Skip to content

Skip to table of contents

Olombangi Via Yehova

Select language Umbundu

 OCIPAMA 91

Lasaru o Pinduiwa

Lasaru o Pinduiwa

YOANO 11:38-54

  • EPINDUKO LIA LASARU

  • EKANGA LINENE LI TUMBIKA ONGOMBO YOKU PONDA YESU

Eci Yesu a lisanga la Marta kuenda Maria ocipepi lo Betania, va enda keyambo va kenda Lasaru okuti, kuvelo weyambo liaco kua sitikiwa lewe. Yesu o popia hati: “Ewe liupiweko.” Marta o sakalala momo ka kuete elomboloko lieci Yesu a yongola oku linga. Marta o popia hati: “A Ñala, [cilo] eye o kasi ale oku lẽha, momo pa pita ale oloneke vikuãla.” Pole, Yesu u kumbulula, hati: “Sia ku sapuilile hẽ okuti nda o kolela o mola ulamba wa Suku?”—Yoano 11:39, 40.

Kuenje ewe liopiwako. Yesu o vanja kilu kuenda o likutilila hati: “A Tate, ndu ku pandula omo wa njeva. Ocili, nda kũlĩha okuti olonjanja viosi o njeva njeva; pole, nda ci popela omo liowiñi wongoloka, oco va kolele okuti ove wa numa.” Ohutililo Yesu a linga lolukandi, yi lekisa kolonjeveleli  okuti, eye o laika oku linga cimue lekuatiso liunene wa Suku. Noke Yesu o kaluka lolukandi hati: “A Lasaru, tundamo!” Lasaru o tundamo okuti wa iñiwa olonjambo kolomãhi lo kovoko kuenda ocipala caye ca futisua lonanga. Yesu o va sapuila hati: “U kutululi kuenda a ende.”—Yoano 11:41-44.

Va Yudea vana veya oku lembeleka Marta la Maria, va mola ocikomo caco kuenje va lekisa ekolelo ku Yesu. Pole, vakuavo va tundapo kuenje va ka sapuila va Fariseo ovina Yesu a linga. Va Fariseo kuenda ovitunda via velapo, va linga esokiyo lioku liongolola lombonge ya velapo ya va Yudea okuti, Ekanga Linene. Vocimunga caco mua kongela ocitunda cinene, Kayafa. Vamue pokati kavo va kaluka vati: “Nye tu linga, omo ulume u o kasi oku linga ovilimbu vialua? Nda tuo wecelela ndoto, valua va ka kolela kokuaye kuenje va Roma veya va tu tambula ocitumãlo cetu kuenda ofeka yetu.” (Yoano 11:47, 48) Ovo va yeva uvangi omanu va eca watiamẽla ‘kovikomo vialua,’ Yesu a linga, pole, ka va sanjukila ovina Suku a kasi loku linga vonduko ya Yesu. Ovo va sakalala vali calua locikele cavo kuenda omoko yoku songola.

Epinduko lia Lasaru ku va Sadukeo etombo limue linene, momo ka va tava kepinduko. Kuenje Kayafa u Sadukeo o popia hati: “Ene ka wa kũlĩhĩli cimue, kuenda ka wa simĩli okuti kokuene hĩse nda omunu umosi o fila omanu, pole, ofeka yosi oku nyõleha hacoko.”—Yoano 11:49, 50; Ovilinga 5:17; 23:8.

Omo okuti Kayafa ocitunda cinene, Suku eye wo vetiya oku vangula ovina evi, ‘ka ci popele lovisimĩlo viaye muẽle.’ Kayafa o yongola oku popia okuti, Yesu o sesamẽla oku fa, oco omoko yoku songola kuenda ekemãlo liasongui vetavo lia va Yudea viamameko. Kuenje olondaka via Kayafa vi lekisa okuti Yesu wa laikele oku eca ocisembi lolofa viaye okuti, ka ci kuatisa lika va Yudea, pole, o ci lingila vosi “omãla va Suku va lisanduile.”—Yoano 11:51, 52.

Kayafa o vetiya Vakuekanga Linene oku tumbika ongombo yoku ponda Yesu. Anga hẽ Nikodemo okuti o panga onepa Kekanga Linene, haeye ekamba lia Yesu o ko situluila ongombo vo tumbikila? Yesu o tunda vocikanjo co Yerusalãi kuenje o yuvula oku pondiwa osimbu otembo ya sokiyiwa la Suku ka ya pitĩlile.