Skip to content

Skip to table of contents

Olombangi Via Yehova

Select language Umbundu

 OCIPAMA 81

Yesu la Isia Vamuamue, Pole Yesu Hasukuko

Yesu la Isia Vamuamue, Pole Yesu Hasukuko

YOANO 10:22-42

  • “AME LA ISIA TUAMUAMUE”

  • YESU O SITULULA ELUNDI LIOKUTI OSUKU

Yesu enda ko Yerusalãi Kocipito Coku Tumbika (ale ci tukuiwavo hati, Hanuka) okuti, kepuluvi lioku tumbika vali onembele. Ci pitahãla ocita canyamo konyima, Soma umue ya va Suria o tukuiwa hati, Antioku IV Epifânio, wa tunga utala umue kilu liutala unene wonembele ya Suku. Noke omãla vocitunda cimue u Yudea va tambula vali o Yerusalãi kuenje va tumbikila vali Yehova onembele yaco. Tunde kotembo yaco, unyamo lunyamo keteke 25 ya Kisileu okuti, kesulilo liosãi ya Kuvala kuenda kefetikilo liosãi ya Cembanima kua siata oku sambiliyiwa ocipito caco.

Otembo yokuenye okuti, ku linga ombambi yalua. Yesu o kasi vonembele kocindumba ca Salomone. Kuenje va Yudea vo ñuala ocingonja loku u pula vati: “Toke pi o tu sia vatatahãi? Nda ove vu Kristu, tu sapuile ocili.” (Yoano 10:22-24) Yesu o tambulula hati: “Ndo ci sapuili ale pole, lopo ka vu kolela.” Yesu ka va lomboluila ciwa okuti eye Kristu, ndeci a li situluila kukãi u Samaria eci va kala pocisimo. (Yoano 4:25, 26) Pole, o lisitulula loku popia hati: “Osimbu Avirahama ka citiwile ame nda kala ale komuenyo.”—Yoano 8:58.

Yesu o yongola okuti omanu va limbuka ovo muẽle okuti eye Kristu, poku sokisa ovopange aye leci ovitumasuku via popele okuti oco Kristu a laikele oku linga. Eli olio esunga lieci eye olonjanja vimue a handelekele olondonge viaye oco ka vi ka sapuileko laumue okuti eye Mesiya. Pole, cilo o sapuila ovanyãli vaye va Yudea loku teta onimbu hati: “Ovilinga ame ñasi oku linga vonduko ya Isiange, vi njimbila uvangi. Pole, ene ka vu kolela.”—Yoano 10:25, 26.

Momo lie ovo ka va tavela okuti Yesu eye Kristu? Eye o popia hati: “Ene ka vu kolela omo havulomeme viangeko. Olomeme viange vi yeva ondaka yange kuenda nda vi kũlĩha kuenje vi ndi kuama. Ame ndi va ĩha omuenyo ko pui kuenje lalimue eteke vi nyõleha kuenda lomue o vi ndi potosola peka liange. Eci Tate a nyĩha ca velapo okuti ovina vikuavo vi sule.” Noke Yesu o va sapuila okuti o kuete ukamba wocili la Isiaye loku popia hati: “Ame la Isia tuamuamue.” (Yoano 10:26-30) Omo okuti Yesu o kasi palo posi kuenda Isiaye o kasi kilu, eci ka ci lomboloka okuti eye la Isiaye va kuete etimba limuamue. Pole, ovo vamuamue omo okuti va likuete omunga koku tẽlisa ocipango cimuamue.

Olondaka via Yesu vi temisa calua va Yudea kuenje ovo va tikula vali ovawe oco vo ponde. Pole, eye ka kuata usumba kuenje o popia hati: “Ndo lekisi ovilinga vialua viwa via tunda ku Isia. Ovilinga vipi vu ndi sosuila?” Ovo vo kumbulula vati: “Ka tu ku sosuila elinga liwa, te omo lioku popia etonai; momo . . . o lilingisa osuku.” (Yoano 10:31-33) Nda Yesu ka la litukula okuti osuku, momo lie vo lundilila?

Va Yudea va tava okuti unene wosi Yesu a kuete wa tunda ku Suku. Catiamẽla ‘kolomeme,’ Yesu o popia hati: “Ame ndi va ĩha omuenyo ko pui” okuti ocina cimue omanu ka va pondola oku linga. (Yoano 10:28) Va Yudea va likala oku tava eci Yesu a popia okuti wa tambula unene ku Isiaye.

Yesu o tambulula alundi avo hati: “Ka ca sonehiwile hẽ Vocihandeleko cene [Vosamo 82:6] ‘Nda popia siti: “Vulosuku”’? Nda eye wa tukula “olosuku” vana va yeva ondaka ya Suku . . . oco hẽ vu popia ndati lu Isia a kolisa loku u tuma voluali hoti, ‘Ove o popia etonãi,’ omo nda linga siti, ‘ndi Mõla a Suku’?”—Yoano 10:34-36.

Nda Ovisonehua vi tukula omanu vana havakuesungako okuti “olosuku,” momo lie va Yudea va lundilila Yesu eci a popia okuti ‘Ndimõla a Suku?’ Eye o tukula ocina cimue ci va vetiya oku tava hati: “Nda si kasi oku linga ovilinga via Isiange, ko ka ñoleli. Pole nda ovio ndi kasi oku linga,  koleli ovilinga viaco ndaño ka vu ñolela ame, okuti vu kũlĩha kuenda vu limbuka okuti Isia o kasi lame, lame ñasi la Isia.”—Yoano 10:37, 38.

Va Yudea va seteka vali oku kuata Yesu, pole, eye o tila. Noke eye o tunda vo Yerusalãi kuenje o yoka Olui Yordão, toke kocitumãlo cina Yoano a fetikila oku papatisa okuti pa pitile ale anyamo akuãla. Citava okuti ocitumãlo caco ci kasi ocipepi lombuelo Yokalunga ko Galilea.

Owiñi wenda toke ku Yesu loku popia vati: “Yoano ka lingile ocilimbu cimue, pole, ovina viosi Yoano a tukuila omunu u, viocili.” (Yoano 10:41) Kuenje omanu valua va kolela Yesu.