Skip to content

Skip to table of contents

Olombangi Via Yehova

Select language Umbundu

 OCIPAMA 5

Samuele wa Amamako Oku Linga Eci ca Sunguluka

Samuele wa Amamako Oku Linga Eci ca Sunguluka

Eci Samuele a kala umalẽhe, wa talavaya votavernakulu, muna omanu va enda oku fendela Yehova. Ove hẽ, wa kũlĩha ndomo Samuele eya oku kala votavernakulu? Tete tu konomuisi eci catiamẽla ku Hana ina ya Samuele.

Vokuenda kuotembo yalua, Hana wa kala osĩsu, omo liaco, wa yonguile oku cita omõla umosi. Kuenje, wa likutilila ku Yehova oco o kuatise. Eye wa likuminyile okuti, nda wa cita omõla, u weca ku Yehova, oco a talavaye votavernakulu. Yehova wa tambulula ohutililo yaye, kuenje, wa cita omõla una a luka hati, Samuele. Eci Samuele a tẽlisa anyamo atatu ale akuãla, Hana wo tuala votavernakulu oco a vumbe Suku, ndeci a likuminyile.

Eli wa kala ocitunda cotavernakulu. Omãla vaye vavali va kalavo oku talavaya laye. Ivaluka okuti, otavernakulu ya kala ocitumãlo coku fendela Suku, kuenda omanu va sukilile oku linga ovina viwa vocitumãlo caco. Pole, omãla va Eli, va enda oku linga ovina ka via sungulukile. Samuele wa mola ovina va enda oku linga. Anga hẽ, Samuele wa endavo oku linga ovina ka via sungulukile ndeci omãla va Eli va lingaile?— Sio, eye wa enda oku linga ovina via sunguluka olonjali viaye vio longisa.

Nye o sima okuti oco Eli a sukilile oku linga oco a kuatise omãla vaye vavali?— Eye wa sukilile oku va kangisa. Eye wa sukilile oku va tundisa okuti ka va talavaya vali vonjo ya Suku. Pole, Eli ka ci lingile kuenje, Yehova wo temẽla kumue lomãla vaye vavali. Omo liaco, Yehova wa nõlapo oku va kangisa.

Samuele wa eca ku Eli esapulo lia Yehova

Eteke limue luteke eci Samuele a kala oku pekela wa yeva umue wo vilikiya hati: ‘A Samuele!’ Kuenje, wa lupukila ku Eli. Pole, wo sapuila hati: ‘Sia ku kovongele.’ Eye wa yeva ondaka yaco olonjanja vivali. Noke yonjanja yatatu, Eli wa sapuila Samuele hati, nda wa yeva vali ondaka yaco, tambulula ndoco: ‘A ­Yehova, popia ño, ndu ku yevite.’ Kuenje, Samuele wa kuama onumbi yaco. Noke, Yehova wa sapuila Samuele hati: ‘Sapuila Eli okuti, ndi ka yambula epata liaye omo liovina vĩvi va linga.’ Ove hẽ, o sima okuti ca lelukile  Samuele oku eca esapulo liaco ku Eli?— Sio, ka ca lelukile. Pole, kuteke waco ndaño okuti Samuele wa kala lusumba, wa linga ovina Yehova o sapuilile. Eci Yehova a popia ceya oku tẽlisiwa. Omãla vavali va Eli va pondiwa kuenje, eye wa favo.

Samuele wa tu sila ongangu yiwa. Ndaño okuti omanu valua va lingaile ovina ka via sungulukile, pole, Samuele wa likolisilako oku linga ovina via sunguluka. Nye o sima catiamẽla kokuove? O pondola hẽ oku kuama ongangu ya Samuele, loku linga ovina via sunguluka? Nda wa ci linga, o sanjuisa Yehova, kuenda olonjali viove.

TANGA VEMBIMBILIYA LIOVE

  • 1 Samuele 2:22-26; 3:1-21