Skip to content

Skip to table of contents

Olombangi Via Yehova

Select language Umbundu

 OCIPAMA 88

Epongoloko Kekalo Liulume Ohuasi Kuenda Lasaru

Epongoloko Kekalo Liulume Ohuasi Kuenda Lasaru

LUKA 16:14-31

  • OLUSAPO LULUME OHUASI KUENDA LUA LASARU

Yesu eca alungulo awa kolondonge viaye atiamẽla koku talavaya lovokuasi. Pole, olondonge havioko lika vi kasi oku yevelela. Va Fariseo haipo va kasivo kuenje va sukilile oku kapako elungulo liaco. Momo lie? Momo ovo “va solele olombongo.” Poku yeva ovina Yesu a kasi oku popia, va fetika ‘oku u sepula.’—Luka 15:2; 16:13, 14.

Pole, Yesu ka va kuatela usumba. Eye o va sapuila hati: “Ene vu li lekisa kovaso omanu okuti wakuesunga, pole Suku wa kũlĩha ovitima viene. Momo eci ci sivayiwa lomanu, kovaso a Suku umbondo.”—Luka 16:15.

Vokuenda kuotembo yalua va Fariseo va siata oku “sivayiwa lomanu,” pole, kua pitĩla otembo yepongoloko linene kekalo liavo. Omanu vana va kemãla okuti olohuasi, omo lioku kuata ovipako vialua, unene kopulitika kuenda ekemãlo vetavo, va ka kunduiwa. Pole, omanu vaño okuti, va limbuka esukila liavo konepa yespiritu, va ka kapiwa kunene. Yesu o lekisa okuti ku kasi oku pita epongoloko limue linene.

Eye o popia hati: “Ocihandeleko kuenda Ovaprofeto via imba owanji toke ku Yoano. Tunde opo olondaka viwa Viusoma wa Suku vi kasi oku kundiwa kuenje omanu vosi va likolisila oku iñilamo. Omo liaco, ci leluka ilu losi oku pita, pole, okatosi kamue Kocihandeleko ca tĩla okuti ka ci tẽlisiwa.” (Luka 3:18; 16:16, 17)Olondaka evi vi lekisa ndati okuti ku kasi oku pita epongoloko limue?

Asongui vetavo va Yudea va vangula lepela lialua okuti, va kuãi Ocihandeleko ca Mose. Ivaluka okuti, eci Yesu a sakula ulume umue omeke ko Yerusalãi, va Fariseo lepela va popia vati: “Etu tulondonge via Mose. Tua kũlĩha okuti Suku o vanguila vonduko ya Mose.” (Yoano 9:13, 28, 29) Cimue pokati kocimãho Cocihandeleko ca eciwile ku Mose, oku songuila ambombe toke ku Mesiya okuti, Yesu. Yoano Upapatisi wa tukula Yesu okuti, Kameme ka Suku. (Yoano 1:29-34) Tunde kupange wa Yoano woku kunda, va Yudea ambombe, ca piãla enene olohukũi, va siata oku yeva catiamẽla ‘Kusoma wa Suku.’ Ocili okuti, kuli “olondaka viwa” komanu vosi va yongola oku kala olonungi Viusoma wa Suku kuenda oku kuatisiwa lawo.

Ocihandeleko ca eciwile ku Mose camamako oku tẽlisiwa. Pole, ocihandeleko caco ca enda toke ku Mesiya. Noke omanu ka va ka sukila vali oku ci kuama. Ndeci, Ocihandeleko ca enda oku ecelela okuti ulume o li nyãla lukãi waye lolonjila via litepa. Pole, Yesu o lombolola okuti, “wosi o nyãla ukãi waye kuenje o kuela ukãi ukuavo, o linga ukahokolo, lu o kuela ukãi wa nyãliwa lulume, o linga ukahokolo.” (Luka 16:18) Sokolola ndomo olondaka evi vi temisa va Fariseo, vana va sole oku luvikiya oviholo kovina viosi!

