Skip to content

Skip to table of contents

Olombangi Via Yehova

Select language Umbundu

 OCIPAMA 11

Ovo va Soneha Eci Catiamẽla ku Yesu

Ovo va Soneha Eci Catiamẽla ku Yesu

O lete hẽ, alume ava velitalatu?— Olonduko viavo Mateo, Marko, Luka, Yoano, Petulu, Tiago, Yuda kuenda Paulu. Vosi yavo va kala komuenyo osimbu Yesu a kala palo posi, kuenda va soneha eci catiamẽla ku Yesu. Tu konomuisi ulandu watiamẽla kokuavo.

Nye wa kũlĩha catiamẽla kalume ava?

Katatu kavo va kala ovapostolo okuti va kundila kumosi la Yesu. Ove hẽ, wa kũlĩha olonduko vialume vaco vatatu?— Mateo, Yoano kuenda Petulu. Upostolo Mateo la Yoano, va kũlĩhĩle ciwa Yesu, kuenda va soneha elivulu li lombolola omuenyo waye.  Upostolo Yoano wa soneha elivulu li tukuiwa hati, Esituluilo, kuenda ovikanda vitatu vi tukuiwa hati, ukanda Watete wa Yoano, ukanda Wavali wa Yoano, kuenda ukanda Watatu wa Yoano. Upostolo Petulu wa soneha ovikanda vivali vi sangiwa Vembimbiliya. Ovio vi tukuiwa okuti, ukanda Watete wa Petulu kuenda ukanda Wavali wa Petulu. Vukanda wavali Petulu a soneha, wa tukula olondaka Yehova a popia oku upisa kilu viatiamẽla ku Yesu viokuti: ‘U eye omõlange. Ndu u sole, kuenda ndo sanjukila.’

Alume vakuavo va molẽha velitalatu, alivulu va soneha, a tu longisavo ovina viatiamẽla ku Yesu. Umue pokati kavo o tukuiwa hati, Marko. Citava okuti eci Yesu a kuatiwa, wa kalapo, kuenda wa mõla ovina viosi via pita laye. Ulume ukuavo o tukuiwa hati, Luka. Eye wa kala ondotolo, kuenda citava okuti wa linga Ukristão noke liolofa via Yesu.

A sonehi vakuavo vavali Vembimbiliya o lete velitalatu, vamanji a Yesu. Ove hẽ, wa kũlĩha olonduko viavo?— Olonduko viavo Tiago la Yuda. Kefetikilo, ka va tavele ku Yesu. Momo, va simĩle okuti, Yesu wa linga eyui. Pole, noke va tava ku Yesu kuenje, va linga Akristão.

Usonehi wa sulako Wembimbiliya o lete velitalatu, onduko yaye Paulu. Osimbu ka lingile Ukristão, wa tukuiwile hati, Saulu. Eye wa suvukile Akristão vocili, kuenda wa va talisa ohali. Ove hẽ, wa kũlĩha eci ca vetiya Paulu oku linga Ukristão?— Eteke limue, eci Paulu a kala oku linga ungende, wa yeva ondaka yimue ya tunda kilu. Ondaka yaco ya Yesu! Eye wa pula Paulu hati: ‘Momo lie o lambalalela vana va tava kokuange?’ Noke, Paulu wa linga apongoloko kuenje, wa linga Ukristão. Paulu wa soneha eci ci soka 14 kalivulu Embimbiliya, oku upisa kelivulu lia Va Roma, toke lia Va Heveru.

Tua siata oku tanga Embimbiliya oloneke viosi, ale sio?—Poku tanga Embimbiliya, tu lilongisa ovina vialua viatiamẽla ku Yesu. O yongola hẽ, oku lilongisa ovina viatiamẽla ku Yesu?—

Tanga Vembimbiliya liove

2 Petulu 1:16-18

Marko 3:21; 14:51

Yuda 1

Ovilinga 9:1-18