Skip to content

Skip to table of contents

Olombangi Via Yehova

Select language Umbundu

 OCIPAMA 8

Momo Lie Suku a Kasilili Oku Ecelela Evĩho Lohali?

Momo Lie Suku a Kasilili Oku Ecelela Evĩho Lohali?

1. Evĩho lia fetika ndati?

Suku wa siata oku ecelela omanu oku liviala vokuenda kuotembo yalua, oco ku lekisiwe uvangi wokuti ka va tẽla oku potolola ovitangi viomanu

Evĩho voluali lia fetika eci Satana a vangula uhembi watete. Satana kefetikilo wa kala ungelo umue wa lipua pole, noke wa siapo ‘oku sumbila ocili.’ (Yoano 8:44) Eye wa yonguile oku tambula efendelo li sesamẽla lika oku eciwa ku Suku. Satana wa kemba Heva, ukãi watete, kuenda wo vetiya oku pokola kokuaye okuti ku Suku hakoko. Adama wa likongela ku Heva koku sinila Suku. Onjila Adama a nõlapo ya nena ohali kuenda olofa.Tanga Efetikilo 3:1-6, 19.

Eci Satana a vetiya Heva oku tomba ocihandeleko ca Suku, wa fetika esino lioku likala omoko ya Suku yoku viala. Tunde opo, omanu valua va siata oku likongela ku Satana poku likala Suku Ndombiali yavo. Omo liaco, Satana wa linga “ombiali yoluali lulo.”Tanga Yoano 14:30; 1 Yoano 5:19.

2. Anga hẽ oviluvo via Suku ka via lipuile?

Ovilinga viosi via Suku via lipua. Omanu kuenda ovangelo, Suku wa va lulika lepondolo lioku pokola Kokuaye lonjila yimue ya li pua. (Esinumuĩlo 32:4, 5) Suku wa tu lulika lelianjo lioku nõla oku linga eci ciwa ale ceci cĩvi. Elianjo liaco li tu ĩha epuluvi lioku lekisa ocisola cetu ku Suku.Tanga Tiago 1:13-15; 1 Yoano 5:3.

3. Momo lie Suku a kasilili oku ecelela ohali toke cilo?

Vokuenda kuanyamo alua, Yehova wa siata oku ecelela okuti omanu va sinila uviali waye. Momo lie? Oco a lekise okuti, uviali wosi ka u pokola kokuaye ka u pondola oku kuatisa omanu. (Ukundi 7:29; 8:9) Noke yoku pita ci soka 6.000 kanyamo, kua limbukiwa uvangi waco. Olombiali violuali ka via siatele oku malako uyaki, ungangala, ekambo liesunga, kuenda ovovei.Tanga Yeremiya 10:23; Va Roma 9:17.

Pole, ca litepa lolombiali violuali lulo ceci okuti, uviali wa Suku u kuatisa vana va pokola kokuawo. (Isaya 48:17, 18) Ndopo Yehova o ka nyõla ovoviali osi oluali. Vana va nõlapo oku vialiwa la Suku, ovo lika va ka kala olonungi violuali.Isaya 11:9.Tanga Daniele 2:44.

4. Epandi lia Suku li tu ĩha epuluvi lioku linga nye?

Satana wa popia okuti, omanu va vumba lika Yehova omo liocipululu. Ove hẽ, o yongola oku kembulula uhembi waco? O pondola oku ci linga! Epandi lia Suku li tu ecelela oku lekisa nda tu yongola oku vialiwa La ye ale luviali womunu. Ovituwa vietu ovio vi eca uvangi waco.Tanga Yovi 1:8-12; Olosapo 27:11.

5. Ndamupi tu nõla Suku oco a kale Ombiali yetu?

Onjila tu nõla oyo yi lekisa nda tu yongola okuti Suku o linga Ombiali yetu, ale sio

Tu pondola oku nõla Suku oco a kale Ombiali yetu poku lilongisa efendelo liaye liocili kuenda oku tiamẽla kefendelo liaco ndomo lia lekisiwa Vondaka Yaye Embimbiliya. (Yoano 4:23) Tu pondolavo oku likala uviali wa Satana poku yuvula oku litenga vopulitika kuenda vovoyaki oluali ndeci Yesu a linga.Tanga Yoano 17:14.

Satana wa siata oku talavaya lunene waye oco a vetiye omanu oku linga ovina vĩvi. Eci tu yuvula oku linga ovina viaco vamue pokati kakamba vetu kuenda vakuepata, va tu yola epembe ale va tu suvuka. (1 Petulu 4:3, 4) Omo liaco, tu sukila oku nõla onjila tu kuama. Anga hẽ tu ka kuata ukamba lomanu va sole Suku? Tu ka pokola hẽ kovihandeleko viaye viocisola? Nda tua ci linga, tu lekisa okuti, Satana ohembi eci a popia okuti lomue omunu o pondola oku pokola ku Suku, nda wa lambalaliwa.Tanga 1 Va Korindo 6:9, 10; 15:33.

Ocisola Suku a kuetele omanu ceca elavoko liokuti evĩho kuenda ohali ka vi ka kalako vali. Vana va lekisa okuti va nõlapo uviali wa Suku, va ka kuata omuenyo ko pui palo posi.—Tanga Yoano 3:16.