembua. Ndeci ci kasi vakongelo osi olosandu, 34  akãi vohe ño vekongelo, ka citava okuti va vangula. Va pokole ndeci ca popia Ocihandeleko. 35  Nda va yongola oku lilongisa cimue, va pule alume vavo konjo, momo ci lingisa osõi ukãi oku vangula vekongelo. 36  Ondaka ya Suku hẽ ya tunda kokuene, ale yeya lika kokuene? 37  Nda umue o sima okuti uprofeto, ale wa tambula ongavelo yespiritu, a limbuke okuti ovina ñasi oku wu soneheli ocihandeleko ca Ñala. 38  Pole, nda umue ka kuete elomboloko liaco, amamako oku kala vonumbi.* 39  Omo liaco a vamanji, likolisili oku imba owanji kuenda ko ka lemeli oku vangula alimi a litepa. 40  Puãi ovina viosi vi sokiyiwe ciwa loku lingiwa lesumbilo.*

Footnotes

Ale, “oku sandiliya lombili.”
Ale, “oku pongoluila kalimi.”
Ale, “oku pongolola kalimi.”
Ale, “oku kuata elomboloko.”
Ale, “oku pindisa.”
Ale, “oku pongolola kalimi.”
Ale, “ukuakupongolola kalimi.”
Ale pamue, “nda umue o kasi vonumbi, amamako oku kala vonumbi.”
Ale, “lonjila yimue ya suñama.”