Skip to content

Skip to table of contents

Olombangi Via Yehova

Select language Umbundu

 OCIPAMA 98

Olondonge Vi Sanda Vali Oku Livelisapo

Olondonge Vi Sanda Vali Oku Livelisapo

MATEO 20:17-28 MARKO 10:32-45 LUKA 18:31-34

  • YESU O TUKULA VALI OLOFA VIAYE

  • NDOMO EYE A TENDA OCITUWA COVAPOSTOLO COKU LIVELISAPO

Yesu kumue lolondonge viaye va kasi oku tunda vo Perea, oku suñamela kombuelo yo Yerusalãi. Eci va panda koku pitĩla, va yoka Olui Yordão, ocipepi lo Yeriko. Omanu vakuavo va va kuama oco va ende ko Paskoa yunyamo 33 K.K.

Yesu o pita kovaso yolondonge, momo o yongola oku pitĩla selo volupale oco a ende ko Paskoa. Pole, olondonge vi kasi lusumba. Onjanja yimue ya pita, eci Lasaru a fa, Yesu wa kala oku tunda ko Perea oku loña ko Yudea kuenje Tomasi wa sapuila olondonge vikuavo hati: “Tu endivo, oco tu file kumue laye.” (Yoano 11:16, 47-53) Omo okuti ungende woku enda ko Yerusalãi wa kala wohele, tu pondola oku kuata elomboloko lieci olondonge vi kasilili lusumba.

Oco Yesu a pongiye olondonge viaye kovina vi laika oku iya kovaso, o vi kovonga pokolika kuenje o vi sapuila hati: “Tu kasi oku enda ko Yerusalãi, Mõlomunu ambatiwa kovitunda via velapo kuenda ku vakuavisonehua. Kuenje va ko pisila oku fa, kuenda va ko weca ku vakualofeka oco a sepuiwe loku talisiwa ohali, o pondiwila kuti; kuenje keteke liatatu o pinduiwa.”—Mateo 20:18, 19.

Eyi onjanja yatatu Yesu a sapuila olondonge viaye catiamẽla kolofa kuenda kepinduko liaye. (Mateo 16:21; 17:22, 23) Pole, onjanja eyi o popia okuti o fila kuti. Ovo va yevelela Yesu, pole, ka va kuata elomboloko liolondaka viaye. Pamue va sima okuti, usoma wo Isareli u tumbikiwa kilu lieve kuenje va yongola oku kuata ulamba kuenda ekemãlo kumue la Kristu palo posi.

Ina yovapostolo Tiago kuenda Yoano okuti pamue onduko yaye Salome, o kasi pokati kava va lingila kumosi ungende. Yesu wa luka ovapostolo vaco vavali onduko yimue yi lomboloka okuti, ‘Omãla Vocindindimo,’ omo liosiata  yavo. (Marko 3:17; Luka 9:54) Ovo va fetika ale osimbu oku lekisa ocituwa caco coku livelisapo Vusoma wa Kristu. Ina yavo wa ci kũlĩhavo. Eye amela ocipepi la Yesu, u kekamẽla kuenje o pingilako omãla vaye. Yesu u pulisa hati: “Nye o yongola?” Ukãi o tambulula hati: “Tuma okuti omãla vange vavali va tumãla umue konele yondio yove ukuavo konele yepĩli Vusoma wove.”—Mateo 20:20, 21.

Epingilo liaco lia tunda muẽle ku Tiago la Yoano. Yesu ndopo a mala oku lombolola osõi kuenda esepu a laikele oku pita lavio. Omo liaco, o va sapuila hati: “Ka wa kũlĩhĩli eci vu kasi oku pinga. Vu pondola hẽ oku nyua okopo ame ndi laika oku nyua?” Vo tambulula vati: “Tu pondola.” (Mateo 20:22) Citava okuti ka va kuete elomboloko liolondaka viaco.

Pole, ndaño ndoco, Yesu o va sapuila hati: “Vu ka nyua okopo yange, pole, si kuete omoko yoku tuma omunu oku tumãla kondio yange ale kepĩli liange, pole, eci ca sokiyiwila vana Isiange a pongiya.”—Mateo 20:23.

Ovapostolo vakuavo ekũi poku limbuka eci Tiago la Yoano va pinga, va tema calua. Anga hẽ Tiago la Yoano ovo va lekisa vali onjongole yoku livelisapo eci ovapostolo va lihoya onjanja yatete nda helie pokati kavo wa velelepo? (Luka 9:46-48) Ka tua ci kũlĩhĩle, pole, epingilo eli lia sulako, li lekisa okuti ovapostolo handi ka va kaile oku kapako elungulo lia Yesu lioku likapa kutito. Ovo handi va kuete ocituwa coku livelisapo.

Yesu o nõlapo oku vangula catiamẽla kondaka yaco kuenda esumuo liyilila kelinga liaco. Eye o vilikiya ekũi lavali kolondonge kuenje locisola o va lungula hati: “Ene wa kũlĩhi okuti vana va sima oku kala olombiali viofeka vi viala pokati kavo kuenda omanu va kemãla va kuete unene pokati kavo. Puãi eci hacoko ci pita pokati kene, pole, wosi o yongola oku kala unene pokati kene, a linge ukuenje wene, kuenda wosi o yongola oku linga omunu watete pokati kene, a linge upika wa vosi.”—Marko 10:42-44.

Kuenje Yesu o va sapuila ongangu va sukila oku kuama poku popia hati: “Mõlomunu keyilile oku vumbiwa, te oku vumba loku eca omuenyo waye ndocisembi coku yovola omanu valua.” (Mateo 20:28) Pa pita ale anyamo atatu tunde eci Yesu a fetika oku vumba vakuavo. Eye o laika oku ci linga poku fila omanu vosi! Olondonge vi sukila oku lekisa ocituwa ndeci ca Kristu coku vumba vakuavo okuti, oku vumbiwa hacoko kuenda oku likapa kutito, okuti ka va livelisapo.