Skip to content

Skip to table of contents

Olombangi Via Yehova

Select language Umbundu

 OCIPAMA 25

O Lekisa Ohenda Poku Sakula Ulume Ukuavilundu

O Lekisa Ohenda Poku Sakula Ulume Ukuavilundu

MATEO 8:1-4 MARKO 1:40-45 LUKA 5:12-16

  • YESU O SAKULA ULUME UKUAVILUNDU

Osimbu Yesu kumue lolondonge viaye vikuãla va kasi oku kundila “volosunangonga viavo, vo Galilea yosi,” omanu vo kolonepa vialua va yeva ovina vi komõhisa a kasi oku linga. (Marko 1:39) Ovina Yesu a kasi oku linga vi yevala kolupale ku kasi ulume umue o kuete ovilundu. Ndotolo Luka o lombolola okuti, ulume waco “we yuka ovilundu.” (Luka 5:12) Nda uvei waco u livokiya u nyõla olonepa vimue vietimba.

Ulume ukuavilundu o kasi vekalo limue li koka ohenda yalua kuenda o kisikiwa oku kala likaliaye. Handi vali nda o ñualẽhela lomunu umue o sukila oku kaluka hati: “Nda vĩhĩsua, nda vĩhĩsua!” oco omanu ka va ka pitĩle ocipepi laye okuti va sambuisiwa. (Ovisila 13:45, 46) Pole, nye ulumue ukuavilundu a linga cilo? Eye amẽla ku Yesu kuenje o kekama kolongolo loku pinga hati: “A Ñala, nda wa panga, ñayise.”—Mateo 8:2.

Ulume ukuavilundu o lekisa ekolelo lialua ku Yesu! Handi vali, sokololavo ndomo uvei a kuete u talisa ohali yalua! Nye Yesu a linga? Ove nda wa kailepo nda wa linga nye? Yesu omo lioku vetiyiwa lohenda olõla eka liaye kuenje o lamba ulume ukuavilundu. Noke u sapuila hati: “Nda panga! Kaya.” (Mateo 8:3) Ndaño okuti omanu vamue va kala oku tatãla omo liocikomo caco, pole, ulume ukuavilundu wa sakuiwa vepuluvi liaco.

Nye o sima catiamẽla kosoma yimue yi kuete ohenda haiyo yi kasi lunene, ndeci Yesu? Ocituwa Yesu a lekisa poku tata ulume ukuavilundu ci tu ĩha ekolelo liokuti, eci a ka linga Osoma yoluali luosi, o ka tẽlisa ocitumasuku Cembimbiliya ci popia hati: “O kuatela ohenda ohukũi losuke. O popela ovimuenyo violosuke.” (Osamo 72:13) Tua kolela okuti, Yesu o ka tẽlisa onjongole yaye yoku kuatisa omanu vosi va kasi oku tala ohali.

Ivaluka okuti, osimbu Yesu ka sakuile ulume ukuavilundu, upange waye woku kunda wa vetiya omanu oku kuata onjongole. Cilo omanu vosi va laika oku yeva ocilimbu ci komõhisa eye a linga. Pole, Yesu ka yongola okuti vo kolela lika omo liovina va yeva komanu vakuavo viatimẽla kokuaye. Yesu wa kũlĩha ocitumasuku ci popia okuti eye ‘ka kaluka; ondaka yaye ka yi yevala vokololo.’ Eci ci lomboloka okuti omanu ka va lombolola ovina vi komõhisa viatiamẽla kokuaye. (Isaya 42:1, 2) Omo liaco, Yesu o handeleka ulume ukuavilundu hati: “Ku ka sapuileko laumue, pole kuende ka lilekise kocitunda kuenda eca ocilumba Mose a handeleka.”—Mateo 8:4.

Ove o pondola oku sokolola esanju ulume a kuata omo a sakuiwa, kuenje ka tẽla oku liwekapo oku vangula catiamẽla kocikomo caco. Eye o tunda kuenje o sandula esapulo liaco kolonepa viosi. Eci ci vetiya ovitima viomanu. Kuenje kalupale osi Yesu a enda oku nyula, o limbukiwa. Omo liaco, eye o sandiliya ocitumãlo cimue ka pali omanu oco a kale lika liaye. Pole, omanu vo kolonepa viosi veya oco va sakuiwe kuenda oku longisiwa.