Skip to content

Skip to table of contents

Olombangi Via Yehova

Select language Umbundu

 OCIPAMA 115

O Paskoa ya Sulako ya Yesu yi Kasi Ocipepi

O Paskoa ya Sulako ya Yesu yi Kasi Ocipepi

MATEO 26:1-5, 14-19 MARKO 14:1, 2, 10-16 LUKA 22:1-13

  • YUDA ISIKARIOTE O FETIWA OCO A PAKULE YESU

  • OVAPOSTOLO VAVALI VA LINGA ELIANGILIYO LIO PASKOA

Yesu o malusula oku longisa ovapostolo vaye vakuãla Komunda Yoliveira, loku tambulula epulilo liavo liatiamẽla koku tukuluka kuaye kovaso yoloneke kuenda kesulilo liovina vi kasi voluali.

Eteke 11 ya Nisana, eteke limue liupange walua! Citava okuti eci va kala oku tiukila ko Betania, oco va piteko uteke, Yesu o sapuila olondonge viaye hati: “Ene wa kũlĩhi okuti pa kamba lika oloneke vivali oco ku lingiwe o Paskoa kuenje Mõlomunu ambatiwa loku pondiwila kuti.”—Mateo 26:2.

Ci molẽha okuti keteke li kuamamo Votatu, ku Yesu kumue lovapostolo vaye, ka li kala eteke limue liesakalalo. Vovali, eye wa pisa asongui vetavo loku va popela kovaso yomanu. Ovo va yongola oku u ponda. Omo liaco, keteke 12 ya Nisana Yesu ka molẽha kowiñi. Momo ka yongola okuti cimue cu tateka oku lia o Paskoa lovapostolo vaye, vuteke u kuamamo noke yoku iñila kuekumbi, eci ku fetika eteke 14 ya Nisana.

Pole, ovitunda via velapo lakulu vomanu, va sakalala calua. Osimbu o Paskoa ka ya pitile, ovo va liongoluila kocitali conjo cocitunda cinene Kayafa. Ovo va tema calua omo okuti Yesu wa va situluila kovaso yomanu. Kuenje va tumbika “ongombo yoku kuata Yesu latutu oco vo wipaye.” Ndamupi kuenda otembo yipi va ka ci linga? Ovo va popia vati: “Ka tu ka ci lingi pocipito, sanga pokati komanu pa kala ema.” (Mateo 26:4, 5) Ovo va kasi lusumba omo okuti valua va sole Yesu.

Vokuenda kuotembo yaco, asongui vetavo va tambula ukombe umue. Ukombe waco, umue pokati kovapostolo va Yesu, okuti Yuda Isikariote. Satana wo kapa ocisimĩlo coku pakula Ñala yaye! Yuda o va pula hati: “Nye vu nyĩha oco ndi pakule  Yesu?” (Mateo 26:15) Lesanju ovo “vo likuminya oku u wĩha olombongo [viopalata].” (Luka 22:5) Ciñami? Va tava oku feta 30 kovingangu violopalata. Ocili okuti 30 kolosiekele, ondando yupika umue. (Etundilo 21:32) Poku ci linga asongui vetavo va lekisa okuti va sepula Yesu. Kokuavo, Yesu ka kuete esilivilo. Kaliye Yuda wa fetika “oku sandiliya epuluvi liwa lioku u pakuila kokuavo osimbu owiñi ka u kasipo.”—Luka 22:6.

Eteke 13 ya Nisana li fetika noke yoku iñila kuekumbi Votatu kuenda eli olio eteke lia sulako pokati koloneke epandu Yesu a pita uteke vo Betania. Aliangiliyo a sulako o Paskoa, a ka lingiwa keteke likuamamo. Ku ka sukiliwa okameme kamue oco ka pondiwe kuenda ka yokiwa olungunge, eci eteke 14 ya Nisana li fetika. Pi ovo va ka lila ondalelo kuenda helie o ka yi pongiya? Yesu ka lombolola ovina viaco. Omo liaco, Yuda ka kuete eci a ka sapuila ovitunda via velapo.

Citava okuti koku fetika kuekumbi Vokuãla, Yesu o tuma Petulu la Yoano oku tunda vo Betania oku enda ko Yerusalãi loku va sapuila hati: “Kuendi, ka pongiyi o Paskoa oco tu lie.” Ovo vati: “Pi o yongola okuti oko tu yi pongiyila?” Yesu o va tambulula hati: “Eci vu iñili volupale, vu sanga ulume umue wa ambata esanga liovava. U kuami toke vonjo a iñila. Sapuili muẽleanjo hoti, ‘Ulongisi wa tuma oku ku pula hati: “Ohondo yakombe yi kasi pi oco ndi lie o Paskoa lolondonge viange?”’ Eye o ka vu lekisi ohondo yimue yinene kosapalalo ya posuisua. Omo vu yi pongiyila.”—Luka 22:8-12.

Ocili okuti muẽleanjo yaco, ondonge ya Yesu. Citava okuti eye wa kala ale oku lavoka okuti Yesu u pinga oco va kale vonjo yaye oku lingilamo ocipito. Eci ovapostolo vavali va pitĩla vo Yerusalãi va sanga ovina viosi ndomo Yesu a ci popia. Kuenje ku pongiyiwa okameme lovina vikuavo vi sukiliwa ko Paskoa okuti vi pongiyilua 13 komanu okuti, Yesu kumue 12 kovapostolo.