Skip to content

Skip to table of contents

Olombangi Via Yehova

Select language Umbundu

 OCIPAMA 59

Mõlomunu Helie?

Mõlomunu Helie?

MATEO 16:13-27 MARKO 8:22-38 LUKA 9:18-26

  • YESU O SAKULA ULUME UMUE OMEKE

  • PETULU O TAMBULA OLOSAPI VIUSOMA

  • YESU O POPIA ECI CATIMẼLA KOKU FA KUENDA KEPINDUKO LIAYE

Yesu kumue lolondonge viaye va pitĩla ko Betesaita. Omo liaco, omanu va nena ulume umue omeke kuenje va pinga ku Yesu oco o lambe okuti o sakuiwa.

Yesu o kuata peka liulume omeke kuenje u wambata kosamua yolupale. Noke yoku siyila vovaso wulume omeke, Yesu o pula kokuaye hati: “O lete cimue?” Ulume o tambulula hati: “Ndete omanu, pole, va molẽha ndoviti vi kasi oku enda.” (Marko 8:23, 24) Yesu o kapa ovaka aye vovaso wulume kuenje o fetika oku vanja ciwa. Yesu o sapuila ulume waco oco a ende konjo kuenje u handeleka hati, ku ka iñile vimbo.

Noke Yesu kumue lolondonge viaye, va linga ungende woku enda konano yolupale luo Kaisarea ka Filipu. Owulu waco wa lepa okuti, u kuete 40 kolokilometulu. Imbo liaco, li sangiwa komunda yimue okuti, oku upisa kilu liaco citava oku mola omunda Hermone, ya sitikiwa locikokoto. Citava okuti, ungende waco wambata oloneke vivali.

Vepuluvi limue osimbu va linga ungende, Yesu o tunda pokati kavo oku ka likutilila pokolika. Eye wa sakalala lolondonge viaye, momo kua kamba lika olosãi ecea ale ekũi oco a pondiwe. Tunde eci omanu vamue va liwekapo oku kuama Yesu, pa pita ale otembo yimue kuenje omanu vakuavo va kasi latatahãi ale va sumua. Citava okuti va kasi oku lipula esunga lieci Yesu ka tavelele oku u lingisa osoma, ale esunga lieci ka lingila ondimbukiso yimue oco omanu vo limbuke nda eye elie.

Eci olondonge via enda pocitumãlo Yesu a kasi oku likutilila, eye o va pula hati: “Omanu va popia okuti Mõlomunu helie?” Olondonge vi kumbulula viti: “Vamue va popia vati, Yoano Upapatisi, vakuavo vati, Eliya, handi vakuavo vati, Yeremiya, ale umue uprofeto.” Omanu va sima okuti Yesu umue pokati kalume vaco okuti wa pinduiwa. Oco Yesu a kũlĩhe eci olondonge vi kasi oku sima, o vi pula hati: “Ene hẽ vu popia okuti ame elie?” Lonjanga yalua, Petulu o kumbulula hati: “Ove u Kristu Omõla a Suku o kasi lomuenyo.”—Mateo 16:13-16.

Yesu o popia okuti Petulu o pondola oku kuata esanju omo Suku o situluila ovina evi. Kuenje o popiavo hati: “Ove u Petulu, pohanda eyi nungilapo ekongelo liange kuenje ka li ka yuliwa lolombundi Vieyambo.” Yesu o lekisa okuti, eye muẽle o tunga ekongelo kuenda nda omanu vaco vamamako oku lekisa ekolelo palo posi, ndaño Eyambo ka li va tateka. Eye o likuminya Petulu hati: “Ndu ku ĩha olosapi Viusoma wo kilu.”—Mateo 16:18, 19.

Yesu ka ecele ku Petulu ocikele ca velapo pokati kovapostolo vosi, ale oku u lingisa ociseveto cekongelo. Yesu eye muẽle Ewe kuna ku ka sevetiwa ekongelo liaye. (1 Va Korindo 3:11; Va Efeso 2:20) Pole, Petulu o tambula olosapi vitatu kuenda o ka kuata esumũlũho lioku kuatisa omanu vakuavo oco va iñile Vusoma wo kilu.

 Petulu o laika oku talavaya losapi yatete ko Pendekoste yunyamo 33 K.K., oco a lekise ku va Yudea va likekembela kuenda kolomongoloke ovina va sukila oku linga oco va popeliwe. Eye o ka talavaya losapi yavali oco a ece ku va Samaria epuluvi lioku iñila Vusoma wa Suku. Kuenje kunyamo 36 K.K., Petulu o ka talavaya losapi yatatu oco a ecevo epuluvi ku Vakualofeka vana ka va seviwile evamba okuti omanu vatete, Korneliu, epata liaye kuenda akamba vaye.—Ovilinga 2:37, 38; 8:14-17; 10:44-48.

Vokuenda kuombangulo, olondonge via Yesu vi sakalala eci a va sapuila ohali kuenda olofa a laika oku pita lavio ko Yerusalãi. Omo okuti ovo ka va kuete elomboloko liokuti o pinduiwa oco a ende kilu, Petulu enda laye ponele kuenje o lemela Yesu poku u sapuila hati: “A Ñala, likuatela ohenda, eci ka ci ka pita love.” Pole, Yesu u wimba onyima, kuenje u sapuila hati: ‘Pita konyima yange, a Satana! O kasi oku ñapela ocilondokua, momo ku kuete ovisimĩlo via Suku, pole, viomanu.’—Mateo 16:22, 23.

Yesu cilo o kovonga omanu vakuavo kuenje o va sapuila okuti, ka ci ka leluka kokuavo oku u kuama. Eye o va sapuila hati: “Nda umue o yongola oku ñuama, ka ka lisokolole vali eye muẽle, a tikule uti waye wekangiso kuenje a ñuame. Momo wosi o yongola oku popela omuenyo waye, o u pesela, puãi wosi o pesela omuenyo waye vonduko yange kuenda omo liolondaka viwa, o u popela.”—Marko 8:34, 35.

Oco olondonge vi sesamẽle oku taviwa la Yesu, vi sukila oku lekisa utõi kuenda oku lieca olumue. Yesu o vi sapuila hati: “Wosi o ñuetele osõi ame kuenda ondaka yange vocitumbulukila cilo ca vĩha haico vakahokolo, Mõlomunu u kuatelavo osõi eci eyilila vulamba wa Isiaye kumue lovangelo va kola.” (Marko 8:38) Omo liaco, eci Yesu a keya, o ka “eca onima komunu lomunu ndeci ci likuata lovilinga viaye.”—Mateo 16:27.