Skip to content

Skip to table of contents

Olombangi Via Yehova

Select language Umbundu

 OCIPAMA 87

Esilivilo Lioku Lekisa Olondunge

Esilivilo Lioku Lekisa Olondunge

LUKA 16:1-13

  • OLUSAPO LUA KALEI KA SUNGULUKILE

  • “LINGI AKAMBA” LOVOKUASI ENE

Olusapo Yesu a mala oku ta, luatiamẽla komõla wa nyelile, lu situlula ciwa ku vakuakutambula elisimo, ku vakuavisonehua kuenda ku va Fariseo oku limbuka okuti, Suku o kuete onjongole yoku ecela vakuakandu va likekembela. (Luka 15:1-7, 11) Cilo Yesu o vangula lolondonge viaye poku ta olusapo lumue luatiamẽla kulume umue ohuasi, wa limbuka okuti kalei konjo yaye ka kasi oku lekisa ovituwa via sunguluka.

Yesu o lombolola okuti kalei o kasi oku lundiliwa okuti o kasi oku talavaya lãvi lovokuasi a cime caye. Kuenje cime o sapuila kalei okuti o tundisiwa. Kalei o lipula hati: “Nye ndi linga, omo okuti cime cange o njupa ocikele cukalei? Si kuete olohõlo vioku [lima,] haime ñuete osõi yoku pinga osimola.” Poku lipongiyila ovina vi laika oku pita laye o popia hati: “Nda kũlĩha ale eci ndi linga, eci va njupa ocikele cukalei, omanu va ka nambula kolonjo viavo.” Lonjanga eye o vilikiya omunu lomunu wa levala, loku u pula hati: “Ciñami wa levala cime cange?’’—Luka 16:3-5.

Watete o tambulula hati: ‘Ocita kolonjongo viulela.’ Ci lomboloka okuti 2.200 kalitulu ulela. Citava okuti ukuakulevala, ondandisi yulela wasetona ale o kuete epia liasetona. Kalei u sapuila hati: ‘Kuata ukanda wove wuvangi, tumãla, sonehamo lonjanga 50 [1.100 kalitulu].’’—Luka 16:6.

Kalei o pula ukuavo wa levalavo hati: “Ove hẽ, ciñami wa levala?’ Eye o tambulula hati, ‘Ocita kolonjongo viotiliku.’ Ci lomboloka okuti, 22.000 koviyongelo viotiliku. Kalei u sapuila hati: “Kuata ukanda wove wuvangi, sonehamo 80.” Kuenje eye o tepulula onepa yalua yofuka yaco.—Luka 16:7.

Kalei handi o kuete omoko yoku talavaya lolombongo via cime caye. Kuenje o pondola oku tepulula olofuka omanu va levala ku cime caye. Omo liaco, poku tepulula onepa yimue yolofuka, kalei o kasi oku linga ukamba lomanu vaco okuti, eci a ka tundisiwa kupange waye, pamue va ko kuatela ohenda.

Vokuenda kuotembo, cime caye o kũlĩha ovina via pita. Ocili okuti, ovina kalei a linga, vi nena epese ku cime. Pole, eye o komõha ovituwa kalei a lekisa kuenda u pandiya ndaño “ka sungulukile,” momo “wa lekisa olondunge.” Yesu amisako hati: “Omãla voluali lulo va velapo kenyango locitumbulukila cavo okuti omãla vocinyi ci sule.”—Luka 16:8.

Yesu ka kasi oku vetiya omunu laumue oku kuama onjila kalei a nõlapo, ale oku kala ukuelimbi poku linga omĩlu. Oco hẽ nye a kasi oku longisa? Eye o vetiya olondonge hati: “Lingi akamba lovokuasi ka a sungulukile, okuti eci a pua vo tambuli vovitumãlo ka vi pui.” (Luka 16:9) Yesu o kasi oku longisa ulandu watiamẽla koku kuata utate kuenda olondunge. Afendeli  va Suku okuti “omãla vocinyi,” va sukila oku lekisa olondunge poku talavaya lovokuasi avo okuti va tiamisila utima kocimãho coku kuata omuenyo ko pui.

Yehova Suku kuenda Omõlaye, ovo lika va pondola oku tambula omunu umue Vusoma wo kilu, ale voluali Luokaliye palo posi vemehi Liusoma waco. Tu sukila oku nõlapo oku linga ukamba lavo poku talavaya lovokuasi etu oco tu kuatise kovopange Wusoma. Nda tua ci linga, elavoko lietu lio kovaso yoloneke li kolapo, eci ulu, osipi, lovokuasi akuavo a pua.

Handi vali, Yesu o lombolola okuti omanu vana va koleliwa koku tata loku talavaya ciwa lovokuasi avo, va ka kalavo omanu va koleliwa koku tata ovina vi kuete esilivilo lia velapo. Omo liaco, Yesu o popia hati: “Nda ka vu li lekisa okuti wakuacili kovokuasi ka a sungulukile, helie o ko kundiki ovina viocili [okuti ovina Viusoma]?”—Luka 16:11.

Yesu o lekisa kolondonge viaye okuti nda va yongola oku ka kala “vovitumãlo ka vi pui” va ka kisikiwa calua. Lomue o pondola oku kala ufendeli wocili wa Suku loku kalavo upika wovokuasi ka a sungulukile. Yesu o malusula hati: “Ka kuli upika laumue o tẽla oku vumba vacime vavali, pamue o suvuka umue kuenda o sola ukuavo, ale o kakatela umue kuenje o pembula ukuavo. Ka vu tẽla oku vumba Suku kuenda Ovokuasi.”—Luka 16:9, 13.