Skip to content

Skip to table of contents

Olombangi Via Yehova

Select language Umbundu

 OCIPAMA 29

Citava hẽ okuti omunu o linga upange uwa Kesambata?

Citava hẽ okuti omunu o linga upange uwa Kesambata?

YOANO 5:1-16

  • YESU O KUNDILA VO YUDEA

  • EYE O SAKULA ULUME UMUE O VELA WA KALA POCIVA COVAVA

Yesu wa linga ovina vialua vokuenda kupange waye woku kunda vo Galilea. Pole, eci a popia hati, “te nda kundila olondaka viwa Viusoma wa Suku kalupale akuavo,” wa lekisa okuti, ka tiamisila lika utima waye koku kundila vo Galilea. Omo liaco, eye wa “kundila volosunangonga vio vo Yudea.” (Luka 4:43, 44) Eci ca sunguluka momo ya kala ale otembo yonjovo kuenda ocipito ko Yerusalãi ca kala ocipepi.

Poku sokisa ovina tu tanga viatiamẽla kupange wa Yesu woku kunda vo Galilea, tu limbuka okuti, Vavanjeliu mu sangiwa ovolandu atito kupange a linga vo Yudea. Ndaño okuti omanu vo Yudea ka va lekisa onjongole, pole, ka ci tateka Yesu oku kuata ombili kupange waye woku kunda, ale oku linga ovopange awa kovitumãlo viosi a sangiwa.

Ndopo Yesu o laika oku enda volupale lua velapo wo Yudea okuti, o Yerusalãi oco a kale kocipito co Paskoa yunyamo 31 K.K. Ocipepi lombundi Yolomeme, kuna ku sangiwa owiñi walua, pa kala ociva cimue covava ca kuata ovindumba ci tukuiwa hati, Betesaita. Omanu vana va vela, olomeke, kuenda ovilema va enda toke kociva caco. Momo lie? Momo va kolelele okuti, omunu o pondola oku kaya poku iñila vociva caco, eci ovava a tumõha.

Ca kala keteke Liesambata kuenje Yesu o mola ulume umue o kasi oku vela vokuenda kueci ci soka 38 kanyamo. Yesu u pula hati: “O yongola hẽ oku kaya?” Ulume o tambulula ndoco: “A Ñala, si kuete u o ñapa vociva eci ovava a tumõha; pole, osimbu ñasi oku enda, ukuavo o ndi pitila kovaso.”—Yoano 5:6, 7.

Yesu o popia ocina cimue ca komõhisa ulume kuenda omanu va ci yeva, eci a sapuila ulume hati: “Votoka! Tikula ociyalo cove, kuende.” (Yoano 5:8) Vepuluvi liaco, ulume haico a sakuiwa kuenje o tikula ociyalo caye, o fetika oku enda!

Va Yudea ka va sanjukila ocina ci komõhisa Yesu a linga. Kuenje eci va mola ulume waco vo pisa poku popia vati: “Etaili Esambata, ka ca sungulukile oku ambata ociyalo cove.” Ulume o va tambulula hati: “Ulume wa ndi sakula wa popia hati, ‘Tikula ociyalo cove, kuende.’” (Yoano 5:10, 11) Va Yudea vaco, va kasi oku pisa omunu umue o kasi oku sakula keteke Liesambata.

“Helie ulume wa ku sapuila hati, ‘Tikula ociyalo, kuende’?” ovo va yongola oku kũlĩha omunu waco. Momo lie va pulila ovina viaco kulume? Momo Yesu wa “tunda pokati kowiñi” kuenda ulume wa sakuiwa, ka kũlĩhĩle onduko ya Yesu. (Yoano 5:12, 13) Pole, ulume waco wa laikele oku li sanga vali la Yesu. Noke vonembele, ulume o li sanga la Yesu kuenje o limbuka okuti eye una wo sakula pociva.

Ulume wa sakuiwa o mola va Yudea vana vo pulile ndomo eye a sakuiwa. Ulume o va tambulula okuti, Yesu. Eci va Yudea va ci yeva, va enda toke ku Yesu. Anga hẽ va yongola muẽle oku kũlĩha ndomo Yesu a linga ovikomo viaco? Sio! Va Yudea va popia lãvi Yesu omo lioku linga upange waco Kesambata. Kuenje va fetika oku u lambalala.