Skip to content

Skip to table of contents

Olombangi Via Yehova

Select language Umbundu

 OCIPAMA 6

Ndomo tu Nõla Olomapalo Via Sunguluka

Ndomo tu Nõla Olomapalo Via Sunguluka

“Cosi wu linga ci lingili ulamba wa Suku.”​—1 VA KORINDO 10: 31.

1, 2. Ocitangi cipi tu pondola oku liyaka laco poku nõla olomapalo?

SOKOLOLA okuti o yongola oku lia epako, pole onẽle yimue yepako liaco, ya vola. Citava okuti ove o lia epako liaco lonepa ya vola, pamue o tetako onepa yaco, ale inasi epako liaco liosi. Oco hẽ, onjila yipi nda wa nõla?

2 Olomapalo vimue, vi sokisiwa lepako lia vola onẽle. Pamue o yongola oku linga omapalo yimue pole, o limbuka okuti omapalo yaco ka ya sungulukile kuenda ya vĩha. Nye o sukila oku linga? Vamue va siata oku linga eci cĩvi momo va sole olomapalo viosi vi sangiwa voluali. Vakuavo va yuvula oku linga olomapalo ka via sungulukile kuenda va kala ocipãla lovina via vĩha. Citava okuti vamue va yuvula olomapalo ka via sungulukile pole, olonjanja vimue va linga eci cĩvi. Nye ove o sukila oku linga oco amameko oku kala vocisola ca Suku?

3. Nye tu ka konomuisa vocipama cilo?

3 Valua pokati ketu nda tua nõla onjila yatatu yocindekaise eci. Ocili okuti, olomapalo vi nena esanju, pole tu sukila oku linga lika olomapalo vina via sunguluka. Omo liaco, tu sukila oku kũlĩhĩsa nda olomapalo vimue via sunguluka ale sio. Catete, tu  konomuisi ndomo olomapalo tu nõla via kongeliwa vefendelo tu eca ku Yehova.

“COSI WU LINGA CI LINGILI ULAMBA WA SUKU”

4. Olomapalo tu nõla vi kapa ndati elitumbiko lietu kohele?

4 Manji umue wa papatisiwa kunyamo wo 1946, wa popia hati: “Nda li kapela ocimãho cokuti olonjanja viosi ku lingiwa ohundo yepapatiso ndi yi yevelela lutate ndu okuti ame ndi ka papatisiwa.” Momo lie? Eye wa lombolola hati: “Oku ivaluka elitumbiko liange ci ndi kuatisa oku amamako lekolelo.” Citava okuti ove o tavavo kocisimĩlo caye. Oku ivaluka ohuminyo tua lingila Yehova ci tu kuatisa oku amamako oku u vumba lepandi. (Tanga Ukundi 5:4.) Oku sokolola elitumbiko lietu, ci tu kuatisa oku kapako ovina viosi tu linga vomuenyo wetu ndeci upange woku kunda kuenda olomapalo. Upostolo Paulu wa lekisa esilivilo liolondaka evi poku sonehela Akristão hati: “Ndaño wu lia, ndaño wu nyua, cosi wu linga ci li lingili ulamba wa Suku.”​—1 Va Korindo 10:31.

5. Elivulu Liovisila 22:18-22, li tu kuatisa ndati oku limbuka elungulo li sangiwa kukanda wa va Roma 12:1?

 5 Ovina viosi o linga, vi kuete elitokeko lefendelo liove ku Yehova. Vukanda Paulu a sonehela va Roma, wa tukula olondaka vimue vi kuete esilivilo lialua. Eye wa popia hati: ‘Eci atimba ene ndocilumba ci kasi lomuenyo, haico ci kola, kuenje ci sanjuisa Suku. Oco efendelo liene li linge liocili.’ (Va Roma 12:1) Ondaka atimba vene, yi lomboloka ovisimĩlo, utima, kuenda olohõlo vietu. Ovina viaco, ovio vi tu kuatisa oku vumba Suku. (Marko 12:30) Paulu wa sokisa upange tu linga lutima wosi ndocilumba. Ondaka ‘ocilumba’ yi kuete esilivilo lialua. Ocihandeleko ca eciwile ku Mose, ci lekisa okuti Suku ka tavele ovilumba viovinyama ka via puile etondelo. (Ovisila 22:18-20) Cimuamue haico, nda Akristão va linga ovina ka via sungulukile Suku ka tambula ovilumba viavo. Ovilumba vie?

