Skip to content

Skip to table of contents

Olombangi Via Yehova

Select language Umbundu

 OCIPAMA 138

Kristu o Kasi Kondio ya Suku

Kristu o Kasi Kondio ya Suku

OVILINGA 7:56

  • YESU O TUMÃLA KONDIO YA SUKU

  • SAULU O LINGA ONDONGE

  • TU KUETE ESUNGA LIOKU KUATA ESANJU

Tunde eci Yesu a enda kilu okuti pa pita ale oloneke ekũi, kua kala oku wavekiwa kuespiritu sandu keteke lio Pendekoste. Owu uvangi wokuti, Yesu o kasi muẽle kilu. Kuenje ku laika oku situluiwa uvangi ukuavo. Ndonge Stefano osimbu ka sosuiwile lovawe omo lioku eca uvangi lekolelo, wa popia hati: “Ndi lete ilu lia yikuka kuenje Mõlomunu o tãi kondio ya Suku.”—Ovilinga 7:56.

Omo okuti kaliye Yesu o kasi la Isiaye kilu, wa laikele oku kevelela ocihandeleko cimue ca popiwile Vondaka ya Suku. Daviti wa soneha hati: “Yehova wa popia la cime cange [Yesu], hati, Tumãla kondio yange toke hu lingila ovanyãli vove ociliatelo cove.’” Vokuenda kuotembo eye a kala oku talamẽla, wa laikele oku ‘viala pokati kovanyãli vaye.’ (Osamo 110:1, 2) Nye Yesu a ponduile oku linga kilu osimbu a talamẽla otembo yoku viala pokati kovanyãli vaye?

Kunyamo 33 K.K., oco kua sokiyiwa ekongelo Liakristão. Oku upisa kilu, Yesu wa fetika oku viala, ale oku songuila olondonge viaye via wavekiwa lespiritu. (Va Kolosai 1:13) Eye wa fetika oku va songuila kupange woku kunda kuenda oku va pongiya omo liocikele va laikele oku kuata kovaso yoloneke. Ocikele cipi? Vokuenda kuotembo, vana va lekisa ekolelo toke koku fa, va laikele oku pinduiwa oco va kale olosoma la Yesu Vusoma.

Umue pokati komanu wa laikele oku linga osoma kovaso yoloneke, Saulu, una wa kũlĩhĩwavo londuko ya va Roma okuti Paulu. Eye wa kala u Yudea umue wa kuatelele ombili yalua Ocihandeleko ca Suku, pole, wa yapuisiwile lasongui vetavo lia va Yudea okuti, wa pangavo onepa eci Stefano a sosuiwa lovawe. Omo a ‘kuatele onjongole yalua yoku ponda olondonge via Ñala,’ Saulu wa enda ko Damasko. Eye wa kuatele omoko yoku kuata olondonge via Yesu, yina ya eciwa Locitunda Cinene Kayafa oco vambatiwe ko Yerusalãi. (Ovilinga 7:58; 9:1) Pole, osimbu Saulu a kala oku linga ungende, ocinyi cimue co tuila kuenje wa kupukila posi.

Ondaka yimue ya tunda kilu yo sapuila hati: “A Saulu, a Saulu, nye o ndi lambalalela?” Saulu wa pula hati: “Ove elie, a Ñala?” Vo tambulula hati: “Ame Yesu, una o kasi oku lambalala.”—Ovilinga 9:4, 5.

 Yesu o sapuila Saulu oco a iñile vo Damasko oku talamẽla olonumbi. Eye wa sukilile oku songuiwa toke volupale omo okuti, ocinyi cocikomo co lingisa omeke. Vocinjonde cikuavo Yesu wa molẽha ku Ananiya okuti ondonge yimue ya kala ko Damasko. Yesu wa imba onumbi ku Ananiya loku u sapuila oco a ka sande Saulu. Ananiya wa kuata usumba woku ci linga, pole, Yesu wo sapuila hati: “Ulume u ndo nõla oco a linge ocikuata coku ambatela onduko yange ku vakualofeka, kolosoma kuenda komãla va Isareli.” Ovaso a Saulu a patuluka kuenje “wa fetika oku kunda [vo Damasko] catiamẽla ku Yesu okuti, eye Omõla a Suku.”—Ovilinga 9:15, 20.

Lekuatiso lia Yesu, Paulu lakundi vakuavo, vamamako lupange woku kunda, una Yesu a fetika. Kuenje Suku wa va sumũlũisa loku kuata onima yiwa. Noke yoku pita 25 kanyamo tunde eci Yesu a molẽha kokuaye vetapalo lio Damasko, Paulu wa soneha okuti, olondaka viwa via “kundiwila komanu vosi va kasi vemehi lilu.”—Va Kolosai 1:23.

Noke yanyamo amue, Yesu wa eca ovinjonde vialua kupostolo waye o soliwe Yoano, vina vi sangiwa Vembimbiliya kelivulu Liesituluilo. Pocakati covinjonde viaco, Yoano wa kala komuenyo otembo yalua oco a mole Yesu toke eci a tiuka vunene Wusoma. (Yoano 21:22) “Omo liunene wespiritu, [Yoano] weya oku kala keteke lia Ñala.” (Esituluilo 1:10) Eteke lia Ñala lia laikele oku kala otembo yipi?

Ekonomuiso limue lia lingiwa lutate liocitumasuku Cembimbiliya, li lekisa okuti, ‘eteke lia Ñala’ lia fetika koloneke vilo. Kunyamo wo 1914, kua fetika uyaki Watete wa pita Voluali luosi. Vanyamo a kuamamo, kua siata oku pita ovoyaki, ovovei, onjala, ovilemawe, lovovangi akuavo a lekisa “ondimbukiso” yina Yesu a eca kovapostolo vaye, yatiamẽla koku “tukuluka” kuaye kuenda “yesulilo,” yi kasi oku tẽlisiwa kolonepa viosi violuali. (Mateo 24:3, 7, 8, 14) Kuenje koloneke vilo, upange woku kunda olondaka viwa Viusoma, ka u kasi oku lingiwa lika Vuviali wo Roma yosimbu, pole, u kasi oku lingiwavo kolonepa viosi violuali.

Yoano wa tumiwa oku soneha elomboloko liovina viaco viosi, hati: “Cilo kua situluiwa eyovo, lunene kuenda Usoma wa Suku yetu, lomoko ya Kristu waye.” (Esituluilo 12:10) Ocili okuti Usoma wa Suku u kasi kilu una Yesu a sandeka calua, wocili!

Eli esapulo liwa kolondonge viosi via Yesu vakuekolelo. Ovio vi sanjukila olondaka via Yoano viokuti: “Omo liaco, yoleli ene ailu lene wa tungimo! Ove ailu lieve, lokalunga ngongo yene, momo Eliapu lia lokila kokuene lonyeño yalua, omo lia kũlĩha okuti li kuete otembo yitito.”—Esituluilo 12:12.

Omo liaco, Yesu ka kasi vali oku talamẽla kondio ya Isiaye. Eye o kasi oku viala komangu Yusoma kuenda ndopo o ka kundula ovanyãli vaye vosi. (Va Heveru 10:12, 13) Ovina vipi vi komõhisa tu lavoka?