1 Va Korindo 12:1-31

  • Olongavelo viespiritu (1-11)

  • Etimba limosi, ovimatamata vialua (12-31)

12  A vamanji, catiamẽla kolongavelo via tunda ku Suku, si yongola okuti vu kala vonumbi.  Ene wa kũlĩhi okuti eci wa kali vakualofeka,* wa vetiyiwi oku fendela oviteka ka vi popi, loku kuama kuosi viu songuili.  Kuenje ndi yongola okuti vu kũlĩha okuti lomue o vanguila vonduko yespiritu lia Suku hati: “Yesu wa siñaliwa!” kuenda lomue o popia hati: “Yesu eye Ñala!” te lika lespiritu sandu.  Kuli olongavelo via litepa, pole, kuli lika espiritu limuamue;  kuenda kuli ovopange a litepa, pole, kuli lika Ñala umuamue;  kuli oku talavaya kuiñi kuiñi, pole, Suku o talavayisa viosi vomanu vosi, umuamue.  Oku molẽhisua kuespiritu ku eciwa komunu lomunu locimãho coku kuatisa omanu vakuavo.  Umue ĩhiwa ­ongavelo yoku ­vangula* lolondunge omo liespiritu, ukuavo ongavelo yoku vangula lukũlĩhĩso lespiritu limuamue,  ukuavo ongavelo yekolelo lespiritu limuamue, handi ukuavo ongavelo yoku sakula lespiritu limuamue, 10  handi ukuavo, oku linga ovilimbu, ukuavo oku imba owanji, ukuavo uloño woku limbuka nda ondaka yimue ya tunda ku Suku ale sio, ukuavo oku vangula alimi a litepa kuenda ukuavo oku pitiya alimi aiñi aiñi. 11  Olongavelo viosi evi, via eciwa lespiritu limuamue, via aviwila komunu lomunu ndeci olio lia panga. 12  Ndeci etimba limosi li kuete ovimatamata vialua kuenda ovimatamata viosi vietimba ndaño vialua, pole, vi linga etimba limosi, haicovo Kristu. 13  Momo vosi yetu tua papatisiwa lespiritu limuamue kuenda vetimba limuamue, ci kale va Yudea ale va Helasi, ci kale apika ale vana va yovoka, vosi tua tambula espiritu limuamue. 14  Etimba hacimatamatako cimosi, pole, vialua. 15  Nda omahi yi popia yiti, “Omo okuti hameko eka, sia tiamẽlele ketimba,” eci ka ci lekisa okuti oyo ka ya tiamẽlele ketimba. 16  Nda etũi li popia liti, “Omo okuti hameko iso, sia tiamẽlele ketimba,” eci ka ci lekisa okuti olio ka lia tiamẽlele ketimba. 17  Nda etimba liosi lia kaile iso, oku yeva nda kua kala pi? Nda liosi lia kaile oku yeva, oku lehũla nda kua kala pi? 18  Pole, Suku wa sokiya ocimatamata locimatamata cetimba ndomo eye a panga. 19  Nda viosi via kaile ocimatamata cimuamue, etimba nda lia kala pi? 20  Pole, ndaño okuti ovio ovimatamata vialua, etimba limosi. 21  Ka citava iso oku popia leka hati, “Siu ku sukila,” ale utue oku popia lomahi hati, “Siu ku sukila.” 22  Ndaño ovimatamata vietimba vina vi molẽha ndu okuti via hongua, vi sukiliwa, 23  kuenda ovimatamata vietimba vina tu sima okuti vi sule kesumbilo, ovio tu sumbila vali, levi ka via posokele, ovio vi sumbiwa calua, 24  osimbu okuti ovimatamata via posoka ka vi sukila esumbilo liaco. Puãi Suku wa sokiya etimba okuti ocimatamata cina ka ca sumbiwile, ci sumbiwa ca piãla, 25  okuti ketimba ka ku kala olonepele, pole, ovimatamata viaco vi li kapako. 26  Nda ocimatamata cimosi ci tala ohali, ovimatamata vikuavo vi talela kumuamue laco ohali; ale nda ocimatamata cimue ci pandiyiwa, ovimatamata viosi vi yolelela kumuamue laco. 27  Ene wutimba lia Kristu kuenda omunu lomunu pokati kene wuvimatamata vialio. 28  Suku wa nõla vamue vekongelo ndeci: tete, ovapostolo; vali, ovaprofeto; tatu, alongisi; noke ovilimbu; olongavelo vioku sakula; ovopange oku kuatisa; uloño woku songola; kuenda oku vangula alimi a litepa. 29  Anga vosi ovapostolo? Anga vosi ovaprofeto? Anga vosi alongisi? Anga vosi va linga ovilimbu? 30  Anga vosi va kuete ongavelo yoku sakula? Anga vosi va vangula alimi a litepa? Anga vosi vakuakupitiya* alimi? 31  Puãi, likolisili* oku sanda olongavelo via velapo. Kuenje ndu lekisi onjila ya velapo vali.

Footnotes

Okuti havakuetavoko.
Ale, “esapulo limue.”
Ale, “vakuakupongolola kalimi.”
Ale, “oku sandiliya lombili.”