Skip to content

Skip to table of contents

Olombangi Via Yehova

Select language Umbundu

 OCIPAMA 4

Maria we Mina Pole ka Kuelele

Maria we Mina Pole ka Kuelele

MATEO 1:18-25 LUKA 1:56

  • YOSEFE O LIMBUKA OKUTI MARIA WEMINA

  • MARIA O LINGA UKÃI WA YOSEFE

Tunde eci Maria a mina wa tẽlisa ale olosãi vikuãla. Ivaluka okuti, Maria koloneke viatete vioku mina kuaye, wa kala la ngandiaye Elisavete kimbo liolomunda ko Yudea. Pole, cilo Maria wa tiukila konjo yaye ko Nasara. Kaliye omanu vosi va ka limbuka okuti eye wemina. Sokolola ndomo ocitangi caco co sakalaisa!

Ocina cu sakalaisa, ceci okuti Maria wa yonguiwile ale lulume umue kalupindelu o tukuiwa hati, Yosefe. Maria wa kũlĩha okuti, Ocihandeleko ca Suku ca eciwile ku va Isareli, ca popele okuti, nda ukãi umue wa likuminyiwa oku kueliwa lulume umue kuenje o lipekela lulume ukuavo, ukãi waco o sosuiwa lovawe toke eci a fa. (Esinumuĩlo 22:23, 24) Ndaño okuti Maria ka lipekelele lulume ukuavo, citava okuti o lipula eci a ka sapuila Yosefe catimẽla koku mina kuaye, kuenda ndomo ocitangi caco ci ka tetuluiwa.

Omo okuti Maria ka kaile konjo yaye vokuenda kuolosãi vitatu, ocili okuti Yosefe wa kala lonjongole yoku u mola. Eci va li sanga, citava okuti Maria wo sapuila lutate ovina via pita laye, poku u lomboluila ciwa okuti, wemina lekuatiso liespiritu sandu lia Suku. Ove o pondola oku sokolola okuti, ka ca lelukile ku Yosefe oku tava ale oku kolela kovina viaco.

Yosefe wa kũlĩha okuti Maria, ukãi umue uwa kuenda o kuete ovituwa via sunguluka. Eye o sole calua Maria. Ndaño okuti Maria wo lomboluila ndomo a mina, pole, ku Yosefe ca kala ndu okuti, wemina muẽle lulume ukuavo. Yosefe ka yongola okuti Maria o sosuiwa lovawe toke eci  a fa, ale oku sepuiwa lomanu. Omo liaco, o nõlapo oku linyala vuyombeki okuti, ka ci kũlĩhĩwa lomanu. Koloneke viaco, omunu wa likuminyiwa oku kuela wa tendiwile okuti wa kuela ale, kuenje oco va litepe ca sukilile ukanda woku linyala.

Osimbu Yosefe amamako oku sokolola kocitangi caco, o ka pekela. Kuenje ungelo wa Yehova o molẽha kokuaye vonjoi loku u sapuila hati: “Ku ka kuate ohele yoku kuela Maria, momo wemina lunene wespiritu sandu. Eye o cita omõla ulume kuenje u luka Yesu, momo eye o ka yovola omanu vaye kakandu avo.”—Mateo 1:20, 21.

Eci Yosefe a pasuka, o yeva esanju omo okuti kaliye o kuete elomboloko liocitangi caco! Lonjanga, eye o linga ovina ungelo o tuma. Kuenje ambata Maria konjo yaye. Eci ceca uvangi wokuti kaliye va tokekisa olohuela viavo, ci lekisa okuti Yosefe kuenda Maria kaliye va kũlĩhĩwa lomanu vosi okuti olohueli. Pole Yosefe ka lipekela la Maria osimbu eye a mina Yesu.

Noke yolosãi vimue, Yosefe kuenda Maria va sukila oku lipongiya oco va linge ungende woku tunda vo Nasara. Pole, pi va enda, nda okuti Maria o panda oku cita?