6, 7. Ukristão o vĩhisa ndati etimba liaye, kuenda ovitangi vipi vi iyililako?

6 Paulu wa lungula Akristão vo ko Roma hati: “Ovimatamata viene ko ka vi eci kekandu.” Paulu wa va sapuila hati: “Ekandu ka li ka viale vatimba ene a fa fa ndokuti vu pokuisua lalio koloñeyi viao.” (Va Roma 6: 12-14; 8: 13) Tete, eye wa tukula, “ovilinga vietimba.” Catiamẽla komanu vakuakandu wa soneha hati: “Imela viavo vie yuka esiñalo.” “Olomãi viavo vi yayuila koku pesela osonde.” “Ka va kuete usumba la Suku.” (Va Roma 3:13-18) Ukristão o pondola oku li vĩhisa, poku linga ekandu “lovimatamata” vietimba liaye. Nda Ukristão o tala ovina ka via sungulukile, ndeci oviluvialuvia viomanu va kasi  epolõla ale ungangala, eye o kasi oku ‘eca ovaso aye kekandu,’ kuenda o vĩhisa etimba liaye liosi. Kuenje efendelo liaye ka li taviwa vali la Suku. (Esinumuĩlo 15:21; 1 Petulu 1:14-16; 2 Petulu 3:11) Oku li tumbika kolomapalo ka via sungulukile ci nena ovitangi vialua!

7 Nda Akristão va nõla olomapalo ka via sungulukile va kuata ovitangi. Omo liaco, tu sukila oku nõla olomapalo vina vi tu kuatisa oku linga ocipango ca Yehova. Tu konomuisi ndomo tu pondola oku limbuka olomapalo via sunguluka levi ka via sungulukile.

“NYEHULI ECI CĨVI”

8, 9. (a) Olomapalo via tepisiwa volonepa viñami? (b) Olomapalo vipi tu sukila oku yuvula, kuenda momo lie?

8 Olomapalo via tepiwa volonepa vivali. Onepa yimue yatiamẽla kolomapalo Akristão va sukila oku yuvula; yikuavo yatiamẽla kolomapalo vina okuti Ukristão eye o nõla nda o linga omapalo yaco ale sio. Tu konomuisi tete onepa yatiamẽla kolomapalo vina Ukristão a sukila oku yuvula.

9 Ndomo tua ci lilongisa Kocipama 1, kuli olomapalo vimue okuti vi pisiwa Vembimbiliya. Sokolola handi olofilme vi lekisa omanu va kasi epolõla, kuenda ovisikilo vina okuti vi tukula ovina viatiamẽla kumbanda ale ukahonga. Akristão vocili va sukila oku yuvula olomapalo viaco, momo ka vi li kuata lolonumbi Viembimbiliya. (Ovilinga 15:28, 29; 1 Va Korindo 6:9, 10; Esituluilo 21:8) Eci o yuvula olomapalo ka via sungulukile, o kasi oku lekisa ku  Yehova okuti o kasi oku ‘nyehula eci cĩvi’ loku ‘tunda kevĩho.’ Poku ci linga, o ka lekisa okuti ekolelo liove “halioku luvikiyako.”​—Va Roma 12:9; Osamo 34:14; 1 Timoteo 1:5.

10. Ocisimĩlo cipi catiamẽla kolomapalo ci koka ohele, kuenda momo lie?

10 Omanu valua va sima okuti oku tala oviluvialuvia ka via sungulukile, hacĩviko. Ovo va siata oku popia hati, ‘Ndi kasi ño oku tala ofilme vo Televisãu, si ka linga ovina viaco.’ Oku kuata ocisimĩlo caco ci koka ovitangi. (Tanga Yeremiya 17:9.) Nda tu tala olomapalo vina Yehova a pisa, anga tu kasi muẽle oku ‘nyehula eci cĩvi’? Oku tala ovina viaco ci nyõla olondunge vietu. (Osamo 119:70; 1 Timoteo 4:1, 2) Elinga liaco li pondola oku nyõla ovisimĩlo vietu kuenda li vetiya vakuetu oku linga ekandu.

