Skip to content

Skip to table of contents

Olombangi Via Yehova

Select language Umbundu

 OCIPAMA 60

Oku Pongoluiwa, Ocinjonde Cimue Culamba wa Kristu

Oku Pongoluiwa, Ocinjonde Cimue Culamba wa Kristu

MATEO 16:28–17:13 MARKO 9:1-13 LUKA 9:27-36

  • OCINJONDE COKU PONGOLUIWA

  • OVAPOSTOLO VA YEVA ONDAKA YA SUKU

Osimbu Yesu a kasi oku longisa omanu kolupale luo Kaisarea ka Filipu, okuti lu sangiwa vocinãla ci soka 25 kolokilometulu Lomunda Herimone, eye o popia cimue ci komõhisa olondonge viaye hati: “Ocili, ndu sapuili siti, kuli vamue va kasi palo okuti ka va moli oku fa, toke eci va mola tete Mõlomunu oku iyilila Vusoma waye.”—Mateo 16:28.

Citava okuti, olondonge via kala oku lipula eci olondaka via Yesu vi lomboloka. Noke yoku pita osemana yimosi, Yesu ambata ovapostolo vatatu okuti, Petulu, Tiago kuenda Yoano, oco va ende komunda yimue ya lepa. Citava okuti uteke ale, momo alume vaco vatatu va kasi lotulo. Osimbu Yesu a likutilila o pongoluiwa kovaso avo. Ovapostolo va mõla ocipala caye okuti ci nina ndekumbi, luwalo waye u yela calua kuenda u nina ndocinyi.

Kuenje alume vamue vavali, vana Embimbiliya li tukula okuti, “Mose kuenda Eliya,” va molẽha. Ovo va fetika oku sapela eci catiamẽla ‘kungende wa Yesu una a laika oku tẽlisa ko Yerusalãi.’ (Luka 9:30, 31) Ocili okuti, ungende waco u lomboloka oku fa kua Yesu kuenda epinduko liaye, vina a lombolola ndopo. (Mateo 16:21) Ombangulo yaco yi lekisa okuti ndaño Petulu wa lungula Yesu oco ovina viaco ka vi ka pite laye, pole, oku fa kua Yesu ka ku tatekiwa.

Omo okuti cilo olondonge vitatu vi pasuka, vi komõha omo lieci via mola kuenda eci va yeva. Ndaño okuti ovina viaco via kala ocinjonde, pole, vi molẽha ndu okuti vi kasi muẽle oku pita, kuenje Petulu o vetiyiwa oku popia hati: “A Rambei, kokuetu ciwa oku kala kulo. Nda citava tu tunga olosinge vitatu, yimue yove, yimue ya Mose, yikuavo ya Eliya.” (Marko 9:5) Anga hẽ Petulu o yongola oku tunga olosinge, oco ocinjonde camameko?

Osimbu Petulu a kasi oku vangula, elende limue li nina li va sitika kuenje velende mu tunda ondaka yiti: “U Omõlange wa soliwa, ndo sanjukila. U yeveleli.” Eci ovapostolo va yeva ondaka ya Suku va wila posi loku petamisa ovipala viavo kuenje va kuata usumba walua, pole, Yesu, o va sapuila hati: “Votoki. Ko ka kuati usumba.” (Mateo 17:5-7) Ovapostolo vatatu va votoka kuenje va mola lika Yesu, momo ocinjonde ca pua. Osimbu va kala oku loka komunda keteke likuavo komẽle, Yesu o va handeleka hati: “Ko ka sapuili umue ocinjonde eci, toke eci Mõlomunu a pinduiwa kolofa.”—Mateo 17:9.

Oku molẽha kua Eliya vocinjonde ku kokela atatahãi ovapostolo. Omo liaco, va pula vati: “Momo lie vakuavisonehua va popela vati Eliya eye iya tete?” Yesu o va kumbulula hati: “Eliya weya ale, puãi ovo ka vo limbukile.” (Mateo 17:10-12) Yesu o kasi loku popia eci catiamẽla ku Yoano Upapatisi, una wa tẽlisa ocikele ndeci ca Eliya. Eliya wa pongiya onjila ya Elisia kuenda Yoano wa pongiyavo onjila ya Kristu.

Ocinjonde eci ci pamisa Yesu kumue lolondonge viaye. Ovo va mola ndomo ulamba wa Kristu Vusoma waye u ka kala. Kuenje olondonge via mola “Mõlomunu oku iyilila Vusoma waye” ndeci Yesu a likuminya. (Mateo 16:28) Osimbu va kala komunda ovo va “imbila uvangi [wulamba waye].” Ndaño okuti va Fariseo va yonguile oku mola ondimbukiso yimue oco va tave okuti Yesu Osoma ya nõliwa la Suku, eye ka ecele ondimbukiso layimue. Pole, olondonge via Yesu via mola oku pongoluiwa kuaye kuenje via limbuka oku tẽlisiwa kuovitumasuku viatiamẽla Kusoma. Omo liaco, noke Petulu wa soneha hati: “Tu kuete ondaka yovaprofeto ya kolisua.”—2 Petulu 1:16-19.