Skip to content

Skip to table of contents

Olombangi Via Yehova

Select language Umbundu

 OCIPAMA 90

‘Epinduko Kuenda Omuenyo’

‘Epinduko Kuenda Omuenyo’

YOANO 11:17-37

  • YESU O PITĨLA NOKE YOLOFA VIA LASARU

  • ‘EPINDUKO KUENDA OMUENYO’

Yesu poku tunda ko Perea, o pitĩla vo Betania okuti imbo liaco li kasi ocinãla ci soka olokilometulu vitatu kutundilo wo Yerusalãi. Maria la Marta va mukãi va Lasaru va kasi lesumuo omo okuti tunde eci Lasaru a fa, pa pita ño oloneke vimue. Omanu valua veya oku va lembeleka.

Kuenje umue o sapuila Marta okuti, Yesu o kasi oku iya, noke Marta o tunda lonjanga oco a ñualehele laye. Marta o sapuila Yesu eci eye la manjaye va kala oku sokolola vokuenda kuoloneke vikuãla via pita, poku popia hati: “A Ñala, nda wa kaile kulo mume wange nda ka file.” Pole, eci ka ci lekisa okuti Marta ka kuete elavoko, momo o popia hati: ‘Nda kũlĩha okuti ndaño cilo, cosi o pinga ku Suku, Eye o ku cĩha.’ (Yoano 11:21, 22) Eye o kuete ekolelo liokuti Yesu handi pamue o kuatisa mume waye.

Yesu o tambulula hati: “Mume wove o pinduka.” Marta o sima okuti eye o kasi oku popia epinduko lio kovaso yoloneke palo posi okuti, olio elavoko Avirahama lomanu vakuavo va kuatelevo. Marta o popia lekolelo hati: “Nda kũlĩha okuti eye o ka pinduka kepinduko lieteke lia sulako.”—Yoano 11:23, 24.

Anga hẽ Yesu o pondola oku kuatisa vepuluvi liaco? Eye ivaluisa Marta okuti, Suku wo wĩha unene woku pindula poku popia hati: “U o ñolela ndaño o fa, haimo o kala vali lomuenyo; kuenda wosi o kasi lomuenyo kuenje o ñolela, lalimue eteke a ka fa.”—Yoano 11:25, 26.

Yesu ka kasi oku popia okuti olondonge viaye vi kasi lomuenyo cilo, lalimue eteke vi ka fa. Handi muẽle eye o laika oku fa ndomo a ci sapuilile ovapostolo vaye. (Mateo 16:21; 17:22, 23) Yesu o kasi oku lombolola okuti poku lekisa ekolelo kokuaye, va pondola oku kuata omuenyo ko pui. Omanu valua va ka kuata omuenyo waco poku pinduiwa. Kuenje omanu vakuekolelo va kasi koloneke vilo via sulako pamue ka va ka fa. Omo liaco, ci kale vana va ka kuata omuenyo kepinduko, la vana ka va ka fa, nda va kolela Yesu, va sukila oku kũlĩha okuti oku fa ka ku ka kalako vali.

Pole Yesu wa popia hati, “ame ndipinduko haime ndimuenyo” o pondola hẽ oku kuatisa Lasaru okuti tunde eci a fa pa pita ale oloneke vimue? Yesu o pula Marta hati: “Ove hẽ wa ci kolela?” Marta o tambulula hati: “Oco a Ñala, nda kolela okuti ove vu Kristu Mõla a Suku, una wa laikele oku iya voluali.” Loku kolela okuti Yesu o pondola oku linga cimue veteke liaco, Marta o lupukila konjo yaye oku ka vilikiya manjaye pokolika kuenje u sapuila hati: “Ulongisi weya, wa ku kovonga.” (Yoano 11:25-28) Noke Maria o tunda vonjo kuenda o kuamiwa lomanu vana va sima okuti, eye o kasi oku enda keyambo va kenda Lasaru.

Pole, Maria enda toke ku Yesu kuenje u kekamẽla kolomãhi viaye loku lila. Eye o kuete ovisimĩlo ndevi via manjaye kuenje o popia hati: “A Ñala nda wa kaile kulo manjange nda ka file.” Yesu poku mola okuti Maria kuenda owiñi u kasi oku lila, ocikembe cu kuata kuenda o tokotelua kuenje o fetikavo oku lila. Eci ci komõhisa omanu va kalapo. Pole, vamue va lipula ndoco: ‘Nda Yesu eye wa patulula ovaso ulume omeke, nda ka tẽlelevo hẽ oku tateka okuti Lasaru ka fi?’—Yoano 11:32, 37.