1 Va Korindo 1:1-31

  • Ovilamo (1-3)

  • Paulu o pandula Suku omo lia va Korindo (4-9)

  • Evetiyo lioku likuata omunga (10-17)

  • Kristu eye unene haeye olondunge via Suku (18-25)

  • Oku lipandela lika ku Yehova (26-31)

1  Paulu, una wa kovongiwa oku linga upostolo wa Kristu Yesu omo liocipango ca Suku kuenda Sositene manjetu,  tu kasi oku vu soneheli ene vu kasi vekongelo lio Korindo, ene wa nõliwi la Suku omo lia Kristu Yesu, haene wa kovongiwi oku kala olosandu kumue la vosi va kasi kolonepa viosi va tukula onduko ya Ñala yetu Yesu Kristu, Ñala yavo haeye Ñala yetu:  Ohenda ya piãla lombembua yi tunda ku Suku Isietu kuenda ku Ñala Yesu Kristu, yi kale lene.  Olonjanja viosi ndu panduili ku Suku yange omo liohenda ya piãla Suku o wĩhi vonduko ya Kristu Yesu;  momo wa lingisui olohuasi vokuaye kovina viosi, okuti kuloño woku popia kuenda kukũlĩhĩso,  ndeci uvangi wa imbiwila Kristu wa pamisiwa pokati kene,  okuti lacimue ocali co kambeli, osimbu vu lavoka esituluilo lia Ñala yetu Yesu Kristu.  Eye o vu pamisi toke kesulilo, okuti lomue u pisi keteke lia Ñala yetu Yesu Kristu.  Suku una wo kovongeli oku kuata ukamba Lomõlaye Yesu Kristu Ñala yetu, ukuacili. 10  A vamanji, ndu pingi vonduko ya Ñala yetu Yesu Kristu okuti vu popia popia cimuamue kuenda pokati kene ka pa ka kale olonepele, pole, likuati omunga lutima umuamue lovisimĩlo vimuamue. 11  A vamanji, vamue vakuanjo ya Koloe va ndi sapuila okuti pokati kene pali oku liyenja. 12  Eci ñasi oku lombolola ceci okuti, pokati kene umue o popia hati: “Ame nda tiamẽla ku Paulu,” “Ame nda tiamẽla ku Apolosi,” “Ame nda tiamẽla ku Kefa,”* “Ame nda tiamẽla ku Kristu.” 13  Ekongelo lia Kristu lia li tepa tepa? Paulu hẽ wo pondiwili kuti? Ale wa papatisiwili vonduko ya Paulu? 14  Mandula Suku omo sia papatisile umue pokati kene, te lika Krispo la Gaio, 15  sanga umue o popia okuti wa papatisiwa vonduko yange. 16  Ocili okuti, nda papatisavo vakuanjo ya Stefana. Pole, nda nda papatisa vali vakuavo, si ci ivaluka. 17  Momo Kristu ka numile oku papatisa, te oku kunda olondaka viwa, haluloñoko wolondaka,* sanga uti wekangiso* wa Kristu u sepuiwa. 18  Kuava va kasi oku nyõleha, ondaka yatiamẽla kuti wekangiso,* uveke, puãi kokuetu tu kasi oku popeliwa, ondaka yaco, unene wa Suku. 19  Momo ca sonehiwa citi: “Ndi nyõla olondunge via vakualondunge, ndi imula* oku lunguka kuomanu va lunguka.” 20  Ukualondunge o kasi pi? Ukuavisonehua* o kasi pi? Ukualonamalala violuali lulo* o kasi pi? Suku ka tendele hẽ olondunge violuali lulo okuti uveke? 21  Kuenje omo okuti oluali ka lua kũlĩhĩle Suku mekonda liolondunge vialuo, Suku lolondunge viaye wa sokiya okuti omo liuveke weci ci kundiwa, o popela vana va tava. 22  Momo va Yudea va pinga ondimbukiso kuenda va Helasi va sanda olondunge; 23  etu puãi tu kunda kunda Kristu wa pondiwila kuti, ku va Yudea ci linga ocilondokua, pole, ku vakualofeka uveke. 24  Puãi vana va kovongiwa, ci kale va Yudea kuenda va Helasi, Kristu eye unene wa Suku, haeye olondunge via Suku. 25  Momo ovina via Suku vi kuete olondunge okuti omanu va sule kuenda ovina via Suku okuti via hongua, via pama, omanu va sule. 26  A vamanji, limbuki okuti pokati kene wa kovongiwi, ka valuile vakualondunge ndeci oluali lu tenda olondunge, ka valuile vakuonene, ka va luile olombuale,* 27  pole, Suku wa nõla ovina viuveke violuali oco a kutise osõi omanu vakualondunge; kuenda Suku wa nõla ovina via hongua violuali oco a kutise osõi ovina via pama; 28  kuenje Suku wa nõla ovina ka vi kuete esilivilo violuali levi via tombiwa, lovina ka vi kasiko, oco a kutise osõi evi vi kasiko, 29  okuti lomue o lipanda kovaso a Suku. 30  Mekonda lia Suku, ene vu kasi vomunga la Kristu Yesu, una Suku a lingisa olondunge vietu, esunga lietu, oku kola kuetu kuenda eyovo lietu omo liocisembi, 31  oco ci kale ndomo ca sonehiwa citi: “U o lipanda, a lipandele Yehova.”

Footnotes

O tukuiwavo Petulu.
Ale, “olondaka vienyango.”
Tala Elomboluilo.
Tala Elomboluilo.
Ale, “oku likala.”
Okuti, wa loñoloha Kocihandeleko.
Ale, “koloneke vilo.” Tala Elomboluilo.
Ale, “vakuapata a kemãla.”