Skip to content

Skip to table of contents

Olombangi Via Yehova

Select language Umbundu

 OCIPAMA 12

Ocimumba ca Paulu ca Lekisa Utõi

Ocimumba ca Paulu ca Lekisa Utõi

Tu lilongisi eci catiamẽla kumalẽhe umue wa popela omuenyo wa isiaye umalẽhe. Isia yaco umalẽhe, upostolo Paulu. Ka tua kũlĩhile onduko yumalẽhe waco, pole tua kũlĩha okuti, wa linga ocina cimue lutõi. O yongola hẽ, oku yeva eci a linga?—

Paulu wa kala vokayike ko Yerusalãi. Eye wa kapiwa vokayike omo lioku kunda eci catiamẽla ku Yesu. Alume vamue olondingaĩvi va suvukile Paulu, kuenje va linga ongombo yimue ivĩ. Ovo va popia vati: ‘Tu pingi ku kesongo kolohoka viasualali oco a tume asualali vaye oku kuata Paulu loku u tuala kelombe. Etu tu salama kohulo yonjila okuti, eci Paulu a pita, tu u ponda!’

Ocimumba ca Paulu ca yeva ongombo yaco. Nye a sukilile oku linga? Eye wa endele vokayike, kuenje, wa vangula la Paulu catiamẽla kongombo yaco. Vepuluvi liaco, Paulu wo tuma oco a ende ku kesongo kasualali vaco, oco a vangule laye catiamẽla kongombo yaco ya lingiwa. Ove hẽ, o sima okuti ca lelukile kucimumba ca Paulu oku sapela la kesongo kasualali?— Sio, ka ca lelukile. Momo, kesongo kaco, wa kala ulume umue wa velapo. Pole, ocimumba ca Paulu ca lekisa utõi kuenda ca vangula la kesongo kasualali.

Kesongo kasualali wa kũlĩhĩle eci a sukilile oku linga. Eye wa sokiya eci ci soka 500 kasualali oco va teyuile Paulu! Kuenje, wa va sapuila oco va ka tuale Paulu ko Kaisarea kuteke waco. Paulu wa pitĩla hẽ lomuenyo?— Wa pitĩla, momo, alume vaco olondingaĩvi, ka va tẽlele oku u ponda! Ongombo yavo ka ya tẽlisiwile.

Nye tu lilongisa kulandu waco?— O pondolavo oku lekisa utõi ndeci ocimumba ca Paulu ca linga. Omo liaco, tu sukila oku lekisa utõi poku vangula la vakuetu catiamẽla ku Yehova. Ove hẽ, o lekisavo utõi oco amameko oku vangula catiamẽla ku Yehova?— Nda wa cilinga, o popela omuenyo womunu umue.

Tanga Vembimbiliya liove

Ovilinga 23:12-24

Mateo 24:14; 28:18-20

1 Timoteo 4:16