Skip to content

Skip to table of contents

Olombangi Via Yehova

Select language Umbundu

 OCIPAMA 72

Yesu o Tuma Olondonge 70 Oco vi ka Kunde

Yesu o Tuma Olondonge 70 Oco vi ka Kunde

LUKA 10:1-24

  • YESU O NÕLA OLONDONGE 70 KUENDA O VI TUMA OCO VI KA KUNDE

Unyamo 32 K.K., u panda kesulilo okuti tunde eci Yesu a papatisiwa pa pita ale ci soka anyamo atatu. Eye kumue lolondonge viaye ndopo va kala Kocipito Colosinge ko Yerusalãi. Citava okuti handi va kasi volupale luaco. (Luka 10:38; Yoano 11:1) Yesu volosãi epandu wa pita otembo yalua kupange woku kunda ko Yudea ale konele yikuavo Yolui Yordão koluvumba luo Perea. Handi ci sukilavo oku kundila kovitumãlo viaco.

Noke yo Paskoa yunyamo 30 K.K., Yesu wa pita olosãi vimue oku kundila vo Yudea loku linga ovongende ko Samaria. Eci o Paskoa yunyamo 31 K.K., ya kala ocipepi, va Yudea vo Yerusalãi va seteka oku ponda Yesu. Vokuenda kunyamo lolosãi epandu, Yesu wa longisa calua vo Galilea kuenda konano yo Yudea. Votembo yaco, valua va linga olondonge viaye. Vo Galilea Yesu wa pindisa ovapostolo vaye kuenda wa va tuma lonumbi yokuti: “Kundi ndoco: ‘Usoma wo kilu u kasi ocipepi.’” (Mateo 10:5-7) Cilo, eye o sokiya upange woku kundila vo Yudea.

Oco ku fetikiwe upange waco, eye o nõla 70 kolondonge kuenje o vi tuma vivali vivali. Pole, poku vi tepisa, ca tẽla 35 kovimunga viakundi Vusoma vocikanjo muna okuti “oku ungula kualua, pole, olonalavayi vitito.” (Luka 10:2) Citava okuti ovo va enda kovitumãlo vina okuti pamue Yesu o ka endako noke. Olondonge 70 vi sakula olombei kuenda vi kunda esapulo limuamue ndeli Yesu a kunda.

Ka citava okuti olondonge viaco vi longisa lika volosunangonga. Yesu o vi sapuila oco viende kolonjo viomanu. Eye o vi handeleka hati: “Eci wiñili vonjo yimue, popi hoti: ‘Onjo yilo yi kale lombembua.’ Nda u o kasimo o sole ombembua, ombembua yene yi kala laye.” Lipi li ka kala esapulo liaco? Yesu o popia hati: “Va kundili hoti: ‘Usoma wa Suku weya ocipepi lene.’”—Luka 10:5-9.

Olonumbi Yesu a eca kolondonge 70, vimuamue levi a eca kovapostolo 12 okuti tunde eci a vi tumile pa pita ale unyamo. Eye o vi lungula okuti havosiko va ko tambuli ciwa. Pole, alikolisilo avo a kuatisa omanu va lekisa onjongole kesapulo eci Yesu a laikele oku pitĩla noke. Kuenje valua va ka lavoka Ñala oco vo kũlĩhe loku lilongisa catiamẽla kokuaye.

Ka pa pitile otembo yalua, ci soka 35 kovimunga viakundi Vusoma vi tiuka ku Yesu. Lesanju lialua vo sapuila vati: “A Ñala ndaño muẽle olondele via pokola kokuetu omo lioku tukula onduko yove.” Yesu o sanjuka calua lesapulo liaco, kuenje o popia hati: “Nda mola Satana wa kupuka ale ndociliakulo ca tunda kilu. Ndo wĩhi unene woku liataila olonyõha lanyenya.”—Luka 10:17-19.

Yesu o sapuila oloñame viaye okuti via laikele oku yula ovitangi vi sokisiwa loku liataila olonyõha kuenda anyenya.  Handi vali, va sukilile oku kolela okuti kovaso yoloneke Satana o ka kupuiwa kilu. Yesu wa kuatisa olondonge 70 oku limbuka eci ca kuatele esilivilo lia velapo toke kovaso yoloneke. Eye o popia hati: “Ko ka sanjukili omo olondele vi pokola kokuene, pole, sanjuki omo olonduko viene via sonehiwa kilu.”—Luka 10:20.

Yesu o sanjuka calua kuenda o sivaya Isiaye powiñi omo a ecelela okuti afendeli vaye ambombe va talavaya lunene waco. Kuenje o sapuila olondonge viaye hati: “[Ovaso a lete ovina ene vu lete, a sumũlũha]. Ndu sapuili siti, ovaprofeto valua lolosoma va yonguile oku mola ovina vu lete, pole ka va vi muile kuenda oku yevelela ovina vu kasi oku yeva, pole ka va vi yevele.”—Luka 10:23, 24.