11. Olondaka vi sangiwa kelivulu lia va Galatia 6:7, vi tiamisiwila ndati kolomapalo?

11 Akristão vamue koloneke vilo, va linga ekandu omo lioku tala olomapalo ka via sungulukile. Olondaka viokuti “eci omunu a kũla haico a lombola,” via siata oku tẽlisiwila vokuavo. (Va Galatia 6:7) Pole, citava oku yuvula esumuo liaco. Nda wa kũla ovisimĩlo via sunguluka, o kongula esanju komuenyo wove.​—Tala vokakasia “ Olomapalo Vipi Ndi Sukila Oku Nõla?” kemẽla 67.

TIAMISILA OVISIMĨLO VIOVE KOLONUMBI VIEMBIMBILIYA

12. Elivulu lia va Galatia 6:5 li lombolola ndati ovina viatiamẽla kolomapalo, kuenda onumbi yipi omunu lomunu a sukila oku kuama poku nõla olomapalo?

12 Cilo, tu ka konomuisa onepa yavali, yatiamẽla  kolomapalo vina okuti ka tu sangi onumbi yimue ya tumbikiwa Vondaka ya Suku. Poku sandiliya olomapalo viaco, Ukristão eye o sukila oku nõla omapalo yo sungulukila. (Tanga Va Galatia 6:5.) Etu tu kuete eci ci tu songuila. Vembimbiliya mu sangiwa olonumbi vi tu kuatisa oku limbuka ovisimĩlo via Yehova. Poku kuama olonumbi viaco, tu ka limbuka “ocipango” ca Yehova catiamẽla kovina viosi oku kongelamo olomapalo.​—Va Efeso 5:17.

13. Nye ci tu vetiya oku yuvula olomapalo vi sumuisa Yehova?

 13 Akristão va kuete ovisimĩlo kuenda ovituwa via litepa. (Va Filipoi 1:9) Pole, Akristão va kũlĩha okuti ocitumãlo locitumãlo ci kuete olomapalo via litepa. Ovo ka va lavoka okuti omanu vosi va kuata ocisimĩlo cimuamue. Omo liaco, tu eceleli okuti ovisimĩlo vietu vi vetiyiwa lolonumbi Viembimbiliya oco tu yuvuli olomapalo vi sumuisa Yehova.​—Osamo 119:11, 129; 1 Petulu 2:16.

14. (a) Ocina cipi tu sukila oku konomuisa poku nõla olomapalo? (b) Tu pondola oku pitisa ndati kovaso Usoma vomuenyo wetu?

14 Ocina cikuavo tu sukila oku konomuisa poku nõla olomapalo, otembo yetu. Ndaño olomapalo tu linga via sunguluka, tu sukila oku kũlĩhĩsa otembo tu pesila kolomapalo viaco. Ovina viespiritu ovio vi kuete esilivilo lia velapo Kakristão. (Tanga Mateo 6:33.) Nye wa siata oku linga oco o lekise okuti wa pitisa kovaso Usoma wa Suku? Upostolo Paulu wa popia hati: “Endaendi lutate nda vakualondunge. Kolisiko oku yukisa oloneke viene.” (Va Efeso 5:15, 16) Tu sukila oku sokiya ciwa otembo tu pesila kolomapalo, okuti ci tu kuatisa oku limbuka “ovina via velapo” oco tu kale ciwa konepa yespiritu.​—Va Filipoi 1:10.

