Skip to content

Skip to table of contents

Olombangi Via Yehova

Select language Umbundu

 OCIPAMA 97

Olusapo Luolonalavayi Vocumbo Cayuva

Olusapo Luolonalavayi Vocumbo Cayuva

MATEO 20:1-16

  • OLONALAVAYI VIA “SULAKO” VOCUMBO CAYUVA OVIO VI “LIVANGA”

Yesu o mala oku sapuila olonjeveleli viaye ko Perea okuti, “valua va livanga, ovo va ka sulako kuenda vana va sulako, ovo va livanga.” (Mateo 19:30) Eye o lombolola ondaka yaco poku ta olusapo luolonalavayi viocumbo cayuva.

Yesu o popia hati: “Usoma wo kilu u sokisiwa la muẽleanjo wa tunda omẽle oku sandiliya olonalavayi oco vi talavaye vocumbo caye cayuva. Noke yoku likunda lolonalavayi okuti vi tambula odenariu yimosi veteke, wa va tuma vocumbo caye cayuva. Kuenje wa tundavo kowola yatatu, yu wa mola vakuavo vatãi pocitanda okuti ka va kuete upange; eye wa va sapuila hati, ‘Kuendivo vocumbo cayuva kuenda ndu wĩhi ofeto ya sunguluka.’ Noke ovo va enda. Eye wa tunda vali kowola yepandu lo kowola yecea kuenda cimuamue haico a linga. Oku sulako kowola 11, wa tunda kuenje wa sanga vakuavo vatãi, yu wa va sapuila hati, ‘Momo lie vu tãilili palo eteke liosi okuti ka vu kuete upange?’ Ovo va tambulula hati, ‘Momo lomue wa tu laleka.’ Eye wa va sapuila hati, ‘Kuendivo vocumbo cayuva.’”—Mateo 20:1-7.

Citava okuti eci Yesu a popia catiamẽla ‘Kusoma wo kilu’ kuenda “muẽleanjo,” olonjeveleli vi sokolola Yehova Suku. Ovisonehua vi tukula Yehova okuti eye muẽleacumbo cayuva okuti, ci lomboloka epata lia va Isareli. (Osamo 80:8, 9; Isaya 5:3, 4) Vana va kasi vemẽhi liocisila Cocihandeleko, va sokisiwa lolonalavayi viocumbo cayuva. Yesu ka kasi oku ta olusapo luocina cimue ca pita ale. Eye o lombolola ovina vimue vi kasi oku pita koloneke viaye.

Ndeci va Fariseo vana va nyika ndopo Yesu catiamẽla koku linyãla, asongui vetavo va molẽha ndu okuti, olonjanja viosi va kasi oku talavaya kupange wa Suku. Ovo va kasi ndolonalavayi vi talavaya eteke liosi kuenda va lavoka oku tambula odenariu yimosi okuti ofeto yeteke liosi.

Ovitunda kuenda vakuavo, va tenda va Yudea vaño ndu okuti, ka va kasi oku vumba Suku lutima wosi kuenda va sokisiwa la vana va talavaya otembo yitito vocumbo cayuva. Volusapo olu, alume vaco ovo va lalekiwa “kowola yatatu” (kowola 9 komẽle) ale noke okuti, kowola yepandu, yecea kuenda kowola yekũi lamosi (kowola 5 kekumbi).

Vana va kuama Yesu va tendiwa ‘ndomanu va siñaliwa.’ (Yoano 7:49) Ovo va siata oku linga upange woku pipa olõsi kuenda ovopange akuavo vomuenyo wavo wosi. Kuenje kunyamo 29 K.K., kosãi ya Mbalavipembe, “muẽleacumbo cayuva” o tuma Yesu oku kovonga omanu ava ambombe oco va talavayele Suku ndolondonge via Kristu. Ovo, va linga omanu va “sulako,” vana Yesu a tukula okuti, olonalavayi viocumbo cayuva viowola yekũi lamosi.

Poku malusula olusapo, Yesu o lombolola eci ci pita kesulilo lieteke hati: “Eci ca linga oñolosi, muẽleacumbo cayuva wa sapuila kalei kaye hati, ‘Vilikiya olonalavayi, eca ofeto yavo, fetikila kuava va sulako toke kuava vatete.’ Eci vana va lalekiwa kowola yekũi lamosi veya, omunu lomunu wa tambula odenariu yimosi. Eci watete eya, ovo va sima okuti va ka tambula olombongo vialua, pole, ofeto yavo ya kalavo odenariu yimosi. Poku yi tambula va fetika oku ñuñunila muẽleanjo, vati, ‘Ava va sulako va talavaya lika owola yimosi; o kasi oku va ĩhavo ofeto yimuamue ndetu tua talavaya vemẽhi liutanya eteke liosi!’ Pole, eye wa tambulula umue pokati kavo hati, ‘Okuetu, ndi cĩ okuti o kuete esunga. Siti tua likunda oco o tambule odenariu yimosi? Tambula ofeto yove kuende. Ndi yongola oku eca ku wa sulako ofeto yimuamue ndeyi yove. Si kuete hẽ omoko yoku linga eci nda panga lovina viange? Ale iso liove li kuete ocipululu omo ndimunu umue uwa?’ Omo liaco, ava va livanga, ovo va sulako kuenda ava va sulako, ovo va livanga.”—Mateo 20:8-16.

Citava okuti olondonge vi lipula elomboloko lionepa ya sulako yolusapo lua Yesu. Asongui vetavo lia va Yudea  vana va sima okuti ovo “va livanga,” veya oku kala ndati va “sulako”? Olondonge via Yesu via linga ndati vana “va livanga”?

Olondonge via Yesu vina va Fariseo kuenda vakuavo va tenda okuti “va sulako,” ovo “va livanga,” momo va ka tambula ofeto ya suapo. Lolofa via Yesu, o Yerusalãi yo posi ka yi ka taviwa kuenje Suku o ka nõla ofeka yokaliye okuti, o “Isareli ya Suku.” (Va Galatia 6:16; Mateo 23:38) Yoano Upapatisi wa tukuile vana va laikele oku panga onepa ko Isareli ya Suku eci a popia catiamẽla koku papatisiwa lespiritu sandu kovaso yoloneke. Vana “va sulako,” ovo va ka tambula tete epapatiso liaco kuenda esumũlũho lioku kala olombangi via Yesu “toke kasukiyo o kilu lieve.” (Ovilinga 1:5, 8; Mateo 3:11) Omo lielomboloko olondonge via kuata liepongoloko linene Yesu a kasi oku vangula, citava okuti ovio vi sokolola kelambalalo lia piãla va ka liyaka lalio li tunda kasongui vetavo okuti, vana “va sulako.”