Skip to content

Skip to table of contents

Olombangi Via Yehova

Select language Umbundu

 OCIPAMA 11

Yoano Upapatisi o Pongiya Onjila

Yoano Upapatisi o Pongiya Onjila

MATEO 3:1-12 MARKO 1:1-8 LUKA 3:1-18 YOANO 1:6-8, 15-28

  • YOANO O KUNDA KUENDA O PAPATISA

  • OMANU VALUA VA PAPATISIWA, POLE, HAVOSIKO

Pa pita ale 17 kanyamo tunde eci Yesu a linga apulilo kalongisi vonembele, eci a kuata 12 kanyamo. Cilo otembo yonjovo kunyamo 29 K.K. Omanu valua va kasi oku vangula eci catiamẽla kukuepata lia Yesu okuti Yoano una o kasi oku kunda kolonepa viosi yokutundilo Yolui Yordão.

Ekalo lia Yoano kuenda oku vangula kuaye ku komõhisa omanu. Uwalo waye wa pangiwa lovonya ongamelo kuenda wa itika uvia wocipa vombunda. Okulia kuaye kua kala apange kuenda owiki wombula. Lipi lia kala esapulo liaye? Esapulo liaco lieli: “Likekembeli, momo Usoma wo kilu u kasi ocipepi.”—Mateo 3:2.

Esapulo lia Yoano li vetiya calua omanu veya kokuaye oku u yevelela. Kuenje valua va limbuka esilivilo lioku likekembela. Eci ci lekisa okuti, va sukila oku linga apongoloko komuenyo wavo kuenda oku siapo ovituwa ka via sungulukile. Omanu veya ku Yoano, va tunda ko ‘Yerusalãi lo ko Yudea kuenda kovaimbo osi a kala ocipepi lo Yordão.’ (Mateo 3:5) Valua pokati komanu vaco va likekembela, noke o va papatisa poku va yuvika vovava Olui Yordão. Momo lie?

Yoano o papatisa omanu ndondimbukiso yoku limbuka, ale oku likekembela akandu lutima wosi omo lioku lueyela ocisila Cocihandeleko ca Suku. (Ovilinga 19:4) Pole, havosiko va likekembela lutima wosi. Eci asongui vamue vetavo, va Fariseo, la va Sadukeo veya ku Yoano, eye o va tukula hati: “Ambuto yolonyõha.” Noke o va sapuila hati: “Imi apako o kuatisi oku likekembela. Ko ka popi hoti, ‘Tu kuete isietu Avirahama.’ Momo ndu sapuili siti, Suku o pondola oku votola ovawe a-a oco a linge omãla va Avirahama. Ondiaviti yi kasi ale kolombombo vioviti. Uti wosi ka wimi apako awa, u tetiwa kuenje wimbiwa vondalu.”—Mateo 3:7-10.

Omo okuti Yoano wa kũlĩhĩwa calua mekonda liesapulo liaye kuenda oku papatisa omanu valua, ovitunda kuenda va Lewi va tumiwa oco vo pulise okuti: “Ove elie?”

Yoano o kumbulula hati: “Ame, hameko Kristu.”

Kuenje vo pula vali vati: “Ove elie? Anga ove Eliya?”

Eye hati: “Hameko.”

“Ove Uprofeto?” Va ci pulila oco va kũlĩhe nda eye uprofeto unene Mose a tukula okuti, wa laikele oku iya.—Esinumuĩlo 18:15, 18.

Pole, Yoano o kumbulula hati: “Sio!”

Ovo vo pula vali vati: “Ove elie? Tu sapuileko oco tu ece etambululo ku vana va tu tuma. Nye o popia catiamẽla kokuove?” Yoano o tambulula ndoco: “Ame ndi ndaka ya una wa kalukila vekalasoko yiti: ‘Suñamisi onjila ya Yehova,’ ndeci ca popiwile luprofeto Isaya.”—Yoano 1:19-23.

Ovo va pula vati: “Momo lie o papatisila nda ove ku Kristuko, ale Eliya pamue Uprofeto?” Yoano o va tambulula hati: “Ame mapatisa lovava. Pokati kene pa katuka umue ka wa kũlĩhĩli, okuti iya konyima yange.”—Yoano 1:25-27.

Yoano wa kũlĩha okuti, o kasi oku pongiya onjila poku kuatisa omanu oku kuata utima wa sunguluka okuti, va tava Mesiya una wa likuminyiwile oku linga Osoma. Yoano poku lombolola eci catiamẽla ku Mesiya o popia hati: “U iya konyima yange, wa mbelapo okuti ame ndi sule kuenda si sesamẽla oku upa olohaku kolomãhi viaye.” (Mateo 3:11) Kuenje Yoano o popia hati: “Una iya konyima yange wa livanga, momo eye wa kala tete komuenyo.”—Yoano 1:15.

Omo liaco, esapulo lia Yoano liokuti “Likekembeli, momo Usoma wo kilu u kasi ocipepi,” lia sunguluka. (Mateo 3:2) Lia kala elungulo limue li lekisa okuti, upange woku kunda una wa laikele oku lingiwa Losoma ya tumiwa la Yehova okuti Yesu Kristu, ndopo u fetika.