Skip to content

Skip to table of contents

Olombangi Via Yehova

Select language Umbundu

 OCIPAMA 46

Wa Sakuiwa Omo Lioku Lamba Kuwalo wa Yesu

Wa Sakuiwa Omo Lioku Lamba Kuwalo wa Yesu

MATEO 9:18-22 MARKO 5:21-34 LUKA 8:40-48

  • UKÃI UMUE O SAKUIWA POKU LAMBA KUWALO WA YESU

Eci Yesu a tunda vimbo lio Dekapoli, esapulo liatiamẽla kokuaye li lisanduila ku va Yudea va sangiwa konano Yokalunga ko Galilea. Citava okuti, omanu valua va yeva okuti, vokuenda kuehunguhungu limue lia pita ndopo, Yesu wa tulumula ofela kuenda ovava. Handi vali, citava okuti vamue va kũlĩha okuti Yesu wa tundisa olondele via kala kalume vavali. Omo liaco, “owiñi walua” u liongoluila kohulo yokalunga, citava okuti volupale luo Kafarinau oco va tambule Yesu. (Marko 5:21) Eci Yesu a tuluka vowato, omanu vosi va lavoka lesanju ovina a laikele oku linga.

Umue pokati kava va yongola oku mola Yesu, Yairo usongui wosunangonga, citava okuti osunangonga yo Kafarinau. Eye o kekamẽla kolomãhi via Yesu loku lipilika hati: “Omõlange ufeko, o vela calua. Nda wa panga enju oco u kape ovaka, okuti o kaya kuenda o kala lomuenyo.” (Marko 5:23) Yesu o tambulula ndati kepingilo lia Yairo oco a sakule omõlaye ukãi o kuete 12 kanyamo, haeye o soliwe calua la isiaye?—Luka 8:42.

Eci Yesu a kala oku enda konjo ya Yairo, o pita locitangi cimue ci komohĩsa. Omanu valua va kasi oku u kuama, va lavoka oku mola vali ocikomo cikuavo Yesu a laika oku linga. Pole, ukãi umue o kasi pokati kowiñi, o kuete ocitangi cuvei u sakalaisa.

Ukãi waco u Yudea, o kasi oku tala ohali yalua omo lioku pita osonde vokuenda kueci ci soka 12 kanyamo. Eye wa sandiliya ekuatiso kolondotolo vialua loku pesela olombongo viaye viosi oco a sakuiwe, pole, ka kuate uhayele. Omo liaco, uvei waye u “livokiya vali.”—Marko 5:26.

Ocili okuti uvei waco u honguisa etimba liaye kuenda u talisavo ohali haiwo u koka osõi. Ocitangi caco ka ca siatele oku vanguiwa powiñi. Ndomo Ocihandeleko ca Mose ci lekisa, ukãi o pita osonde, o tendiwa okuti wa vĩhĩsua. Nda omunu umue o lamba ketimba liaye ale kuwalo waye u kuete osonde, omunu waco o sukila oku yua kuenje o vĩhĩsua toke koñolosi.—Ovisila 15:25-27.

Ukãi waco wa “yeva esapulo liatiamẽla ku Yesu,” kuenje cilo u sandiliya. Omo liocitangi cuvei waye, o pita powiñi, lonjila yimue okuti ka limbukiwa lomanu. Eye o popia hati: “Nda nda lamba ño kuwalo waye, ñaya.” Eci ukãi a lamba kolunjenje wuwalo wa Yesu, vepuluvi liaco o limbuka okuti osonde ya liwekapo oku pita! Eye “wa sakuiwa kuvei waye.”—Marko 5:27-29.

Kuenje Yesu o pula hati: “Helie wa ndamba?” Nye ukãi a yeva vutima eci a yeva olondaka evi? Petulu o tambulula lolondaka vioku pisa Yesu poku popia hati: “Owiñi wa ku ñuala kuenda va kasi oku lisindila kokuove.” Oco hẽ, momo lie Yesu a pulila hati: “Helie wa ndamba?” Yesu o popia hati: “Umue wa ndamba, momo nda limbuka okuti unene wa nunda.” (Luka 8:45, 46) Ocili okuti, Yesu poku sakula ongusu yo tunda.

Eci ukãi a mola okuti Yesu wo limbuka, o luluma kuenje u kekamẽla omo liusumba. Omo liaco, o popia kovaso omanu vosi ocili catiamẽla kuvei waye kuenda o lombololavo okuti wa sakuiwa. Yesu lohenda yalua o lembeleka ukãi hati: “Amõlange, ekolelo liove lia ku kayisa. Kuende lombembua kuenda kaya kuvei wove, ku yevi vali evalo.”—Marko 5:34.

Ocili okuti, Una Suku a nõla oco a viale oluali ukuacisola, ukuahenda okuti ka sakalala lika lovitangi viomanu, pole, o kuetevo unene woku va kuatisa!