Skip to content

Skip to table of contents

Olombangi Via Yehova

Select language Umbundu

 ONEPA YATATU

Evalo Kutima—Ceci tu ‘Likuetele Ondaka la Umue’

Evalo Kutima—Ceci tu ‘Likuetele Ondaka la Umue’

“Manji umue ukãi vekongelo liange wa ndi lundila okuti nda nyana olombongo viaye. Vamanji vamue vekongelo va tava kondaka yaco, yu va fetika oku likongela kokuaye. Kuenje manji yaco ukãi wa ndi sapuila okuti wa tambula esapulo liokuti ukamba wetu wa pua. Ndaño wa pinga ongecelo, pole, vutima wange nda liyeva okuti lalimue eteke ndu wecela omo liovina a ndingila.”—Linda.

ANGA hẽ o kasi nda Linda, okuti wa yevele evalo vutima omo lielinga lia manji umue? Ci sumuisa oku kũlĩha okuti vamanji vamue va siata oku sakalaisua omo lielinga lia vakuavo okuti ci va tateka oku linga ovopange wusoma. Anga eci oco ocitangi cove?

Anga Kuli Umue o “Tẽla Oku tu Tepa Kocisola ca Suku”?

Ocili okuti ka ca lelukile oku ecela manji wa tu sumuisa. Pole, Akristão vosi va sukila oku likuatela ocisola pokati. (Yoano 13:34, 35) Nda manji umue wa tu lingila cimue cĩvi, tu yeva evalo vutima kuenda esumuo lialua.—Osamo 55:12.

Embimbiliya li popia okuti olonjanja vimue Akristão va pondola ‘oku likuatela olondaka.’ (Va Kolosai 3:13) Eci tu pita locitangi caco pamue ka ci leluka oku ci tetulula. Anga kuli cimue ci pondola oku tu kuatisa? Konomuisa Ovinimbu vitatu Viembimbiliya:

Isietu kilu wa kũlĩha ovina viosi. Yehova o lete ovina viosi via siata oku pita, oku kongelamo ovina vĩvi va tu lingila kuenda evalo liyililako. (Va Heveru 4:13) Pole, Yehova layevo o sumua eci tu tala ohali. (Isaya 63:9) Eye lalimue eteke a ka ecelela okuti ‘ohali pamue ongongo,’ ale ocina cikuavo, ndaño muẽle ufendeli waye, vi “tu tepa kocisola ca Suku.” (Va Roma 8:35, 38, 39) Omo liaco, ka tu ka eceleli okuti ocina cimue, ale omunu umue o tu tepa kocisola ca Yehova.

Oku ecela ka ci lomboloka oku yuvula oku ci kapako. Eci tu ecela ava va tu lueyela, ka ci lomboloka okuti tu kasi oku ecelela elinga liavo, pamue oku lisandela esunga, ale oku yuvula oku ci kapako. Ivaluka okuti Yehova ka sole ekandu, pole, eye ecela nda kuli esunga lioku ci linga. (Osamo 103:12, 13; Havakuki 1:13) Eci Yehova a tu vetiya oku ecela vakuetu, eye o kasi oku tu pinga oco tu kuame ongangu yaye. Momo eye “ka tema tema olonjanja viosi.”—Osamo 103:9; Mateo 6:14.

Eci tu siapo ocikumbiti tu li kuatisa etu muẽle. Ndamupi? Kũlĩhĩsa ulandu u kuãimo. Ove o kuata ewe limue li lemapo kamue, kuenda o kala lalio peka loku olõla eka. O pondola oku kuata ewe liaco okatembo kamue. Pole, nye ci yililako nda wa kala lalio otembo yalua? Anga nda wa tẽla oku kala lalio akukutu amue? olowola vimue? ale otembo yalua? Ocili okuti eka liove nda lia kava calua! Ocilemo cewe nda ka ca pongolokele. Pole, nda wa yeva ekavo omo liotembo nda wa kala lalio. Cimuamue haico ci pita locikumbiti. Otembo tu kala locikumbiti ndaño okuti okatembo katito, tu lilemeha etu muẽle. Eli olio esunga lieci Yehova  a tu vetiyila oku siapo ocikumbiti. Oku siapo ocituwa caco ci tu kuatisa etu muẽle.—Olosapo 11:17.

Eci tu siapo ocikumbiti tu li kuatisa etu muẽle

“Nda Liyeva Ndu Okuti Yehova Eye wa Kala Oku Vangula Lame”

Nye ca kuatisa Linda oku yuvula oku kuata ocikumbiti omo lionjila ndomo a tatiwa la manji umue? Eye wa enda oku sokolola kovinimbu vimue Viembimbiliya vi lekisa esilivilo lioku ecela. (Osamo 130:3, 4) Linda wa vetiyiwa calua oku limbuka okuti nda tu ecela akandu a vakuetu, Yehova o tu ecelavo. (Va Efeso 4:32–5:2) Eye wa lombolola ndomo ovina viaco vio kuatisa poku popia hati: “Nda liyeva ndu okuti Yehova eye wa kala oku vangula lame.”

Cilo Linda ka kuete vali ocikumbiti. Wa ecela manji yaco kuenda wa linga ekamba liaye liocili. Linda wa vetiyiwa oku amamako oku vumba Yehova. Kolela okuti Yehova o yongola oku ku kuatisa lonjila yimuamue.