Skip to content

Skip to table of contents

Olombangi Via Yehova

Select language Umbundu

 OCIPAMA 1

Elumbu Limue tu Sanjukila Oku Kũlĩha

Elumbu Limue tu Sanjukila Oku Kũlĩha

Anga hẽ, omunu umue wa ku sapuilile ale elumbu limue?— * Embimbiliya li lombolola elumbu limue li tukuiwa hati: ‘Elumbu li Kola.’ Elumbu liaco li kola, momo lia tunda ku Suku. Olio, li tukuiwa hati li kola, momo omanu ka va li kũlĩhĩle. Ovangelo va yongola oku kũlĩha ciwa elumbu liaco. Ove hẽ, o yongola oku lilongisa catiamẽla kelumbu liaco?—

Nye o sima okuti, oco ovangelo va yonguile oku kũlĩha?

Kefetikilo, Suku wa lulikile ulume lukãi watete okuti, Adama la Heva. Suku wa va kapa vocitumãlo cimue ca posoka ci tukuiwa hati, ocumbo Cedene. Nda Adama la Heva va pokuile ku Suku, ovo kumue lomãla vavo, nda va pongolola ongongo yosi oco yi linge ofeka yelau. Kuenje, nda va kala Vofeka Yelau otembo ka yi pui. Ove hẽ, ivaluka eci Adama la Heva va linga?—

Omo okuti Adama la Heva ka va pokuile ku Suku, eli olio esunga lieci ka tu kasilili vofeka yelau koloneke vilo. Pole, Suku wa popele hati, o ka posuisa oluali luosi, kuenje, omanu vosi va ka kuata esanju otembo ka yi pui. Suku o ka ci linga ndati? Vokuenda kuotembo yalua, omanu ka va kũlĩhile ulandu waco momo, wa kala elumbu.

Eci Yesu a kala palo posi, wa vangula lomanu catiamẽla kelumbu liaco. Eye wa popia hati, elumbu liaco, liatiamẽla Kusoma wa Suku. Omo liaco, Yesu wa longisa omanu oku likutilila ku Suku, oco Usoma waco wiye. Usoma waco u ka pongolola ongongo oco yi posoke.

Ove hẽ, o yongola oku lilongisa catiamẽla kelumbu liaco?— Ivaluka okuti, vana va pokola ku Yehova, ovo lika va ka kala Vofeka Yelau palo posi. Embimbiliya li tu sapuila ovolandu alua atiamẽla kalume lakãi va pokola ku Yehova. Ove hẽ, o yongola oku lilongisa ulandu wavo?— Tu konomuisi ovituwa viomanu vamue pokati kavo, kuenda ndomo tu kuama ongangu yavo.

TANGA VEMBIMBILIYA LIOVE

^ tini. 3 Poku konomuisa ovolandu aco, o ka sanga ondimbukiso eyi (—) okuti, kovaso yaco kuli apulilo amue. Eci o sanga ondimbukiso yaco, talama, kuenda ecelela omõlove oku tambulula.