Skip to content

Skip to table of contents

Olombangi Via Yehova

Select language Umbundu

 OCIPAMA 45

Yesu o Kuete Unene Woku Tundisa Olondele

Yesu o Kuete Unene Woku Tundisa Olondele

MATEO 8:28-34 MARKO 5:1-20 LUKA 8:26-39

  • YESU O TUNDISA OLONDELE VIALUA KUENJE VI IÑILA VOLONGULU

Noke yocilunga ca pita vokalunga, olondonge vi loka vowato kuenje vi saluka omo lieci ci kasi oku pita. Alume vavali va tema calua, va kuetiwe lolondele, va tunda lalupesi kayambo a kasi ocipepi kuenje va loña ku Yesu! Avanjeliu a lombolola lika ulandu weci ca pita la umue pokati kalume vaco. Citava okuti ulume waco, wa temapo vali calua kuenda o kuetiwe lolondele vokuenda kuotembo yalua.

Ulume waco omo liocitangi a kasi laco ka walaile cimue. Kuenje uteke lutanya, wa enda oku “kaluka kayambo kuenda kolomunda loku lilemeha lovawe.” (Marko 5:5) Eye wa tema calua okuti omanu va kuete usumba woku pita vonjila a kala. Omanu vamue va seteka oku u kuta lalienge kovolu lo kovoko, pole, eye o a tepa. Lomue o kuete ongusu yoku u kuata.

Eci ulume amela ku Yesu loku kupukila kolomãhi viaye, olondele vi kasi vetimba liaye viu lingisa okuti o kaluka lolukandi hati: “[A Yesu,] Amõla a Suku Tõlo, nye o yongola okuti ndu ku ci lingila? [Lisinga la Suku okuti ku ndi yambula].” Yesu o lekisa okuti o kuete unene wa velapo okuti, olondele vi sule poku popia hati: “Andele, tunda vulume.”—Marko 5:7, 8.

Pole, ulume waco o kuetiwe lolondele vialua. Eci Yesu o pula hati: “Onduko yove, ove elie?” eye wa tambulula hati: “Ame Lohoka, momo tua lua.” (Marko 5:9) Ohoka yimosi yo Roma yi kuete asualali valua. Omo liaco, olondele vialua vi kasi oku talisa ohali ulume waco kuenda va kasi oku sanjukila ohali a kasi oku tala. Olondele viaco vi pinga ku Yesu oco “ka ka vi tume vekungu.” Citava okuti, via kũlĩha eci ci ka pita lavo kumue lusongui wavo Satana.—Luka 8:31.

Ponele yavo, pa kala ocunda cimue colongulu ci soka 2.000 okuti, via kala oku lia. Ndomo Ocihandeleko ca popele, olongulu via kala ovinyama via vĩha kuenda ka ca tavele okuti va Yudea va vi fuka. Olondele vi popia viti: “Tu tume volongulu, okuti tu iñila vokuavio.” (Marko 5:12) Yesu o vi sapuila okuti citava oku enda kuenje ovio vi iñila volongulu. Omo liaco, ci soka 2.000 kolongulu, viosi via fetika oku lupuka kuenje via kupukila vocingunguma loku limbutũila vokalunga.

 Omanu vana va tata olongulu eci va mola ovina viaco, va lupukila volupale kuenda vovaimbo, oco va ka lombolole ovina via pita. Kuenje omanu vaco va tunda oco va ka tale ovina via pita. Eci va pitĩla, va mola okuti ulume wa kala lolondele, o kasi ciwa kuenda olondunge viaye vieyamo. Handi vali, vo sanga okuti wa wala kuenda wa tumãla ponele ya Yesu!

Omanu vana va mola ulume leci va yeva, va komõha momo ka va kuete elomboloko liovina viaco. Omo liaco, va pinga ku Yesu oco a tunde vimbo liavo. Osimbu Yesu a kala oku londa vowato, ulume una wa kuata olondele o pinga ku Yesu oco a ende kumue laye. Pole, Yesu u sapuila hati: “Kuende ku vangandiove, va sapuila ovina viosi Yehova a ku lingila kuenda ohenda a lekisa kokuove.”—Marko 5:19.

Olonjanja vimue Yesu wa handeleka omanu vana a sakula oco ka va ka ci popie komanu vakuavo, momo ka yongola okuti omanu va kuata ovisimĩlo ka via sungulukile viatiamẽla kokuaye. Pole, cilo ulume wa kuatiwile lolondele eca uvangi watiamẽla kunene wa Yesu kuenda o ci sapuila komanu vana okuti Yesu ka tẽlele oku sapela lavo. Ovina ulume waco a popia vi pondolavo oku imula ovisimĩlo ka via sungulukile kesunga lieci olongulu vialua via limbutũila vokalunga. Omo liaco, ulume o fetika oku sapula vo Dekapoli ovina viosi Yesu o lingila.