Skip to content

Skip to table of contents

Olombangi Via Yehova

Select language Umbundu

Esapulo 113: Paulu Okasi ko Roma

Esapulo 113: Paulu Okasi ko Roma

TALA ndomo Paulu a kasi kalienge loku laviwa lasualali voko Roma. Eye omandekua. Kuenda okasi loku kevelela eci soma Kaisare a ko linga. Eci a kala vokayike, omanu va enda oku u nyula.

Noke yoloneke vitatu eci Paulu a pitĩla ko Roma, wa tuma oku vilikiya asongui vamue va Yudea. Kuenje va Yudea valua veyavo oku u nyula. Paulu wa va kundila eci catiamẽla ku Yesu kuenda usoma wa Suku. Vamue va tava kuenda va linga Akristão, pole vakuavo ka va tavele.

Paulu vokayike

Handi vali, Paulu wa kundilavo asualali va kala loku u lava. Vokuenda kuanyamo avali a kala kumandekua, wa kundila omanu valua. Ndaño muẽle vakuanjo ya Kaisare, va yevavo olondaka viwa Viusoma kuenda vamue pokati kavo va linga Akristão.

Ukombe okasi ndeti loku soneha komesa wo kũlĩha? Onduko yaye Timoteo. Timoteo wa kalavo vokayike omo lioku kunda olondaka viwa Viusoma, pole noke wa yovuiwa. Eye weya oku kuatisa Paulu. Wa kũlĩha eci Timoteo a kasi loku soneha? Tu ci konomuisi.

Ivaluka alupale oko Filipoi la Efeso Kesapulo 110? Paulu wa kuatisa oku sovola akongelo Vakristão valupale aco. Osimbu Paulu a kala vokayike, eye wa sonehela ovikanda Kuvamanji vaco. Ovikanda viaco vi kasi Vembimbiliya. Vitukuiwa hati, Va Efeso kuenda Va Korindo. Paulu o kasi loku sapuila eci Timoteo a sonehela Akristão voko Filipoi.

Akristão ko Filipoi va tatele Paulu locisola. Ovo vo tumisile olombanjaile osimbu a kala vokayike. Paulu o kasi loku eca olopandu kokuavo. Epafrodito eye wa ka tualele ombanjaile yaco. Pole, eye wa vela calua kuenda wa puluka oku fa. Cilo wa kaya kuenda oka tiukila konjo yaye. Eye okambata ukanda wa Paulu la Timoteo kuenda oka vi tuala ko Filipoi.

Osimbu Paulu a kala vokayike, wa soneha vali ovikanda vivali vi sangiwa Vembimbiliya. Umue wa u sonehela Akristão vo lupale luo Kolosai. Wa kũlĩha ndomo u tukuiwa? U tukuiwa hati, Va Kolosai. Ukanda ukuavo wa u sonehela umue kamba liaye wa kalavo vo lupale luo Kolosai. Onduko yaye Filemone. Vukanda waco wa popia eci catiamẽla kukuenje wa Filemone, o tukuiwa hati Onesimo.

Onesimo wa tilile ku Filemone kuenje wa endele ko Roma. Onesimo wa kũlĩhĩle okuti Paulu wa kala vokayike. Paulu wo kundila eci eye a endele oku nyula vokayike. Noke Onesimo wa lingavo Ukristão. Eye wa sumuile calua omo a tilile. Wa kũlĩha eci Paulu a vangula vukanda a sonehela Filemone?

Paulu wa pinga ku Filemone oco a ecele Onesimo. Eye wa soneha hati: ‘Ñasi loku u tiuwiya kokuove. Pole eye ka kala vali upika wove. Eye wa lingavo manji umue Ukristão uwa.’ Eci Onesimo a tiukila ko Kolosai wambata ovikanda vivali. Ukanda umue wa tumiwile ku vamanji va Kolosai, ukuavo wa tumiwile ku Filemone. Filemone wa sanjukile calua eci a yeva okuti Onesimo upika waye wa linga Ukristão!

Eci Paulu a sonehela va Filipoi kuenda Filemone, eye wa va sapuila olondaka viwa. Eye wa popia Kakristão va Filipoi hati: ‘Ñasi oku u tumisi Timoteo. Pole ndopo njiya oku u nyuli.’ Ku Filemone wa soneha hati: ‘Njangiliyile ohondo ndikala.’

Eci Paulu a tunda vokayike, wa nyula valua vamanji Akristão akãi lalume kovitumãlo vialua. Noke wa kapiwa vali vokayike ko Roma. Eye wa kũlĩhĩle okuti oka pondiwa. Omo liaco, wa sonehela Timoteo kuenda wo vilikiya lonjanga. Paulu wa soneha hati: ‘Suku ukuesunga, kuenda oka ndi sumũlũisa.’ Eci papita anyamo amue noke yolofa via Paulu, o Yerusalãi ya nyõliwa vali la va Roma.

Embimbiliya li tu sapuila ovina vialua. Yehova wa kuatisa upostolo Yoano oku soneha alivulu a sulako Embimbiliya oku kongelamo elivulu Liesituluilo. Elivulu eli li sapula eci catiamẽla kovina vikeya. Tu konomuisi eci ci keya kovaso.

Ovilinga 28:16-31; Va Filipoi 1:13; 2:19-30; 4:18-23; Va Heveru 13:23; Filemone 1-25; Va Kolosai 4:7-9; 2 Timoteo 4:7-9.



Apulilo

  • Helie Paulu a kundila osimbu a kala kumandekua ko Roma?
  • Helie ukombe vociluvialuvia o kasi ndeti komesa? Kuenda nye a kasi oku lingila Paulu?
  • Helie wa kala Epafrodito? Kuenda nye eye ambata eci a tiukila ko Filipoi?
  • Momo lie Paulu a tumisilile ukanda ku kamba liaye Filemone?
  • Nye Paulu a linga eci a tunda vokayike? Kuenda noke nye ca pita laye?
  • Helie Yehova a tuma oku soneha elivulu lia sulako Liembimbiliya? Kuenda elivulu Liesituluilo li tu sapuila nye?

Apulilo akuavo

  • Tanga Ovilinga 28:16-31 kuenda Va Filipoi 1:13.

    Nye Paulu a linga osimbu a kala kumandekua ko Roma? Kuenda ongangu yipi yekolelo eye a sila Akristão vekongelo? (Ovil. 28:23, 30; Va Fil. 1:14)

  • Tanga Va Filipoi 2:19-30.

    Olondaka vipi violopandu Paulu a sapuila Timoteo la Epafrodito? Kuenda tu kuete oku kuama ndati ongangu ya Paulu? (Va Fil. 2:20, 22, 25, 29, 30; 1 Va Kor. 16:18; 1 Va Tes. 5:12, 13)

  • Tanga Filemone 1-25.

    Paulu wa tumile Filemone oku linga nye okuti ca sungulukile? Kuenda eci ci kala ndati ndonumbi kakulu vekongelo koloneke vilo? (File. 9; 2 Va Kor. 8:8; Va Gal. 5:13)

    Olondaka via Paulu vi sangiwa kelivulu lia Filemone 13, 14 vi lekisa ndati okuti eye wa sumbile ovisimĩlo via vakuavo vekongelo? (1 Va Kor. 8:7, 13; 10:31-33)

  • Tanga 2 Timoteo 4:7-9.

    Ekolelo lie tu kuete ndeli lia Paulu liokuti Yehova oka tu sumũlũisa nda tu tua pandikisa toke kesulilo? (Mat. 24:13; Va Hev. 6:10)