1 Va Korindo 11:1-34

  • “Lingi olosetukuli viange” (1)

  • Oku songola kuenda oku futa kutue (2-16)

  • Oku lia Ondalelo ya Ñala (17-34)

11  Lingi olosetukuli viange ndeci ame ndi setukuli ya Kristu.  Ndu pandiyi omo vu njivaloka kovina viosi kuenda wa kakateli kolonumbi ndo wĩhi.  Puãi ndi yongola okuti vu kũlĩha okuti utue wulume Kristu; kuenda utue wukãi ulume; kuenje utue wa Kristu Suku.  Ulume wosi o likutilila, ale imba owanji lutue wa futiwa, o sepuisa utue waye;  pole, ukãi wosi o likutilila, ale imba owanji lutue ka wa futiwile, o sepuisa utue waye, momo ci kasi ndukãi wa pemuiwa.  Puãi, ukãi nda ka futi, a tete esinga liaye; pole, nda ci kutisa osõi ukãi oku litetisa esinga, ale esenya, a fute.  Ka ca sungulukile ulume oku futa kutue, momo eye esetahãlo lia Suku, haeye ulamba waye; pole, ukãi eye ulamba wulume.  Momo ulume kopiwile kukãi, ukãi eye wopiwa kulume.  Handi vali, ulume ka lulikiwile mekonda liukãi, pole, ukãi eye wa lulikiwa mekonda liulume. 10  Omo liaco, ukãi o sukila oku kuata ondimbukiso yepokolo yutue waye omo liovangelo. 11  Haimo lumue, vu Ñala, ukãi ka litepele kulume, ndaño ulume ka litepele kukãi. 12  Momo, ndeci ukãi opiwa kulume, haico ulume weyilila omo liukãi, puãi ovina viosi via tunda ku Suku. 13  Sokololi ene muẽle: Ca sunguluka hẽ ukãi oku likutilila ku Suku okuti ka futile kutue? 14  Ocituwa comanu ka cu longisi okuti ulume oku kuata esinga lia lepa, cu sepuisa, 15  pole, nda ukãi o kuete esinga lia lepa ulamba kokuaye? Momo esinga liaco lio wĩhiwa oco li linge ndocifuto. 16  Nda umue o yongola oku tamalãla locituwa cimue, etu ka tu kuete ocituwa ciñi, ndaño akongelo a Suku. 17  Osimbu ndu wĩhi olonumbi evi, siu pandiyi, momo oku liongolola kuene pamosi ka ku kuatisa, puãi ku tatamisa. 18  Catete, njevite okuti eci vu liongolola vekongelo, pokati kene pali olonepele; kuenje nda ci kolela. 19  Pokati kene te pa kala olonepele, oco omanu vana va taviwa la Suku va molẽhe pokati kene. 20  Eci vu liongoluila pamosi pocitumãlo cimue, ka citava okuti vu lia Ondalelo ya Ñala. 21  Momo eci vu lia ondalelo yaco, omunu lomunu upa tete okulia kuaye, okuti umue o kala onjala, ukuavo o kolua. 22  Anga ka vu kuete olonjo vioku lilamo kuenda oku nyuilamo? Ale wa tombi ekongelo lia Suku, loku kutisa osõi vana ka va kuete cimue? Ndu sapuili nye? Ndu pandiyi hẽ? Kondaka eyi, siu pandiyi. 23  Momo eci nda tambula ku Ñala oco nda ecavo kokuene, okuti Ñala Yesu kuteke a laikele oku pakuiwa, wa tikula ombolo, 24  noke yoku eca olopandu wa yi timbula, yu wa popia hati: “Eci ci lomboloka etimba liange, lina li eciwa vonduko yene. Ci lingaili onjivaluko yange.” 25  Haico a lingavo lokopo, noke yoku lia ondalelo wa popia hati: “Okopo eyi yi lomboloka ocisila cokaliye omo liosonde yange. Olonjanja viosi vu nyua okopo eyi, ci lingili onjivaluko yange.” 26  Olonjanja viosi vu lia ombolo eyi, loku nyua okopo eyi, vu sapula oku fa kua Ñala, toke eci eya. 27  Kuenje wosi o lia ombolo, ale oku nyua okopo ya Ñala losiata, o pisiwila etimba kuenda osonde ya Ñala. 28  Tete omunu a likũlĩhĩse vutima waye, oco a lia noke ombolo loku nyua kokopo. 29  Momo u o lia loku nyua nda ka limbuka etimba, o lia o nyua loku likokela episo. 30  Eli olio esunga lieci valua pokati kene va hongua, va vela kuenje vamue va pekela kolofa.* 31  Puãi nda tua li kũlĩhĩsile, nda tua yuvula oku pisiwa. 32  Eci tu pisiwa, tu pindisiwa la Yehova, okuti ka tu pisiwila kumue loluali. 33  Pole, a vamanji eci vu liongoluila okulia kuaco, litalamẽli. 34  Nda umue o kuete onjala, a lie konjo yaye, okuti eci vu liongoluila pamosi ka vu pisiwa. Puãi ovina vikuavo ndi vi sokiya eci njiya.

Footnotes

Eci ci tiamisiwila koku fa konepa yespiritu.