Noke Yesu o ta olusapo lumue lu kuete esilivilo, lu lekisa epongoloko li kasi oku pita. Eye o tukula alume vavali kuenda epongoloko  li komõhisa li kasi oku pita kekalo liavo. Poku kũlĩhĩsa olusapo ulo, limbuka okuti pokati kolonjeveleli pa sangiwavo va Fariseo vana va sole olombongo haivo va tendiwa lomanu okuti va velapo calua.

Yesu o popia hati: “Kua kala ulume umue ohuasi wa enda oku wala onanga yohusu lovalatanya kuenda eteke leteke wa lia lia elau. Pole umue ukuakupinga osimola o tukuiwa Lasaru haeye wa kuatele apute, wa enda oku kala pombundi yaye, loku livela olosisi via loluka komesa yulume ohuasi. Ndaño olombua, via enda oku lesa apute aye.”—Luka 16:19-21.

Omo okuti va Fariseo va sole olombongo, anga hẽ kuli atatahãi yu o lomboloka ‘ulume ohuasi’ Yesu a tukula volusapo? Asongui vaco vetavo lia va Yudea va solevo oku wala uwalo wa tĩla haiwo wa kemãla. Handi vali, ovo olohuasi konepa yespiritu omo va kuete ovikele vialua kuenda epondolo lioku vumba Suku haivo vambata omuenyo umue ndu okuti olohuasi. Omo liaco, olusapo lulume wa wala onanga yohusu lu lomboloka ekalo liwa va Fariseo va kuete kuenda ovalatanya yi lomboloka epela liavo.—Daniele 5:7.

Asongui vaco olohuasi kuenda vakuepela va tenda ndati omanu vaño haivo olohukũi? Ovo va sepula omanu vaco loku va tukula okuti ‛am  ha·’aʹrets, ale omanu vofeka (vo posi), vana okuti ka va kũlĩhĩle Ocihandeleko haivo ka va sesamẽla oku ci va longisa. (Yoano 7:49) Eci ci sokisiwa lekalo ‘liukuakupinga osimola o tukuiwa Lasaru’ o kasi lonjala yalua okuti, o “livela olosisi via loluka komesa yulume ohuasi.” Ndeci Lasaru eyuka apute alua, omanu vaño va sepuiwa ndu okuti va vela konepa yespiritu.

Ocitangi caco ci kasiko ale osimbu yalua, pole, Yesu wa kũlĩha okuti, kua pitĩla otembo yepongoloko linene kekalo liomanu va sokisiwa lulume ohuasi kuenda yava va sokisiwa la Lasaru.

YA PITĨLAPO OTEMBO YEPONGOLOKO

Cilo Yesu o lombolola epongoloko linene kekalo liavo poku popia hati: “Noke ukuakupinga osimola wa fa kuenje ovangelo vo wambata ponele ya Avirahama. Ulume ohuasi layevo wa fa kuenda wa kendiwa. Kuenje ohuasi eci ya kala oku yambuiwa Veyambo, ya petula ovaso, yu ya muila Avirahama ocipãla kuenda Lasaru wa kala ponele yaye.”—Luka 16:22, 23.

Omanu va kala oku yevelela Yesu va kũlĩhĩle okuti Avirahama wa fa ale osimbu kuenda o kasi Veyambo. Ovisonehua vi lekisa okuti, lomue o kasi Veyambo oku kongelamo Avirahama, o pondola oku vanja ale oku vangula. (Ukundi 9:5, 10) Oco hẽ, nye asongui vetavo va kasi oku sima kueci ci lomboloka olusapo lua Yesu? Nye eye a kasi oku lekisa catiamẽla komanu vaño kuenda kasongui vetavo va sole olombongo?

Yesu o lombolola okuti kua pita epongoloko limue poku popia okuti, ‘Ocihandeleko kuenda Ovaprofeto via imba owanji toke ku Yoano Upapatisi, tunde opo olondaka viwa Viusoma wa Suku vi kasi oku kundiwa.’ Kuenje omo lioku kunda kua Yoano kuenda Yesu Kristu, Lasaru kuenda ulume ohuasi va fa kekalo liatete kuenje va kuata ovikele viokaliye kovaso a Suku.

