Skip to content

Skip to table of contents

Olombangi Via Yehova

Select language Umbundu

 OCIPAMA 44

Yesu o Tulumula Ehunguhungu Vokalunga

Yesu o Tulumula Ehunguhungu Vokalunga

MATEO 8:18, 23-27 MARKO 4:35-41 LUKA 8:22-25

  • YESU O TULUMULA EHUNGUHUNGU VOKALUNGA KO GALILEA

Yesu wa kuata upange walua vokuenda kueteke okuti wa kava calua. Eci ku tekãva, o sapuila olondonge viaye hati: “Tu yokeli kesinya likuavo,” lio Kafarinau.—Marko 4:35.

Konele yutundilo Yokalunga ko Galilea kuli imbo lio Gerasa. Imbo liaco, lia kũlĩhĩwavo okuti o Dekapoli. Alupale o Dekapoli a kala ono yovihilahila via va Helasi ndaño okuti va Yudea valua va tungilevo valupale aco.

Eci Yesu a enda ko Kafarinau wa kũlĩhĩle ovina viaco. Momo kocitumãlo caco kua siatavo oku yokila awato akuavo. (Marko 4:36) Ocili okuti ungende waco ka wa luile. Okalunga ko Galilea ociva cimue cinene covava okuti, ka a kuete omongua. Okalunga kaco ka kuete eci ci soka 21 kolokilometulu kusõvi kuenda 12 kolokilometulu koku tanda pole, ka ka tapikile.

Ndaño Yesu wa lipua, ca sunguluka okuti o yeva ekavo omo liupange woku kunda. Omo liaco, osimbu va kala oku endela vowato Yesu enda konyima yowato kuenje o pekela.

Vamue pokati kovapostolo va Yesu va loñoloha koku endisa owato, pole, ungende waco ka u ka leluka kokuavo. Momo Okalunga ko Galilea ka ñualiwa lolomunda, kuenda ovava o kohulo Kokalunga kaco a tokota. Olonjanja vimue o fela yi talala yi tundilila kolomunda, eci yi li sanga lovava a tokota o vokalunga, vocipikipiki ku kala ehunguhungu linene. Eci oco ci kasi oku pita okuti, akimba a veta vowato kuenda vowato mu fetika oku “iñila ovava kuenje va kala kohele.” (Luka 8:23) Pole, lopo Yesu wa pekela!

Omo okuti ovapostolo va enda oku liyaka ale lovitangi viaco vokalunga, va seteka oku teyuila owato kehunguhungu. Pole, onjanja eyi ka ci tẽliwa. Omo lioku kuatela usumba omuenyo wavo, va pasula Yesu kuenje va popia vati: “A Ñala tu popele, tu laika oku fa!” (Mateo 8:25) Olondonge vi kasi lusumba woku fila vovava!

Eci Yesu a pasuka, o sapuila ovapostolo vaye hati: “Avakuekolelo litito, momo lie vu kueteli usumba?” (Mateo 8:26) Noke Yesu o lemẽla ofela lokalunga hati: “Uhãko! Tulumuha!” (Marko 4:39) Ofela yalua yimuha kuenje okalunga ka tulumuha. (Marko la Luka va lombolola ulandu owu u komõhisa. Tete va lombolola okuti, Yesu locikomo, o lemẽla ehunguhungu, noke va tukula ekambo liekolelo liolondonge.)

Sokolola ndomo olondonge via kala! Ovo va mola okuti okalunga ka temẽle calua, ka fetika oku tulumuha. Ovo va kuata usumba walua kuenje va li pula pokati vati: “Omunu u-u helie? Ndaño ofela lokalunga vi pokola kokuaye.” Omo liaco, ovo va tẽla oku pitĩla ciwa kesinya likuavo liokalunga. (Marko 4:41–5:1) Citava okuti awato akuavo ana a kala oku endela kumue lavo, a tẽla oku tiukila kohulo yutakelo wokalunga.

Ci lembeleka calua oku kũlĩha okuti Omõla a Suku o pondola oku pokuisa olongusu violuali! Eci a ka fetika oku viala Ongongo yosi, omanu vosi va ka kolapo, momo ka ku ka kala vali ovilunga!