Skip to content

Skip to table of contents

Olombangi Via Yehova

Select language Umbundu

 OCIPAMA 3

Rahava wa Tavele ku Yehova

Rahava wa Tavele ku Yehova

Tu sokololi okuti tu kasi volupale luo Yeriko. Olupale luaco lu kasi vofeka yo Kanana, muna okuti, omanu vaco ka va tava ku Yehova. Ukãi umue o tukuiwa hati Rahava wa kala volupale luaco.

Eci Rahava a kala umalẽhe, wa yevele ulandu wa Mose wa tepa o Kalunga ka Kusuka loku upa va Isareli vofeka Yegito. Eye wa yevavo ndomo Yehova a va kuatisa poku yaka lovanyali vavo. Noke wa yeva okuti, va Isareli va kala ocipepi lo Yeriko!

Rahava wa teyuila olondavululi momo wa tavele ku Yehova

Eteke limue koñolosi, alume vamue vavali va Isareli, va endele ko Yeriko oco va kũlĩhĩse olupale. Ovo va endele toke konjo ya Rahava. Eci va pitĩla, wa vatambula kuenje, wa va yekisa. Kuteke waco, soma yo Yeriko wa yeva okuti, volupale mua iñila olondavululi vimue via enda konjo ya Rahava. Omo liaco, soma wa tuma akuenje vaye velombe, oco va ka kuate olondavululi viaco. Pole, Rahava wa salamisa olondavululi kolusoka luonjo yaye kuenje, wa sapuila kakuenje va soma hati: ‘Olondavululi vieyile kulo, pole, via tunda ale volupale. Nda wa vi landuli, u vi sanga!’ Ove hẽ, wa kũlĩha esunga lieci Rahava a teyuilila olondavululi?— Momo wa kolelele Yehova, kuenda wa kũlĩhĩle okuti, eye wa laikele oku eca ofeka yo Kanana ku va Isareli.

Osimbu olondavululi ka via tundile konjo ya Rahava, via likuminya kokuaye hati, eye kumue lepata liaye va ka popeliwa poku nyõliwa kuolupale luo Yeriko. Ove hẽ, wa kũlĩha eci olondavululi vio sapuila okuti oco a sukilile oku linga?— Ovio, vio sapuila hati: ‘Tambula ukolo owu u kusuka, kuenda u kutila ponjanela yove. Nda wa cilinga, omanu vosi va kasi vonjo yove va ka popeliwa.’ Rahava wa pokola kolondaka olondavululi vio sapuila. Ove hẽ, wa kũlĩha eci ca pita noke?—

Yehova wa popela Rahava kumue lepata liaye

Noke yoloneke vimue, va Isareli va ñuala olupale ocingonja, pole, ka kua yevalele onjuela layimue. Vokuenda kuoloneke epandu, va ñuala olupale onjanja yimosi veteke. Pole, keteke liepanduvali, va ñuala olupale olonjanja epanduvali. Noke vosi yavo va kaluka lolukandi. ­Kuenje, Yehova wa tuñunya ovimano via ñualele olupale, toke eci via kupuka. Pole, onjo ya kala lukolo u kusuka ponjanela, ka ya kupukile! O lete hẽ, ulandu waco velitalatu?— Rahava kumue lepata liaye va popeliwa!

 Ulandu wa Rahava u ku longisa nye?— Rahava wa tavele ku Yehova, omo liovina vikomohĩsa a lilongisa viatiamẽla kokuaye. O pondolavo oku lilongisa ovina vialua vikomohĩsa viatiamẽla ku Yehova. Ove hẽ, o tava kokuaye ndeci Rahava a linga?— Tua kũlĩha okuti, o tava!

TANGA VEMBIMBILIYA LIOVE