Skip to content

Skip to table of contents

Olombangi Via Yehova

Select language Umbundu

 OCIPAMA 63

Yesu Eca Elungulo Liatiamẽla Kocilondokua Kuenda Kekandu

Yesu Eca Elungulo Liatiamẽla Kocilondokua Kuenda Kekandu

MATEO 18:6-20 MARKO 9:38-50 LUKA 9:49, 50

  • ELUNGULO LIATIAMẼLA KOCILONDOKUA

  • CECI MANJI UMUE A LINGA EKANDU

Yesu o mala oku linga ocindekaise cimue oco a lekise kolondonge viaye ovisimĩlo va sukila oku kuata. Ovo va sukila oku litenda ndomãla okuti, ambombe kuenda ka va livelisapo. Olondonge vi sukila oku ‘yekisa omãla ndava vonduko yaye, kuenda oku yekisavo Yesu.’—Mateo 18:5.

Ka pa pitile otembo yalua tunde eci ovapostolo va lihoyisa pokati nda helie wa velapo. Omo liaco, ovo va sima okuti Yesu o kasi oku va pisa. Cilo upostolo Yoano o lombolola ocina cimue ca pita ndopo poku popia hati: “Tua mola ulume umue wa kala oku tundisa olondele vonduko yove kuenda tua yonguile oku u tateka, momo ka endaenda letu.”—Luka 9:49.

Anga hẽ Yoano wo sima okuti ovapostolo ovo lika va tambula omoko yoku sakula omanu loku tundisa olondele? Nda okuti ovapostolo ovo lika va kuete omoko yoku ci linga, momo lie ulume u Yudea a tẽlela oku tundisa olondele? Citava okuti Yoano o kasi oku sima okuti ulume waco ka kuete omoko yoku linga ovonene a komõhisa, momo ka kasi oku kuama Yesu kumue lovapostolo vaye.

Yoano o komõha eci Yesu a popia hati: “Ku ko tateki, momo ka kuli omunu o linga ovilimbu vonduko yange okuti o popia cĩvi catiamẽla kokuange. Momo wosi ka tamalala letu, o kasi letu. Wosi eca kuava va sule okopo yovava a talala omo a tiamẽla ku Kristu, ndu sapuili siti, eye ka ka pumba onima yaye.”—Marko 9:39-41.

Omo liaco, ulume ka sukila oku kuama Kristu oco a kale konele ya Yesu. Ekongelo Liakristão lia laikele oku tumbikiwa. Ndaño ulume waco ka kasi oku linga ungende la Yesu, pole, eci ka ci lomboloka okuti ulume waco unyãli ale o kasi oku vetiya etavo liesanda. Ocili okuti, eye o kuete ekolelo vonduko ya Yesu kuenda eci Yesu a popia ci lekisa okuti ulume ka pumbi onima yaye.

Handi vali, nda ca koka ovitangi vialua nda olondaka lovilinga viovapostolo via kokelele ocilondokua kulume waco. Yesu o popia hati: “Una o kapela ocilondokua umue pokati kava vatito okuti va ñolela, hĩse nda o kapiwa ewe liombambo posingo yaye lina li ñualisiwa locimbulu, loku imbiwa vokalunga.” (Marko 9:42) Kuenje Yesu o popia okuti, olondonge viaye vi sukila oku teta vetimba liavo ovimatamata vimue vi kuete esilivilo okuti vi va kokela ocilondokua ndeci, eka, omãhi, ale iso. Ca velapo oku iñila Vusoma wa Suku lulema, pole, oku kala letimba liosi okuti noke limbiwa Vongehena (Ocimbota ca Hinomi) hacoko. Citava okuti, ovapostolo va kũlĩhĩle ale ocimbota caco ca kala ocipepi lo Yerusalãi, kuna va enda oku timĩhila ovinene. Omo liaco, ovo va kuatele elomboloko liokuti ocimbota caco ca lomboloka oku nyõliwa elisi.

Yesu o lungulavo hati: “Lunguki oco ka vu ka sepuli umue pokati kava vatito, ndu sapuili siti, ovangelo vavo kilu otembo yosi va mola ocipala ca Isiange o kasi kilu.” Omanu vaco “vatito”  va kuete esilivilo lie ku Isiaye? Yesu o popia eci catiamẽla kulume umue o kuete 100 kolomeme okuti pa nyelela yimosi. Ulume waco, o sia 99 kolomeme kuenda o ka sandiliya yimosi ya nyelela, kuenje eci a yi sanga o yi sanjukila vali okuti 99 kolomeme ka via nyelile ci sule. Yesu o popia hati: “Cimuamue haico okuti Isiange o kasi kilu ka sanjuka eci pokati kava vatito pa nyelela umue.”—Mateo 18:10, 14.

Citava okuti, eci Yesu a sokolola eci catiamẽla koku lihoya kuovapostolo nda helie pokati kavo wa laikele oku velapo, eye o va lungula hati: “Kali lomongua vokati kene, loku likuatela ombembua pokati.” (Marko 9:50) Omongua u pepisa ovikulia. Omongua wocindekaise u kuatisa omunu oku tava eci omunu ukuavo a popia kuenda u pondola oku kuatisa oku kuata ombembua. Ovina viaco ka vi tẽliwa loku lihoyisa.—Va Kolosai 4:6.

Citava okuti ku molẽha ovitangi vinene, pole, Yesu o va sapuila ndomo ku tetuluiwa ovitangi viaco poku popia hati: “Nda manjove wa linga ekandu limue, vangula laye catiamẽla kekandu liaco. Nda wa ku yeva, wa kuatisa manjove.” Pole, nda ka ku yevele, Yesu wa popia hati: “Ambata omunu umosi ale vavali, okuti vuvangi wolombangi vivali ale vitatu ovitangi viosi vi potoluiwa.” Nda eye ka va yevele, “ci sapuila ekongelo” ale kakulu vekongelo vana va kuete ocikele coku potolola ocitangi caco. Omunu wa linga ekandu nda ka yongola oku yevelela? “U tenda ndukualofeka ale ndukuakutambula elisimu,” okuti omanu vana va Yudea ka va ponduile oku kuata ukamba lavo.—Mateo 18:15-17.

Akulu vekongelo va sukila oku kapako olonumbi vi sangiwa Vondaka ya Suku. Nda ovo va limbuka okuti omunu wa linga ekandu o kuete eko kuenje o sukila oku pindisiwa, esombiso liavo ‘lia kutiwila ale kilu.’ Pole, nda va limbuka okuti omunu waco ka kuete eko, esombiso liaco lia ‘kutuluiwa ale kilu.’ Olonumbi via Yesu vi ka kuatisa eci ekongelo Liakristão li tumbikiwa. Eci ku molẽha ovitangi vinene ndevi via tukuiwa, Yesu o popia hati: “Apa pa liongoluila vavali ale vatatu vonduko yange, ñala pokati kavo.”—Mateo 18:18-20.