Skip to content

Skip to table of contents

Olombangi Via Yehova

Select language Umbundu

 OCIPAMA 10

Yesu wa Lekisa Epokolo Olonjanja Viosi

Yesu wa Lekisa Epokolo Olonjanja Viosi

Ca leluka hẽ, oku pokola kolonjali viove olonjanja viosi?— Olonjanja vimue ka ca lelukile. Ove hẽ, wa kũlĩha okuti Yesu wa lekisa epokolo ku Yehova kuenda kolonjali viaye?— Ongangu yaye yi pondola oku ku kuatisa oco o pokole kolonjali viove, ndaño pamue ka ca lelukile oku ci linga. Omo liaco, tu konomuisi ulandu waco.

Osimbu handi Yesu keyile palo posi, wa kala kilu, la Isiaye Yehova. Pole, wa kuatele olonjali palo posi. Olonduko violonjali viaye, Yosefe la Maria. Ove hẽ, wa kũlĩha ndomo va linga olonjali viaye?—

Yehova wa sondoluila omuenyo wa Yesu vimo lia Maria oco a citiwe loku, kala palo posi. Ovina viaco via lingiwa locikomo! Yesu wa kulila vimo lia Maria ndeci oloñaña vikuavo via siata oku kulila vimo liolonjali viavo. Noke yolosãi ecea, Yesu wa citiwa. Omo liaco, Maria kumue lulume waye Yosefe, va linga olonjali via Yesu palo posi.

Eci Yesu a tẽlisa 12 kanyamo, wa linga ocina cimue ca lekisa ndomo a solele Isiaye, Yehova. Yesu wa linga ocina caco eci a endele kumue lepata liaye, kocipito Copaskua, ko Yerusalãi. Poku tiukila konjo, Yosefe la Maria va limbuka okuti, Yesu ka kalele pokati kavo. Ove hẽ, wa kũlĩha oku a kala?—

Yosefe kumue la Maria, va tiukila ko Yerusalãi oku ka sandiliya Yesu. Ovo va kuata esakalalo lialua momo, ka ca lelukile oku u sanga. Pole, noke yoloneke vitatu, vo sanga vonembele! Ove hẽ, wa kũlĩha esunga lieci Yesu a kalela vonembele?— Momo wa yonguile oku lilongisa ovina viatiamẽla ku Isiaye, Yehova. Eye wa solele Yehova, kuenda wa yonguile oku lilongisa ndomo a pondola oku u sanjuisa. Yesu eci a kula kuenda wa linga ulume unene, wa amamako oku pokola ku Yehova olonjanja viosi, ndaño pamue ka ca lelukile kokuaye oku ci linga. Anga hẽ, Yesu wa pokolavo ku Yosefe la Maria?— Ocili, Embimbiliya li lekisa okuti, wa pokola.

Ongangu ya Yesu yi ku longisa nye?— O sukila oku pokola kolonjali viove, ndaño okuti pamue ka ca lelukile oku ci linga. Anga hẽ, o ci linga?—

Tanga Vembimbiliya liove

Luka 1:30-35; 2:45-52

Va Efeso 6:1

Va Heveru 5:8