Skip to content

Skip to table of contents

Olombangi Via Yehova

Select language Umbundu

 OCIPAMA 48

Ndaño Lovikomo a Linga, vo Nasara vo Likala

Ndaño Lovikomo a Linga, vo Nasara vo Likala

MATEO 9:27-34 13:54-58 MARKO 6:1-6

  • YESU O SAKULA OLOMEKE KUENDA OVITENDE

  • OMANU VO KO NASARA VO LIKALA

Yesu o kasi lupange walua. Noke yoku tunda volupale luo Dekapoli, wa sakula ukãi wa kala oku pita osonde kuenda wa pindula omõla ufeko a Yairo. Pole, eteke handi ka lia sulile. Osimbu Yesu a tunda konjo ya Yairo, alume vavali olomeke vo kuama kuenje va kaluka vati: “Tu kuatele ohenda, Amõla a Daviti.”—Mateo 9:27.

Poku tukula Yesu hati, “Amõla a Daviti,” alume ava va kasi oku lekisa okuti, va tava okuti Yesu eye kapiñala kocalo ca Daviti kuenda eye Mesiya. Yesu o lekisa ndu okuti ka kapeleko epingilo liavo, citava okuti o ci lingila oco a tale nda ovo vamamako oku u pinga, pole, va lipilika muẽle. Eci Yesu a iñila vonjo yimue, alume vaco vavali vo kuama kuenje va iñilavo vonjo yaco. Omo liaco, Yesu o va pula hati: “Wa koleli okuti ndi tẽla oku ci linga?” Ovo va tambulula lekolelo vati: “Tua ci kolela a Ñala.” Kuenje Yesu o lamba vovaso avo kuenda o va sapuila hati: “Ci lingiwe ndeci ca soka lekolelo liene.”—Mateo 9:28, 29.

Vepuluvi liaco, ovo va fetika oku vanja! Yesu o va handeleka oco ka va ka ci sapuile komunu laumue ndeci a handelekele ale omanu vakuavo. Pole, omo liesanju va kuata, va fetika oku sandeka ondaka yaco kolonepa viosi.

Osimbu alume vaco vavali va kasi oku enda, omanu va nena ulume umue ocitende, momo o kuetiwe lolondele. Yesu o tundisa ondele yaco kuenje vepuluvi liaco ulume o fetika oku vangula. Owiñi u komõha kuenje u popia vati: “Ka tua la mola ocina cimue ndeci vo Isareli.” Va Fariseo va kasivo pocitumãlo caco. Ovo ka va pondola oku patãla ovikomo via Yesu. Omo liaco, va fetika oku u pisa poku tukula omunu o kasi oku wĩha unene woku linga ovikomo viaco. Ovo va popia vati: “Eye o tundisa olondele lunene wa soma yolondele.”—Mateo 9:33, 34.

Noke yotembo yimue, Yesu o tiukila ko Nasara vimbo a kulila, pole, cilo enda kumue lolondonge viaye. Vokuenda kunyamo umosi, wa longisa vosunangonga yo vimbo liaco. Tete, omanu va komõha omo liovina a popia, pole, noke va tema omo lialongiso aye kuenje va seteka oku u ponda. Pole, cilo Yesu o seteka oku kuatisa vali omanu vana va lisungue laye.

Kesambata Yesu o tiukila kosunangonga oku longisa. Omanu valua va komõha kuenda va pula vati: “Ulume u, olondunge lovilimbu viaye, via tunda pi?” Ovo va popia vati: “U siti omõla a kalupindelu? Siti inaye Maria kuenda vamanjaye Tiago, Yosefe, Simono la Yuda? Kuenda vamanjaye akãi siti vosi va kasi letu palo? Ulume u, ovina evi viosi wa vi upa pi?”—Mateo 13:54-56.

Omanu va kala oku sima okuti Yesu omunu umue wa lisoka lavo. Kuenje va popia vati: ‘Etu tua mola eci a kala oku kula, o linga ndati Mesiya?’ Omo liaco, ndaño lovovangi alua a Yesu, oku kongelamo olondunge viaye vi komõhisa, lovilimbu viaye, lopo vo likala. Omo okuti epata lia Yesu lio kũlĩha tunde vutila, ca va kokela ocilondokua. Kuenje Yesu o popia hati: “Uprofeto ka sumbiwile koluse luaye kuenda kepata liaye.”—Mateo 13:57.

Yesu o komõha omo liekambo liavo liekolelo. Omo liaco, ka lingi ocikomo vimbo liaco pole, o “kapa ño ovaka komanu vamue va vela loku va sakula.”—Marko 6:5, 6.