Skip to content

Skip to table of contents

Olombangi Via Yehova

Select language Umbundu

 OCIPAMA 31

Ovo va Kalula Apunga Otiliku Kesambata

Ovo va Kalula Apunga Otiliku Kesambata

MATEO 12:1-8 MARKO 2:23-28 LUKA 6:1-5

  • OLONDONGE VI KALULA APUNGA OTILIKU KESAMBATA

  • YESU EYE “ÑALA YESAMBATA”

Yesu kumue lolondonge viaye cilo va linga ungende woku enda konano yo Galilea. Ya kala otembo yonjovo kuenda otiliku vovapia ya yela. Omo okuti olondonge vi kuete onjala, vi kalula apunga amue otiliku oco vi lie. Pole, ca kala keteke Liesambata kuenje va Fariseu va mola eci ovo va kala oku linga.

Pa pita ño otembo yimue tunde eci va Yudea vamue va yonguile oku ponda Yesu vo Yerusalãi, poku u pisa okuti wa tomba Esambata. Kaliye va Fariseo va pisa ovina olondonge vi kasi oku linga poku popia vati: “Tala! eci olondonge viove vi kasi oku linga, ka ca sungulukile oku ci linga Kesambata.”—Mateo 12:2.

Va Fariseo va popia okuti, oku kalula otiliku loku yi tukusa lovaka, cimuamue loku ungula ale oku sasa. (Etundilo 34:21) Ovisimĩlo ka via sungulukile ovo va kuata viatiamẽla koku linga upange Kesambata, via lingisa okuti Esambata liaco li kala ocilemo. Pole, eteke liaco Liesambata, lia nõliwila oku kala liesanju kuenda lioku lipamisa pokati londaka ya Suku. Yesu o lekisa okuti, ovisimĩlo viavo ka via sungulukile kuenje wa tukula ovolandu a lekisa okuti, Yehova Suku ka tumbikile Esambata oco li kuamiwe ndeci ovo va nõla oku li kuama.

Ulandu watete Yesu a tukula, u lombolola eci ca pita la Daviti kumue lalume vaye. Eci ovo va kala lonjala, va talama votavernakulu kuenje va lia olombolo via tumbikiwa. Olombolo viaco, via enda oku pongiyiwila lika ovitunda oco va vi lie, pole, viopiwile ale kovaso a Yehova, momo via piñanyiwa ale lolombolo viokaliye. Omo liaco, Daviti kumue lalume vaye ka va pisiwile omo lioku  lia olombolo viaco.—Ovisila 24:5-9; 1 Samuele 21:1-6.

Vulandu wavali, Yesu o popia hati: “Ka wa tangelivo Vocihandeleko okuti Kesambata ovitunda vonembele vi tomba Esambata kuenje ka vi pisiwa?” Yesu wa yonguile oku popia okuti, keteke Liesambata ovitunda via enda oku ponda ovinyama kuenda oku linga ovopange akuavo vonembele. Eye amisako hati: “Ndu sapuili siti, palo, pali eci ca velapo okuti onembele yi sule.”—Mateo 12:5, 6; Atendelo 28:9.

Oco a lekise vali kokuavo okuti ovisimĩlo viavo ka via sungulukile, Yesu o tukula Ovisonehua poku popia hati: “Nda wa kuateli elomboloko liokuti, ‘ndi yongola ohenda, ocilumba hacoko,’ nda ka wa pisili ava ka va kuete eko.” Eye o malusula lolondaka viokuti: “Mõlomunu eye Ñala Yesambata.” Yesu o kasi oku tiamisila olondaka viaye Kusoma wombembua u laika oku iya okuti, wohulukãi yanyamo.—Mateo 12:7, 8; Hosea 6:6.

Vokuenda kuanyamo alua, omanu va siata oku talisiwa ohali la Satana, omo liungangala kuenda ovoyaki. Pole, vokuenda kuviali wa Kristu ovina vi ka pongoloka! Momo uviali waco u ka kala Ndesambata linene li ka nena epuyuko tu sukila!