Skip to content

Skip to table of contents

Olombangi Via Yehova

Select language Umbundu

 OCIPAMA 68

Omõla a Suku Eye ‘Ocinyi Coluali’

Omõla a Suku Eye ‘Ocinyi Coluali’

YOANO 8:12-36

  • YESU O LOMBOLOLA HELIE OMÕLA A SUKU

  • NDAMUPI VA YUDEA VA LINGA APIKA?

Keteke lia sulako Liocipito Colosinge okuti eteke liepanduvali, Yesu o kasi oku longisa vonepa yimue yonembele yi tukuiwa hati, ‘ohondo yoku seleka olombongo.’ (Yoano 8:20; Luka 21:1) Citava okuti, ocitumãlo caco ci kasi Kocitali Cakãi kuna omanu va siata oku kapa olombanjaile viavo.

Luteke vokuenda kuocipito, onepa yaco yonembele yi kuete ocinyi cimue cilikasi. Oviyekelo violondiyelo vikũala vi kasi kocitumãlo caco kuenda ociyekelo lociyekelo colondiyelo ci kuete olombasiya vikũala vinene vi kuete ulela. Ocinyi colondiyelo viaco, ci tua calua okuti ci mihĩla onepa yalua yocitumãlo. Ovina Yesu a popia cilo, citava okuti vi ivaluisa olondonge viaye catiamẽla kolondiyelo viaco. Eye o popia hati: “Ame ndicinyi coluali. Wosi o ñuama ka endela vali vowelema, puãi o kala locinyi comuenyo.”—Yoano 8:12.

Va Fariseo ka va tava kolondaka via Yesu kuenje va popia vati: “O limbila uvangi ove muẽle; uvangi wove hawociliko.” Yesu o va tambulula hati: “Ndaño ndi limbila uvangi ame muẽle, uvangi wange wocili, momo nda kũlĩha oku nda tunda, loku ngenda. Pole, ene ka wa kũlĩhĩli oku nda tunda loku ngenda.” Noke amisako loku popia hati: “Vocihandeleko cene mua sonehiwa ndoco: ‘Uvangi womanu vavali wocili.’ Ame ndi limbila uvangi kuenda Isia una wa numa o njimbilavo uvangi.”—Yoano 8:13-18.

Va Fariseo ka va tava kocisimĩlo ca Yesu kuenje va pula vati: “Isiove o kasi pi?” Yesu eca etambululo li teta onimbu hati: “Ene ka wa ñũlĩhĩli kuenda ka wa kũlĩhĩlivo Isiange. Nda wa ñũlĩhĩli, nda wa kũlĩhivo Isiange.” (Yoano 8:19) Va Fariseo handi va yongola okuti Yesu o kuatiwa, pole, lomue o kuete utõi woku u lamba.

Yesu o va sapuila vali hati: “Ame ngenda kuenda vu ka mbanjiliya kuenje vu fila vekandu liene. Oku ngenda, ka vu tẽla oku pitĩlako.” Va Yudea ka va kuata elomboloko lia suapo liolondaka via Yesu.  Omo liaco, va li pula vati: “Anga o ka li ponda eye muẽle? Momo wa popia hati, ‘Oku ngenda, ka vu tẽla oku pitĩlako.’” Ovo ka va kuete elomboloko lieci Yesu a yongola oku popia, momo ka va kũlĩhĩle oku a tunda. Yesu o lombolola hati: “Ene wakuaposi; ame ndukuakilu. Ene vukualuali lulo; ame siukualuali luloko.”—Yoano 8:21-23.

Yesu o kasi oku popia eci catiamẽla komuenyo waye eci a kala kilu, loku linga Mesiya wa likuminyiwa ale Kristu, una okuti asongui vetavo va sukilile oku u limbuka. Pole, va pula lesepu lialua vati: “Ove elie?”—Yoano 8:25.

Ndaño loku suvukiwa kuenda oku lambalaliwa, Yesu o popia hati: “Momo lie ndi vanguila lene?” Noke Yesu o popia eci catiamẽla ku Isiaye kuenje o lombolola esunga lieci va Yudea va sukilila oku yevelela Omõla, poku popia hati: “U wa numa [wocili] kuenda ovina nda yeva kokuaye ovio ndi vangula voluali.”—Yoano 8:25, 26.

Noke Yesu o lekisa ekolelo ku Isiaye okuti, va Yudea ka va li kuete. Eye o popia hati: “Eci vu valela Mõlomunu kuti, vu limbuka okuti ame, ame muẽle kuenda si lingi cimue locipango cange; puãi ovina Isia a ndongisa ovio mopia. U wa numa o kasi lame; eye ka njandulukile, momo ndingainga ovina viu sanjuisa.”—Yoano 8:28, 29.

Pole, va Yudea vamue va lekisa ekolelo ku Yesu kuenje eye o va sapuila hati: “Nda vu pandikisa [kolondaka viange], vulondonge viange ocili, kuenje vu kũlĩha ocili kuenda ocili cu yovoli.”—Yoano 8:31, 32.

Omanu vamue va tatãla olondaka Yesu a popia viatiamẽla koku yovuiwa. Omo liaco, va popia vati: “Etu tumbuto ya Avirahama kuenda ka tua la kala apika vomunu umue. O popia ndati huti, ‘Vu yovoka’?” Va Yudea va kũlĩha okuti olonjanja vimue va vialiwile lovingendeleyi, pole, va likala oku tukuiwa okuti apika. Yesu o lekisa okuti ovo handi apika poku popia hati: “Ocili ndu sapuili siti, Wosi o lingainga ekandu, upika wekandu.”—Yoano 8:33, 34.

Va Yudea va likala oku limbuka okuti apika vekandu kuenje eci ci va kapa kohele. Yesu o va sapuila hati: “Upika ka amamako vepata; omõla amamako otembo ka yi pui.” (Yoano 8:35) Upika umue ka kuate omoko yoku tambula ocipiñalo, momo o pondola oku tundisiwa votembo ya sokiyiwa. Pole, omõla woku citiwa ale omõla wokatumba eye amamako oku kala “otembo ka yi pui” osimbu a kasi lomuenyo.

Omo liaco, ocili catiamẽla Komõla, oco ocili ci yovola omanu otembo ka yi pui kekandu li nena oku fa. Yesu o popia hati: “Nda Omõla o vu yovola, vu yovoka ocili.”—Yoano 8:36.