Skip to content

Skip to table of contents

Olombangi Via Yehova

Select language Umbundu

 ONEPA YATETE

“Ya Nyelela Ndi yi Vanjiliya”

“Ya Nyelela Ndi yi Vanjiliya”

Omeme ya sakalala. Osimbu yi kasi oku lia owangu, yi litepa lolomeme vikuavo. Kuenje ka yi moli vali ocunda ndaño ungombo. Ku iya owelema. Omeme yi kasi vondamba muli ovinyama via tema haiyo ka yi kuete eteyuilo. Noke yi yeva ondaka ya kũlĩha okuti yungombo, una o lupukila komeme, o yi tikula, o yi muñila kesusu liuwalo waye, kuenda o yambata konjo.

YEHOVA olonjanja vialua o li sokisa lungombo waco. Eye o tu likuminya Vondaka yaye hati: “Ame sandiliya olomeme viange, hã si vi ongolola.”—Esekiele 34:11, 12.

Vulomeme Viovusenge Wange”

Velie olomeme via Yehova? Olomeme via Yehova omanu vana eye a sole haivo vo fendela. Embimbiliya li popia hati: “Tu fendeli loku petama. Tu kekameli kovaso a Yehova, utungi wetu. Momo eye Suku yetu, letu­tumanu vaye, o tu lisa lisa, haetu tulomeme vi songuilua leka liaye.” (Osamo 95:6, 7) Ndeci ci pita lomeme yi kuama ungombo, afendeli va Yehova va kuete onjongole yoku kuama Ungombo wavo. Anga ka va lueya? Hacoko. Afendeli va Suku olonjanja vimue va kala ‘ndolomeme via sandoka,’ ‘ndolomeme via nyelela’ kuenda “ndolomeme vi tungayala.” (Esekiele 34:12; Mateo 15:24; 1 Petulu 2:25) Ndaño muẽle eci omunu a tinduka, Yehova ko yanduluka ndu okuti ka kuete vali elavoko.

 Anga hẽ handi o tenda Yehova okuti Ungombo wove? Koloneke vilo, Yehova o sokisiwa ndati Lungombo? Konomuisa olonjila vitatu:

Eye o tu tekula konepa yespiritu. Yehova wa popia hati: “Ndi vi lisila kowangu uwa. ... Vi pekela vulisilo uwa woku kumba. Vi lila kovilisilo viwa.” (Esekiele 34:14) Yehova lalimue eteke a liweka oku tu ĩha okulia kuespiritu votembo ya sokiyiwa. Ivaluka hẽ ocipama cimue, ohundo yimue, ale ovideo ya tambulula ohutililo wa linga yoku pinga ekuatiso? Eci ka ca ku vetiyile hẽ oku limbuka okuti Yehova wa ku kapako?

Eye o tu teyuila kuenda o tu kuatisa. Yehova wa likuminya hati: “Ya nyelela ndi yi vanjiliya. ... Ya teka ndi yitika. Ya hongua ndi yi kolisa.” (Esekiele 34:16) Yehova o pamisa vana va hongua, ale va sumua omo liasakalalo. Nda omeme ya sumua, eye o yi kuatisa oku kaya ndaño muẽle eci yi sumuisiwa la vamanji vamue. Kuenje eye o nena vali vana va tinduka, la vana va liyaka lovisimĩlo ka via sungulukile viatiamẽla kokuavo muẽle.

Eye wa tu kapako. Yehova wa popia hati: ‘Ndi vi ongolola kuosi via sandokalale.’ “Ya nyelela ndi yi vanjiliya.” (Esekiele 34:12, 16) Ku Yehova omeme ya nyelela ka ci lomboloka okuti ka yi tiuka vali. Eye wa kũlĩha eci omeme yimue yi nyelela, kuenje o sandiliya omeme yaco kuenda o sanjuka poku yi sanga. (Mateo 18:12-14) Kuenje o tukula afendeli vaye okuti “vulomeme viange, haene vulomeme viovusenge wange.” (Esekiele 34:31) Ove u umue pokati kolomeme viaco.

Ku Yehova omeme ya nyelela ka ci lomboloka okuti ka yi tiuka vali. Eye o sanjuka eci a sanga omeme yaco

“Tu Muise Vali Ongusu Ndoloneke Vionahũlu”

Momo lie Yehova a ku sandiliyila loku ku laleka oku tiuka kokuaye? Momo eye o yongola okuti ove o sanjuka. Eye wa likuminya kolomeme viaye okuti o vi lokisa “ombela yesumũlũho.” (Esekiele 34:26) Ohuminyo yaco hayesandako. Ove wa mola ale olohuminyo vimue via tẽlisiwa.

Sokolola ndomo ove wa kũlĩha Yehova. Wa liyeva ndati onjanja yatete eci wa lilongisa ocili ndeci, onduko ya Suku, kuenda ocipango caye catiamẽla komanu? Ivaluka hẽ esanju wa yeva poku likongela Lakristão kolohongele vimbo kuenda kolohongele viofeka? Poku kundila omunu umue wa lekisa onjongole, eci wa tiukila konjo kua yevele hẽ esanju kutima?

Ove o pondola oku kuata vali esanju liaco. Afendeli va Suku vo kosimbu va likutilila vati: “Tu tiule, a Yehova, ha tuiya kokuove, oco tu tumbuluke. Tu muise vali ongusu ndoloneke vionahũlu.” (Asiõsuĩlo 5:21) Yehova wa tambulula ohutililo yaco kuenje omanu vaye va tiuka kokuaye loku u vumba vali lesanju. (Nehemiya 8:17) Cimuamue haico Yehova a ka linga love.

Ocili okuti oku tiuka ku Yehova ca leluka oku ci popia okuti oku ci linga ci sule. Konomuisa ovina vimue vi tateka omunu oku tiuka, kuenda ndomo o pondola oku vi yula.