Skip to content

Skip to table of contents

Olombangi Via Yehova

Select language Umbundu

 OCIPAMA 13

Kuama Ongangu ya Yesu Poku Liyaka Layonjo

Kuama Ongangu ya Yesu Poku Liyaka Layonjo

MATEO 4:1-11 MARKO 1:12, 13 LUKA 4:1-13

  • SATANA O SETEKA OKU YONJA YESU

Yesu noke yoku papatisiwa la Yoano, o songuiwa lespiritu lia Suku vekalasoko lio Yudea. Eye o kuete ovina vialua vioku sokolola. Eci Yesu a kala oku papatisiwa, “Ilu lia yuluka.” (Mateo 3:16) Kaliye eye o pondola oku ivaluka ovina a lilongisa levi a linga osimbu a kala kilu. Ocili okuti, Yesu o kuete ovina vialua vioku sokolola!

Yesu o kala vekalasoko 40 kovotanya kuenda 40 kovoteke. Vokuenda kuoloneke viaco, ka li cimue. Omo okuti Yesu o kasi lonjala yalua, Eliapu liya kokuaye oku u yonja loku popia hati: “Nda vumõla a Suku, sapuila ovawe a-a oco a pongoloke olombolo.” (Mateo 4:3) Yesu wa kũlĩha okuti, ka ca sungulukile oku talavaya lãvi lunene waye woku linga ovikomo oco a tẽlise olonjongole viaye muẽle. Omo liaco, ka tava keyonjo liaco.

Eliapu li amamako oku u yonja lonjila yikuavo. Olio li yonja Yesu oco a tẽhe kocimbaka co kilu lionembele. Pole, Yesu ka tava koseteko yoku talavaya lãvi lunene waye oco a kuate oluhimo. Eye o tukula Ovisonehua oco a lekise okuti, ka ca sungulukile oku seteka Suku lonjila eyi.

Keyonjo liatatu, Eliapu li lekisa ku Yesu “ovosoma osi oluali lulamba walio,” kuenje li popia hati: “Ndu ku ĩha ovina evi viosi nda wa ñekamẽla loku ndi fendela.” Yesu u likala vali loku tambulula lutõi hati: “A Satana, nunde!” (Mateo 4:8-10) Yesu ka tava keyonjo liaco, momo wa kũlĩha okuti esivayo li eciwa lika ku Yehova. Eye o nõlapo oku kakatela ku Suku.

Tu pondola oku lilongisa eci catiamẽla kayonjo a pita la Yesu kuenda ndomo a yula ayonjo aco. Ayonjo Yesu a liyaka lao a kala ocili. Kuenje eci ci lekisa okuti Eliapu hacisimĩloko cĩvi ci kasi vutima womunu, ndeci omanu valua va siata oku popia. Eye omunu muẽle okuti, ka letiwe lovaso. Ulandu owu u lekisavo okuti, olombiali violuali lulo via tiamẽla Keliapu kuenda eye o kasi oku vi viala. Nda Eliapu ka lia kaile ombiali yoluali, anga hẽ eyonjo liaye nda lia kala liocili ku Kristu?

Handi vali, Eliapu lia popia okuti, nda Yesu wo kekamẽla loku u fendela u wĩha ovosoma osi oluali. Eliapu li pondolavo oku tu yonja lonjila yimuamue. Pamue li ci lingavo poku tu ĩha epuluvi lioku kuata ukuasi, unene ale ocikele cimue voluali. Pole, tu lekisa olondunge nda tua kuama ongangu ya Yesu yoku amamako oku kolela Suku ndaño layonjo alua! Ivaluka okuti, Eliapu lia sia Yesu toke “kepuluvi likuavo lia sunguluka.” (Luka 4:13) Cimuamue haico ci pondola oku pita letu. Omo liaco, tu sukila oku lunguka.