Skip to content

Skip to table of contents

Olombangi Via Yehova

Select language Umbundu

 OCIPAMA 47

Kafeko Umue o Kala Vali Lomuenyo!

Kafeko Umue o Kala Vali Lomuenyo!

MATEO 9:18, 23-26 MARKO 5:22-24, 35-43 LUKA 8:40-42, 49-56

  • YESU O PINDULA OMÕLA UFEKO A YAIRO

Yairo wa mola okuti ukãi una wa kala oku pita osonde wa sakuiwa la Yesu. Omo liaco, Yesu o pondolavo oku kuatisa omõlaye ufeko, ndaño o kasi oku sima okuti “toke owola eyi, wa fa.” (Mateo 9:18) Anga hẽ kafeko kaco handi o pondola oku kuatisiwa?

Osimbu Yesu a sapela lukãi una a sakula, alume vamue va tunda konjo ya Yairo, vo sapuila vati: “Omõlove ukãi wa fa!” Ovo vamisako vati: “Nye o sakalasaila vali Ulongisi?”—Marko 5:35.

Ocili okuti esapulo liaco lia sumuĩsa calua Yairo! Eye wa sumbiwa calua lomanu vovimbo liaye, pole, cilo ka tẽla oku linga cimue. Momo omõlaye ufeko wongunga wa fa. Pole, Yesu o yeva ombangulo yaco, o vandekela Yairo kuenje lolondaka vi lembeleka, u sapuila hati: “Ku ka kuate usumba, kuata ño ekolelo.”—Marko 5:36.

Omo liaco, Yesu o kuama Yairo konjo yaye. Eci va pitĩla va sanga onjuela yowiñi walua. Omanu va kala oku lila loku lisiõsiõla kuenda oku litetela omo liesumuo. Yesu iñila vonjo kuenje o popia olondaka vimue vi komohĩsa hati: “Omõla ka file, o kasi ño oku pekela.” (Marko 5:39) Eci omanu va yeva olondaka viaco, va fetika oku u yola epembe, momo va kũlĩha okuti kafeko wa fa. Pole, lunene wa Suku, Yesu o lekisa kokuavo okuti ci tẽliwa oku pindula omunu wa fa, ndeci va pasula omunu o kasi kotulo tualua.

Cilo Yesu o sapuila omanu oco va ende posamua kuenje o siala lika la Petulu, Tiago, la Yoano kumue lolonjali viomõla ufeko wa fa. Kuenje enda lomanu vaco vatãlo vohondo va pekelisa omõla wa fa. Yesu poku u kuata peka u sapuila hati: “‘Talita kumi,’ ci lomboloka: ‘Ofeko, hu sapuila siti, “Votoka!”’” (Marko 5:41) Vepuluvi liaco, haico kafeko a votoka kuenje o fetika oku enda. Sokolola esanju Yairo kumue lukãi waye va yevite! Oco Yesu a lekise kokuavo okuti ufeko o kasi muẽle lomuenyo, eye o pinga oco va ece okulia kokuaye.

Vepuluvi limue, Yesu wa handeleka omanu vana a sakula oco ka va ka sapuile komanu vakuavo ovina eye a va lingila. Kuenje cilo o handelekavo olonjali via kafeko wa pinduiwa. Pole, omo okuti olonjali via kafeko wa pinduiwa vi kuete esanju lialua, ovo kuenda omanu vakuavo, va sanduila ondaka yaco “kofeka yosi.” (Mateo 9:26) Nda wa muile omunu umue ove o sole okuti wa pinduiwa, nda kua kuatele hẽ esanju lioku sapula ovina viaco komanu vakuavo? Owu, owo ulandu wavali wa tukuiwa watiamẽla kepinduko Yesu a linga.