Skip to content

Skip to table of contents

Olombangi Via Yehova

Select language Umbundu

 OCIPAMA 51

Umondi u Pita Kocipito Coku Ivaluka Eteke Lioku Citiwa

Umondi u Pita Kocipito Coku Ivaluka Eteke Lioku Citiwa

Mateo 14:1-12 Marko 6:14-29 Luka 9:7-9

  • Herode O Tuma Oku Teta Utue Wa Yoano Upapatisi

Osimbu ovapostolo va Yesu va kasi oku tẽlisa upange woku kunda vo Galilea, Yoano Upapatisi una wa kunda ovina viatiamẽla ku Yesu, ka kuete elianjo lioku ci linga. Eye handi o kasi vokayike vokuenda kueci ci panda anyamo avali.

Yoano wa popia Soma Herode Antipasi kovaso omanu okuti, ka ca sungulukile oku kuela Herodiya, ukãi wa manjaye Filipu. Herode wa linyala lukãi waye watete oco a likuele la Herodiya. Ndomo ca lekisiwa Vocihandeleko ca Mose, cina Herode a popia okuti oco a kuãi, olohuela viaco viukahokolo kuenda ka vi taviwa. Omo liaco, Herode wa tuma oku kapa Yoano vokayike kuenda citava okuti wa ci lingila omo lioku kisikiwa la Herodiya.

Herode ka kũlĩhĩle eci a pondola oku linga la Yoano, momo omanu vo tenda okuti ‘eye uprofeto.’ (Mateo 14:5) Pole, Herodiya ka kuete atatahãi eci a yongola oku linga. Momo eye o ‘kuetele ocikumbiti Yoano’ kuenda o kasi oku amamako oku sandiliya epuluvi limue oco o ponde. (Marko 6:19) Kuenje o sanga epuluvi lioku ci linga.

Osimbu o Paskoa yunyamo 32 K.K. ka ya pitile, Herode o linga ocipito cimue coku ivaluka eteke liaye lioku citiwa. Akuenje vosi va Herode kumue lolohoka viaye, kuenda omanu va velapo vo ko Galilea, va lalekiwavo kocipito caco. Vokuenda kuocipito, Salome omõla ufeko Herodiya a cita la Filipu ulume waye watete, o pilukila kovaso omanu va lalekiwa. Omanu vosi va komõha omo liovina ufeko waco a kasi oku linga.

Herode o sanjukia calua omõlaye wokatumba kuenje u sapuila hati: “Minge cosi o yongola kuenje ndu ku ci ĩha.” Eye wo likuminyavo hati: “Cosi wa ndi pinga ndu ku ci ĩha, ndaño onepa yusoma wange.” Osimbu Salome ka ecele etambululo, o tunda kuenje o pula inaye hati: “Nye ndi pinga?”—Marko 6:22-24.

Eli olio epuluvi Herodiya a kala oku lavoka! Lonjanga yalua o tambulula hati: “Pinga utue wa Yoano Upapatisi.” Vepuluvi liaco, haico Salome a tiukila ku Herode lepingilo liaco hati: “Ndi yongola okuti cilo muẽle, o nyĩha pelonga utue wa Yoano Upapatisi.”—Marko 6:24, 25.

Herode o sakalala calua omo liepingilo Salome a linga kokuaye. Pole, omo okuti omanu a laleka va yeva ohuminyo a linga ku Salome, eye o kuete osõi yoku litiukamo oku tẽlisa ohuminyo yaco, ndaño mua kongela oku ponda omuenyo womunu umue ka kuete eko. Omo liaco, Herode o tuma ondavululi yimue vokayike lolonumbi vimue vi sumuisa. Noke ondavululi yi tiuka kuenda yi nena utue wa Yoano pelonga. Ondavuli yaco, yeca elonga ku Salome kuenje Salome o lieca ku inaye.

Eci olondonge via Yoano vi yeva eci ca pita laye, viya oku upa etimba liaye oco va li kende. Noke va lombolola ovina viaco ku Yesu.

Noke Herode o yeva okuti Yesu o kasi oku sakula omanu kuenda oku tundisa olondele kuenje o kuata usumba walua. Eye o lipula nda okuti Yesu una o kasi oku linga ovikomo vialua, eye Yoano Upapatisi wa “pinduiwa kuava va fa.” (Luka 9:7) Kuenje Herode Antipasi o kuata onjongole yoku mola Yesu. Pole, ka ci lingi locimãho coku yevelela ovina Yesu a kasi oku kunda. Herode o yongola oku u kũlĩha oco a limbuke nda o kuete muẽle esunga lioku sakalala.