Ambombe ale olohukũi konepa yespiritu olosuke. Pole, va kasi oku kuatisiwa kuenda va tava kesapulo Liusoma lia kundiwa tete la Yoano Upapatisi kuenda noke la Yesu. Kosimbu va enda oku sanjukila ‘olosisi konepa yespiritu via loluka komesa’ yalongisi vetavo. Cilo va kasi oku tekuiwa lalongiso a velapo ocili Cembimbiliya, ca piãla enene lovina vi komõhisa Yesu a kasi oku lombolola. Ci kasi ndu okuti kaliye va tambula ocikele cimue ca velapo kovaso a Yehova Suku.

Pole, asongui vetavo okuti, olohuasi haivo va kemãla, va likala oku tava esapulo Liusoma lina lia kundiwa la Yoano okuti, hailio Yesu a kasi oku kunda kolonepa viosi viocikanjo. (Mateo 3:1, 2; 4:17) Ovo va fungula omo liesapulo liatiamẽla kesombiso lia Suku li laika oku iya. (Mateo 3:7-12) Kasongui vetavo vana va sole olombongo,  nda ca kala ndekavuluko nda Yesu kumue lolondonge va liwekelepo oku kunda esapulo lia Suku. Asongui vaco va sokisiwa lulume ohuasi wa tukuiwa volusapo o popia hati: “A Tate Avirahama, ñuatele ohenda kuenda tuma Lasaru oku nyava osungu yomuine waye vovava oco a talalise elimi liange, momo ñasi oku tala ohali vondalu eyi.’’—Luka 16:24.

Pole, eci ka ci tẽlisiwa. Onepa yalua yasongui vetavo ka va ka pongoloka. Momo ovo va likala oku ‘yeva Mose lovaprofeto’ okuti, ovina ovo va soneha nda via va vetiya oku tava Yesu, Mesiya ya Suku haeye Soma. (Luka 16:29, 31; Va Galatia 3:24) Ka va liketisa kuenda ka va vetiyiwa lolohukũi via tava Yesu okuti, cilo va sanga ohenda ya Suku. Handi vali, olondonge via Yesu ka vi pondola oku pengisa ocili oco vi sanjuise asongui vetavo ale oku va lembeleka pamue oku va kavuluisa. Olusapo Yesu a ta, o situlula ciwa ocili colondaka viaco poku tukula ulume ohuasi hati: “Tate Avirahama.”

Eye o popia hati: “Amõlange, ivaluka okuti ove wa kuatele omuenyo welau, pole Lasaru wa tambula ovina vĩvi. Cilo eye kulo wo lembelekiwa osimbu ove o kasi oku tala ohali. Handi vali, pokati ketu lene vumanu pali ekungu limue okuti vana va yongola oku tunda kulo oku enda kokuene ka va ci tẽla kuenda omanu va kasi oko, ka veya kokuetu.”—Luka 16:25, 26.

Ca sunguluka okuti ku kala epongoloko liaco! Olio li lomboloka oku pongoluiwa ovikele pokati kasongui vetavo vakuepela kuenda ambombe vana va tava okanga ya Yesu kuenje va kavuluisiwa loku tekuiwa konepa yespiritu. (Mateo 11:28-30) Epongoloko liaco, li ka limbukiwa vali ciwa noke liolosãi vimue eci ocisila Cocihandeleko ci piñainyiwa locisila cokaliye. (Yeremiya 31:31-33; Va Kolosai 2:14; Va Heveru 8:7-13) Eci Suku a ka eca espiritu liaye ko Pendekoste yunyamo 33 K.K., ci ka limbukiwa okuti va Fariseo kuenda oloñuatisi viavo vietavo ka va ka taviwa, osimbu okuti olondonge via Yesu vi ka taviwa la Suku.