Skip to content

Skip to table of contents

Olombangi Via Yehova

Select language Umbundu

 OCIPAMA 18

Upange wa Yesu u Livokiya Pole wa Yoano u Tepuluka

Upange wa Yesu u Livokiya Pole wa Yoano u Tepuluka

MATEO 4:12 MARKO 6:17-20 LUKA 3:19, 20 YOANO 3:22–4:3

  • OLONDONGE VIA YESU VI PAPATISA OMANU VALUA

  • YOANO UPAPATISI O KAPIWA VOKAYIKE

Noke yocipito co Paskoa, yunyamo 30 K.K., Yesu kumue lolondonge viaye, va tunda ko Yerusalãi. Ovo ka va tiukila kolonjo viavo ko Galilea. Pole, va enda volupale luo Yudea, kuna va papatisa omanu valua. Yoano upapatisi o kasi ale oku linga upange waco vokuenda kunyamo umosi kuenda olondonge viaye vi kasi laye. Citava okuti, va kasi vocimbota Colui Yordão.

Yesu ka papatisa, pole, o sapuila olondonge viaye oku ci linga. Votembo yaco yupange woku kunda wa Yesu, eye kumue la Yoano va longisa va Yudea va likekembela akandu omo lioku sinila ocisila Cocihandeleko ca Suku.—Ovilinga 19:4.

Olondonge via Yoano vi kuata esepa kuenje vi popia eci catiamẽla ku Yesu hati: “Ulume [Yesu] wa kala love . . . o kasi oku papatisa kuenda omanu vosi vo va enda kokuaye.” (Yoano 3:26) Yoano ka kuata esepa, pole, o sanjuka onima yupange wa Yesu kuenda o vetiya olondonge viaye oco vi sanjukevo. Yoano o va ivaluisa hati: “Ene vu njimbila uvangi eci nda popia okuti, ‘Hameko Kristu, pole nda tumiwa kovaso yaye.’” Oco omanu vosi va kuate elomboloko, o tukula ocindekaise cokuti: “Wosi o kasi la ndombua eye sandombua. Pole, eci ekamba lia sandombua li votoka kuenje li yeva ondaka ya sandombua, o kuata esanju lialua. Esanju liange cilo lia suapo.”—Yoano 3:28, 29.

Ndeci ekamba lia sandombua li sanjuka, olosãi vimue konyima, Yoano wa kuatavo esanju eci a lekisa olondonge viaye ku Yesu. Vamue pokati kavo va kuama Yesu kuenje vokuenda kuotembo va laikele oku wavekiwa lespiritu sandu. Yoano o yongola okuti, cilo olondonge viaye vi kuamavo Yesu. Momo ocimãho ca Yoano oku pongiya onjila yupange woku kunda wa Yesu. Yoano o lombolola hati: “Eye te amamako oku vokiya, ame puãi ndi tepulula.”—Yoano 3:30.

Yoano ukuavo, una wa linga ondonge ya Yesu, noke yotembo yimue, wa soneha eci catiamẽla oku Yesu a tunda kuenda kocikele caye coku kala upopeli womanu. Eye wa soneha ndoco: “Una wa tunda kilu wa velapo vosi. . . . Isia o sole Omõla kuenda wa eca ovina viosi peka liaye. Wosi o kolela Mõla o kuete omuenyo ko pui; puãi wosi ka pokola ku Mõla ka kuata omuenyo, pole onyeño ya Suku yi kala ño laye.” (Yoano 3:31, 35, 36) Eci ocili cimue ci kuete esilivilo lia velapo omanu va sukila oku kũlĩha!

Yoano Upapatisi noke yoku popia olondaka viokuti, upange waye wa laikele oku tepuluka, ka pa pitile otembo yalua, Soma Herode wo kapa vokayike. Herode wa kuelele Herodiya ukãi wa manjaye Filipu. Eci Yoano a situlula ukahokolo waco kovaso yomanu, Herode wa tuma oku u kapa vokayike. Eci Yesu a yeva okuti, Yoano wa kapiwa vokayike, wa tunda vo Yudea kumue lolondonge viaye, yu wa ‘enda ko Galilea.’—Mateo 4:12; Marko 1:14.