Skip to content

Skip to table of contents

Olombangi Via Yehova

Select language Umbundu

 OCIPAMA 13

Vipi Olondaka Viwa Viatiamẽla Ketavo?

Vipi Olondaka Viwa Viatiamẽla Ketavo?

1. Anga hẽ atavo osi awa?

Omanu va sunguluka va sangiwa vatavo osi. Olondaka viwa vievi okuti, Suku o lete omanu vaco kuenda o va kuetele ocikembe. Pole, ci sumuisa calua omo okuti kua siata oku lingiwa ovina vialua vĩvi vonduko yetavo. (2 Va Korindo 4:3, 4; 11:13-15) Asapulo okaliye a lekisa okuti atavo amue a siata oku likongela vungangala, vumondi, vovoyaki, kuenda vovituwa vioku lipekela lomãla. Vana va kolela ku Suku va siata oku sumua calua omo liovina viaco vĩvi!Tanga Mateo 24:3-5, 11, 12.

Osimbu etavo liocili li sivaya Suku, etavo liesanda lia siata oku u sumuisa. Momo li longisa ovina ka vi sangiwa Vembimbiliya, oku kongelamo alongiso esanda atiamẽla ku Suku kuenda kuava va fa. Pole, Yehova o yongola okuti omanu va kũlĩha ocili catiamẽla kokuaye.Tanga Esekiele 18:4; 1 Timoteo 2:3-5.

2. Vipi olondaka viwa viatiamẽla ketavo?

Suku ka sanjukila atavo ana a popia hati, vo sole pole, va solevo oluali lua Satana. (Tiago 4:4) Ondaka ya Suku yi tukula atavo osi esanda hati, o ‘Bavulono Yinene.’ O Bavulono ya kala olupale lumue luo kosimbu muna mua fetikila atavo esanda noke Yetande lio koloneke via Noha. Ndopo Suku o ka nyõla atavo osi a siata oku kemba omanu loku va talisa ohali.Tanga Esituluilo 17:1, 2, 5, 16, 17; 18:8.

Kuli olondaka vikuavo viwa. Yehova ka ivalako omanu vakuavitima via sunguluka vana va sangiwa vatavo esanda oluali lulo. Eye o kasi oku ongolola omanu vaco poku va longisa ocili condaka yaye.Tanga Mika 4:2, 5.

 3. Vakuavitima via sunguluka va sukila oku linga nye?

Efendelo liocili li kasi oku tokeka omanu

Yehova wa kapako omanu vana va sole ocili haivo va linga ovina viwa. Eye o va vetiya oku siapo etavo liesanda. Omanu va sole Suku va likolisilako oku linga apongoloko komuenyo wavo oco vo sanjuise.Tanga Esituluilo 18:4.

Kocita catete, eci omanu vakuavitima via sunguluka va yeva olondaka viwa viovapostolo, va vi tava lonjongole yalua. Yehova wa va longisa onjila yokaliye yi tuala komuenyo, lesanju, kuenda wa va ĩha elavoko lia velapo. Ovo va tu sila ongangu yiwa, momo va tava kolondaka viwa poku pitisa kovaso efendelo liaye.Tanga 1 Va Tesalonike 1:8, 9; 2:13.

Yehova o yolela vana va yongola oku iñila vepata liaye liafendeli okuti va siapo etavo liesanda. Nda wa tava kelaleko lia Yehova, o ka kuata ukamba laye, lafendeli vaye vakuacisola, kuenda o ka kuata elavoko liomuenyo ko pui.Tanga Marko 10:29, 30; 2 Va Korindo 6:17, 18.

4. Suku o ka nena ndati esanju voluali?

Olondaka viwa vievi okuti, kuiya esombiso lietavo liesanda. Eci ci ka nena ekavuluko komanu vosi. Ka ku ka kala vali etavo liesanda li ka kemba omanu ale oku tepa ocisola va likuetele pokati. Omanu vosi va ka kala velitokeko liefendelo lia Suku umosi lika yocili.Tanga Esituluilo 18:20, 21; 21:3, 4.