Skip to content

Skip to table of contents

Olombangi Via Yehova

Select language Umbundu

 OCIPAMA 93

Mõlomunu o ka Tukuluka

Mõlomunu o ka Tukuluka

LUKA 17:20-37

  • USOMA WA SUKU U KASI POKATI KAVO

  • NYE CI KA PITA ECI YESU A KA TUKULUKA

Yesu handi o kasi vo Samaria ale vo Galilea. Cilo va Fariseo va yongola oku kũlĩha eci catiamẽla koku iya Kusoma okuti, kokuavo wiya lulamba kuenda lonjila yimue yi komõhisa calua. Pole, Yesu o popia hati: “Usoma wa Suku ka wiya okuti ci limbukiwa; kuenda omanu ka va ka popia vati, ‘U kasi palo,’ ale ‘Koko!’ Momo Usoma wa Suku u kasi pokati kene.”—Luka 17:20, 21.

Omanu vamue va sima okuti Yesu wo popia okuti Usoma u kasi vovitima viafendeli va Suku. Pole, eci hacoko ci lomboloka, momo Usoma ka u kasi vovitima via va Fariseo vana Yesu a kasi oku vangula lavo. Owo u kasi pokati kavo, momo Yesu Osoma ya nõliwa la Suku, o kasi pokati kavo.—Mateo 21:5.

Noke eci va Fariseo va enda, Yesu eca kolondonge viaye alomboluilo akuavo atiamẽla koku iya Kusoma. Catiamẽla koku tukuluka kuaye vunene Wusoma eye o lungula hati: “Ku iya oloneke okuti vu lavoka oku mola eteke lia Mõlomunu, pole, ka vu li moli.” (Luka 17:22) Yesu o yongola oku popia okuti oku viala kua Mõlomunu Vusoma, ci ka lingiwa kovaso yoloneke. Osimbu otembo yaco ka ya pitĩlilepo, olondonge vimue pamue viu sandiliya, pole, vi sukila oku amamako oku talamẽla toke eci Mõlomunu a pitĩla kotembo ya nõliwa la Suku.

Yesu amisako hati: “Omanu va ka popia lene vati, ‘Tali oko!’ ale ‘Tali kulo!’ Ko ka endiko, ale oku va kuama. Ndeci ociliakulo ci tunda konepa yimue yilu kuenda ci molẽhela konepa yikuavo yilu, haico ci pita la Mõlomunu keteke liaye.” (Luka 17:23, 24) Olondonge via Yesu vi ka teyuiwa ndati oco ka vi ka kuame va mesiya vesanda? Yesu o lombolola okuti oku iya kua Mesiya yocili, ku kala ndociliakulo okuti ci pondola oku muiwa lomanu vimbo liosi. Ondimbukiso yoku tukuluka kuaye vunene Wusoma, yi ka muiwa lika la vosi va lavulula lutate.

Yesu o ci sokisa lovolandu a pita kosimbu, oco a lombolole ovituwa viomanu va laikele oku lekisa vokuenda kuotembo yo kovaso, poku popia hati: “Ndeci ca kala koloneke via Noha, haico ci ka kala koloneke via Mõlomunu . . . Cimuamue haico ca pita koloneke via Lote: ovo va lia lia, va nyua nyua, va landa landa, va enda oku landisa, oku lima loku tunga. Pole, eteke Lote a tunda vo Sodoma, kilu kua tunda ondalu lofuofuo kuenje ya va nyõla vosi. Haico ci pita keteke Mõlomunu a tukuluka.”—Luka 17:26-30.

Yesu ka kasi oku popia okuti omanu vo koloneke via Noha kuenda via Lote va nyõliwa omo va enda oku linga ovina vieteke leteke ndeci: oku lia, oku nyua, oku landa, oku landisa, oku lima loku tunga. Noha la Lote kuenda apata avo va lingailevo ovina viaco. Pole, omanu vakuavo va enda oku linga ovina evi okuti, ka va tiamisila vali utima kocipango ca Suku kuenda ka va  kapeleko otembo va kala. Omo liaco, Yesu o vetiya olondonge viaye oco vi litumbike koku linga ocipango ca Suku loku tiamisila utima kupange waco. Eye o kasi oku va lomboluila eci va sukila oku linga oco va popeliwe eci Suku a ka nena esulilo kovaso yoloneke.

Olondonge vi sukila oku yuvula oku tiamisila utima kovina violuali ndeci, “ovina via siala konyima.” Yesu o popia hati: “Koloneke viaco, wosi o kasi kilu lionjo, [okuti] ovikuata viaye vi kasi vonjo, ka ka loke oco a vi upe kuenda una o kasi vepia ka ka tiuke oco ambate ovina via siala konyima. Ivaluki ukãi wa Lote.” (Lucas 17:31, 32) Eye wa linga ongunji yomongua.

Yesu amisako lulandu u laika oku pita eci Mõlomunu a fetika oku viala, poku sapuila olondonge viaye hati: “Kuteke waco omanu vavali va ka kala pula umuamue; umue upiwapo, pole, ukuavo o siala.” (Luka 17:34) Omo liaco, vamue va ka popeliwa, pole, vakuavo va ka siala ale oku pumba omuenyo wavo.

Olondonge vi pula viti: “A Ñala, ovina evi vi ka lingiwila pi?” Yesu o va tambulula hati: “Apa pali ocivimbi, opo olongonga vi liongoluila.” (Luka 17:37) Olondonge evi via sukilile oku kuata ovaso ndongonga kuenda oku likongela ku Kristu yocili, Mõlomunu. Kotembo yaco yo kovaso, Yesu wa laikele oku eca kolondonge viaye ocili ci popela omuenyo ku vana va kuete ekolelo.