Skip to content

Skip to table of contents

Olombangi Via Yehova

Select language Umbundu

 OCIPAMA 2

Yesu o Sumbiwa Osimbu ka Citiwile

Yesu o Sumbiwa Osimbu ka Citiwile

LUKA 1:34-56

  • MARIA O NYULA NGANDIAYE ELISAVETE

Ungelo Gabriele noke yoku sapuila ufeko Maria okuti o ka cita omõla ulume, kuenje vo ko luka Yesu kuenda omõla waco o ka viala ndosoma otembo ka yi pui. Pole, Maria o pula ndoco: “Ci lingiwa ndati nda sia la kũlĩha ulume?”—Luka 1:34.

Gabriele o tambulula hati: “Espiritu sandu liya kokuove kuenda unene wa Tõlo u ku wila. Omo liaco, u o citiwa o ka tukuiwa Omõla a Suku o kola.”—Luka 1:35.

Citava okuti oco Maria a tave kesapulo liaco, ungelo Gabriele amisako hati: “Tala! Elisavete ngandiove una wa tukuiwile okuti ukãi osisu, vukuke waye we mina omõla ulume kuenda cilo o kasi lolosãi epandu; momo ku Suku, layimue ondaka okuti ka yi tẽlisiwa.”—Luka 1:36, 37.

Maria o tava kesapulo Gabriele o sapuila. Tu ci limbukila ketambululo liaye, eci a popia hati: “Tala upika ufeko wa Yehova! Ci tẽlisiwe vokuange ndomo wa ci popia.”—Luka 1:38.

Eci Gabriele a tunda, Maria o lipongiya oco a ka nyule Elisavete o kasi lulume waye Sakariya komunda yo ko Yudea ocipepi lo Yerusalãi. Oku tunda ko Nasara konjo ya Maria toke konjo ya Sakariya, ungende waco woloneke vitatu ale vikuãla.

Noke Maria o pitĩla konjo ya Sakariya. Poku iñila, o lama ngandiaye Elisavete. Elisavete o yukisua lespiritu sandu kuenje o sapuila Maria hati: “Wa sumũlũha pokati kakãi kuenda oñaña o ka cita ya sumũlũhavo! Momo lie ñuetele esumũlũho liokuti ina ya Ñala yange iya kokuange? Momo eci nda yeva ocilamo cove, oñaña vimo liange ya lisenga lonjolela yalua.”—Luka 1:42-44.

Maria o tambulula lolopandu poku popia ndoco: “Utima wange u pandiya Yehova, kuenda utima wange ka u tẽla oku likandangiya esanju ñuetele Suku Upopeli wange, omo eye ka vanjele kekalo liupika waye ufeko. Oku upisa cilo, ovitumbulukila viosi vi ka nukula okuti nda sumũlũha, momo Ukuonene o ndingaila ovilinga vi komõhisa.” Limbuka okuti ndaño lesumũlũho Maria a tambula, eye eca esivayo liosi ku Suku. Eye o popia ndoco: “Onduko yaye yi kola, kocitumbulukila locitumbulukila, o lekisa ohenda ku vana vo sumbila.”—Luka 1:46-50.

Maria amamako loku sivaya Suku poku tukula olondaka viocitumasuku hati: “Eye o lekisa unene lovaka aye, o sandola vana va lekisa epela vovitima viavo. Eye o kapa kutito alume va kemãla va kasi kocalo kuenda o kemãlisa vana vomboka; o kutisa lovina viwa vana va kasi onjala kuenda o tundisa olohuasi upolokoso. Eye o kuatisa ukuenje waye Isareli, loku ivaluka ohenda yaye, ndeci a sapuilile vakukululu yetu, ku Avirahama kuenda ocitumbulukila caye otembo ka yi pui.”—Luka 1:51-55.

Maria o kala la Elisavete vokuenda kuolosãi vitatu. Citava okuti, wa kala oku kuatisa Elisavete kolosemana a panda oku cita. Akãi ava vavali vakuekolelo okuti, va mina lekuatiso lia Suku, oku kala kumosi vokuenda kuotembo yaco, ca kala esanju!

Sokolola esumbilo lia eciwa ku Yesu osimbu ka citiwile handi. Elisavete wo tukula hati: “Ñala yange” kuenje oñaña vimo liaye ya lisenga “lonjolela yalua,” eci Maria a pitĩla. Eci ca litepa lonjila omanu vakuavo va tata Maria kumue lomõlaye, ndomo tu ka ci konomuisa.