Skip to content

Skip to table of contents

Olombangi Via Yehova

Select language Umbundu

 OCIPAMA 96

Yesu o Vangula Lumalẽhe Ombiali Haeye Ohuasi

Yesu o Vangula Lumalẽhe Ombiali Haeye Ohuasi

MATEO 19:16-30 MARKO 10:17-31 LUKA 18:18-30

  • ULUME UMUE OHUASI O PULA ECI CATIAMẼLA KOMUENYO KO PUI

Yesu handi o linga ungende woku tunda vo Perea oku enda ko Yerusalãi. Umalẽhe umue ohuasi enda toke kokuaye kuenje u kekamẽla. Ulume waco, “ombiali yimue” okuti pamue usongui wosunangonga, ale o panga onepa Kekanga Linene. Kuenje u pula hati: “Olongisi Uwa, ocina cipi ndi sukila oku linga oco ndi piñale omuenyo ko pui?”—Luka 8:41; 18:18; 24:20.

Yesu o tambulula hati: “Momo lie o nukuila hati, uwa? Lomue uwa, te lika umosi okuti, Suku.” Citava okuti umalẽhe o tukula ondaka “uwa” ndonduko yesumbilo ndeci alongisi vetavo va lingainga. Ndaño okuti Yesu ulongisi uwa, eye o lomboluila umalẽhe okuti ondaka “Uwa” yi tiamisiwila lika ku Suku.

Yesu u lungula hati: “Nda o yongola oku kuata omuenyo, amamako oku pokola kovihandeleko.” Kuenje ulume u pula hati: “Ovihandeleko vipi?” Yesu pokati Kovihandeleko Ekũi, o tukulapo vitãlo okuti, ka citava oku ponda, ka citava oku linga ukahokolo, ka citava oku nyana, oku eca uvangi wesanda kuenda sumbila olonjali. Noke o tukula vali ocihandeleko ca velapo hati: “Sola ukuẽle ndeci o lisole ove muẽle.”—Mateo 19:17-19.

Ulume o tambulula hati: “Ndi lingainga ale ovina evi viosi; nye ndi sukila vali oku linga?” (Mateo 19:20) Pamue eye o sima okuti, handi o sukila oku linga ocina ciwa ale cimue ci komõhisa, cu ecelela oku kuata omuenyo ko pui. Yesu poku limbuka epingilo liaye liovutima u “kuatela ocisola.” (Marko 10:21) Pole, ulume o kuete cimue cu tateka.

Eye wa kakatela enene kovokuasi aye. Kuenje Yesu o popia hati: “Kuli cimue ca ku kambela: Kuende ka landise ovina o kuete, vi eca kolohukũi kuenje o kuata ukuasi kilu; noke enju, linga ondonge yange.” Ulume wa sukilile oku  avela olombongo viaye kolohukũi vina ka vi kuete epondolo lioku u tiuwila, oco a linge ondonge ya Yesu. Citava okuti Yesu o kuata ohenda eci a mola okuti ulume o votoka kuenje enda lesumuo. Omo okuti ulume wa kakatela enene kovipako viaye okuti “ovokuasi,” ka moli ukuasi wocili. (Marko 10:21, 22) Yesu o popia hati: “Ci tĩla vakualombongo oku iñila Vusoma wa Suku!”—Luka 18:24.

Olondonge vi komõha lolondaka evi kuenda ovina Yesu a popia noke hati: “Ci leluka ongamelo oku iñila venyulu lionguya, ohuasi oku iñila Vusoma wa Suku, ca tĩla.” Eci ci vetiya olondonge oku pula vati: “Helie o pondola oku popeliwa?” Yesu o va tambulula hati: “Ovina ka vi tẽliwa lomanu, ku Suku vi tẽliwa.”—Luka 18:25-27.

Petulu o lombolola okuti ovo va nõla onjila ya litepa leyi yulume ohuasi, poku popia hati: “Tua sia ovina viosi kuenje tua ku kuama; oco hẽ nye tu tambula?” Yesu o va sapuila onima yi tunda koku nõla onjila ya sunguluka hati: “Ocili, ndu sapuili siti, eci ovina vi lingiwa viokaliye, okuti Mõlomunu o tumãla kocalo caye culamba, ene wa siati oku ndi kuama vu ka tumãlavo kovialo 12 kuenje vu sombisa apata 12 a va Isareli.”—Mateo 19:27, 28.

Yesu o kasi oku tukula ovina vi laika oku iya kovaso yoloneke, eci ekalo lia kala vocumbo Cedene li ka tumbuluiwa. Petulu kuenda olondonge vikuavo va ka kuata esumũlũho lioku viala oluali eci lu ka linga Ocumbo Celau kumue la Yesu okuti, onima yaco ka yi sokisiwa lovina va sia!

Ocili okuti onima yaco ka yi ka tambuiwa lika kovaso yoloneke. Olondonge vi kuete ale esumũlũho liavo cilo, momo Yesu o popia hati: “Ka kuli laumue o sia onjo, ale ukãi, vamanjaye, olonjali, pamue omãla omo Liusoma wa Suku, okuti ka tambula calua koloneke vilo kuenda voluali luokaliye, omuenyo ko pui.”—Luka 18:29, 30.

Pole, kuosi ovo va enda, ukamba olondonge via Yesu vi pondola oku kuata la vamanjavo vekolelo, wa velapo okuti ukamba va kuetele vangandiavo u sule. Umalẽhe ombiali haeye ohuasi o pumba esumũlũho liaco kuenda epuluvi lioku kuata omuenyo ko pui Vusoma wa Suku kilu.

Yesu amisako hati: “Pole, valua va livanga, ovo va ka sulako kuenda vana va sulako, ovo va livanga.” (Mateo 19:30) Nye eye a yongola oku popia?

Umalẽhe ombiali haeye ohuasi o panga onepa kuava va “livanga,” momo eye umue pokati kasongui vetavo lia va Yudea. Nda wa pokuile kolonumbi via Suku, nda wa kuata onima yiwa kovaso yoloneke. Pole, o kasi oku pitisa kovaso ovokuasi aye. Handi vali, omanu vaño va limbuka okuti alongiso a Yesu ocili, hao onjila yoku kuata omuenyo. Ovo omanu va “sulako,” pole, cilo ovo omanu va “livanga,” momo va kuete esumũlũho lioku tumãla kovialo kilu la Yesu kuenda oku viala oluali eci lu ka linga Ocumbo Celau