15. Momo lie tu sukilila oku kuata utate woku nõla olomapalo?

15 Tu sukilavo oku kuata utate woku nõla olomapalo. Eci ci lomboloka nye? Tu kũlĩhĩsi vali ocindekaise cepako. Oco o yuvule oku lia onepa ya vola, o sukila oku kũlĩhĩsa apa pa fetikila oku vola kuaco. Omo liaco, tu sukilavo oku kuata utate woku nõla olomapalo. Ukristão ukualondunge ka yuvula  lika olomapalo vi pisiwa Vembimbiliya, o yuvulavo olomapalo vina vi kapa kohele ekalo liaye kespiritu. (Olosapo 4:25-27) Oku kapako olonumbi Viembimbiliya ci tu kuatisa oku yuvula olomapalo ka via sungulukile.

“COSI CA PUA EVĨHO”

Oku kapako olonumbi via Suku poku nõla olomapalo ci tu teyuila kovina vi kapa kohele ekalo lietu kespiritu

16. (a) Tu lekisa ndati okuti tu kasi oku kuama ovisimĩlo via Yehova viatiamẽla kovituwa? (b) O pondola oku kapako ndati olonumbi Viembimbiliya?

16 Akristão vocili, poku nõla olomapalo tete va kũlĩhĩsa ndomo Yehova a vi tenda. Embimbiliya li lekisa ovisimĩlo via Yehova kuenda olonumbi viaye. Soma Salomone, wa tukula ovina vialua Yehova a suvuka ndeci, “elimi liuhembi, ovaka a pesela osonde yu we lipua, utima u sokolola ovipango vĩvi, olomãi vi yolokela kevĩho.” (Olosapo 6:16-19) Ndamupi o tenda ovisimĩlo via Yehova? Ukualosamo wa popia hati: “Yehova o sole ava va suvuka evĩho.” (Osamo 97:10) Poku nõla olomapalo, o sukila oku lekisa okuti wa suvuka ovina Yehova a suvuka. (Va Galatia 5:19- 21) Ivaluka okuti, eci o lingila vuyombeki ale powiñi, ci lekisa eci wa tuwa. (Osamo 11:4; 16:8)  Nda wa likolisilako oku kuama ovisimĩlo via Yehova, o ka nõla olomapalo vi li kuata lolonumbi Viembimbiliya. Kuenda o ka amamako oku ci linga vomuenyo wove.​—2 Va Korindo 3:18.

17. Eci handi kua nõlele omapalo yimue, apulilo api o sukila oku linga?

17 Nye vali o sukila oku linga oco o lekise okuti o kasi oku kuama ovisimĩlo via Yehova poku nõla olomapalo? Sokolola apulilo ava: ‘Ndi tenda ndati ocisimĩlo caco lekalo liange kovaso a Suku?’ Osimbu handi ku kasi oku tala ofilme yimue li pula ndoco, ‘Ofilme yaco yi ka vetiya utima wange oku linga nye?’ Tu konomuisi olonumbi via kongeliwa vondaka eyi.

18, 19. (a) Onumbi yi sangiwa kelivulu lia va Filipoi 4:8, yi tu kuatisa ndati oku limbuka olomapalo via sunguluka levi ka via sungulukile? (b) Olonumbi vipi vikuavo vi tu kuatisa oku nõla olomapalo viwa? (Tala pombuelo yemẽla.)

18 Onumbi yaco yi sangiwa kelivulu lia va Filipoi 4:8 kuna tu tanga hati: “Cosi cocili, cosi ca sumbiwa, cosi cesunga, cosi ca pua evĩho, cosi ca posoka, cosi ci sivayaiwa, nda kuli esunga, kuenda nda kuli eci ci sesamela oku sivayiwa, sokololi ovina evi.” Ndaño okuti Paulu ka tukuile olomapalo, pole o tu kuatisa oku sokolola eci ci sanjuisa Suku. (Osamo 19:14) Olondaka via Paulu vi tiamisiwilavo kolomapalo. Ndamupi?

19 Li pula ndoco: ‘Anga hẽ olofilme nda siata oku tala kuenda ovisikilo nda siata oku yevelela via pua “eviho?” Noke yoku tala ofilme yaco ocisimĩlo cipi ndi ka kuata? Nda olofilme viaco viu ku vetiya oku  kuata ovisimĩlo via vĩha, ci lomboloka okuti olomapalo viaco ka via sungulukile. (Mateo 12:33; Marko 7:20-23) Momo lie o sukilila oku imbapo olomapalo viaco? Momo ovisimĩlo ka via sungulukile, vi nyõla ombembua yovutima kuenda ukamba la Suku. (Va Efeso 5:5; 1 Timoteo 1:5, 19) Omo liaco, o sukila oku vi yuvula momo vi nyõla ekalo liove. * (Va Roma 12:2) Kuama ongangu yukualosamo wa likutilila ku Yehova hati: “Tiula ovaso ange, ka a ka talukile evi viesanda.”​—Osamo 119:37.

VELISAPO OVISIMĨLO VIA VAKUENE

20, 21. Elivulu lia 1 Va Korindo 10:23, 24, li lombolola nye catiamẽla koku nõla olomapalo?

20 Paulu wa tukula onumbi ya velapo Yembimbiliya tu sukila oku kapako poku nõla olomapalo. Eye wa popia hati: “Citava oku linga ovina viosi, haviosiko puãi vi kolisa. Lomue ka ka sande eci caye, te eci cukuavo.” (1 Va Korindo 10:23, 24) O kapako ndati onumbi eyi poku nõla olomapalo? Ove o sukila oku li pula ndoco, ‘Anga hẽ vakuetu va tenda ndati olomapalo viange?’

21 Citava okuti utima wove u sanjukila olomapalo vina o tenda okuti vi kuatisa ale via sunguluka. Pole, nda wa limbuka okuti vamanji vamue va kuete utima wa leñela, liwekapo oku linga omapalo yaco. Momo lie? Ndeci Paulu a popia, ove ku yongola oku “lingila vamanji akandu” kuenda ku yongolavo oku  “lingila Kristu akandu,” momo poku ci linga o ka kapela ocilondokua vamanji. Omo liaco, o sukila oku kapako elungulo eli: “Ko ka lingi cimue ci tẽla oku konyuisa.” (1 Va Korindo 8:12; 10:32) Akristão vocili koloneke vilo, va kapako elungulo lia Paulu poku yuvula olomapalo vina vi va “kuatisa” havio vi va “kolisa.”​—Va Roma 14:1; 15:1.

22. Momo lie Akristão va sukilila oku kapako ovisimĩlo via vakuavo?

22 Kuli vali ocina cikuavo catiamẽla koku velisapo ovisimĩlo via vakuetu. Ukristão ukuotima wa leñela, o sukila oku yuvula oku kisika vamanji vekongelo oku kuata ovisimĩlo ndevi viaye viatiamẽla kolomapalo. Omunu waco o sokisiwa lomunu o kasi oku endisa ekãlu vetapalo, kuenje o kisika vakuavo oku endisa ndomo eye a yongola. Elinga liaco ka lia sungulukile. Ukristão o kuete ocisola, ka yongola oku sumuisa vamanji vana va kuete ovisimĩlo via litepa viatiamẽla kolomapalo. Pole, “esunguluko” liaye, li limbukiwa lomanu vosi.​—Va Filipoi 4:5; Ukundi 7:16.

23. O tẽla oku limbuka ndati okuti wa nõla omapalo ya sunguluka?

23 O tẽla oku limbuka ndati okuti wa nõla omapalo ya sunguluka? Yuvula olomapalo viosi ka via sungulukile haivio vi pisiwa Londaka ya Suku. Kapako olonumbi vi ku kuatisa oku yuvula olomapalo ka via tukuiwile Vembimbiliya. Yuvula olomapalo vi vĩhisa utima wove kuenda ku ka linge eci ci sumuisa vamanji va kuete utima wa leñela. Nda wa ci linga o ka eca ulamba ku Suku kuenda esanju vepata liove.

^ tini. 19 Olonumbi vikuavo viatiamẽla kolomapalo vi sangiwa kelivulu Liolosapo 3:31; 13:20; Va Efeso 5:3,4; kuenda Va Kolosai 3:5, 8, 20.