Skip to content

Skip to table of contents

Olombangi Via Yehova

Select language Umbundu

Esapulo 107: Stefano wa Pondiwa

Esapulo 107: Stefano wa Pondiwa

ULUME u wa kekama ndeti Stefano. Eye ondonge ya Yesu. Tala eci cikasi loku pita! Alume ava va kasi oku imbaimba ovawe kokuaye. Momo lie va suvukilile calua Stefano okuti vo linga ocina eci cĩvi? Tu ci konomuisi.

Stefano o kasi oku sosuiwa lovawe

Suku wa kuatisile Stefano oku linga ovikomo. Alume ava ka va ci solele, kuenda va lihoyisa laye omo a longisa ocili komanu. Suku wa ecele ku Stefano unene woku linga ovikomo. Eye wa sapula kalume ava okuti ovo va kala oku longisa esanda komanu. Eci ca va temisa calua. Omo liaco, va kuata Stefano kuenda va vilikiya omanu oco va vangule uhembi watiamẽla kokuaye.

Ovitunda via pula Stefano hati: ‘Ovina evi hẽ ocili?’ Stefano wa tambulula loku linga ohundo yatiamẽla Kembimbiliya. Wa lombolola ndomo alume vãvi va suvukile ovaprofeto va Yehova kosimbu. Noke eye wa popia hati: ‘Ene wa lisoki lalume vaco. Ene wa pondi omõla wa Suku, Yesu, kuenda ka vu kasi loku pokola kovihandeleko via Suku.’

Eci ca temisa calua asongui! Vo funguila kuenda vo takilĩla ovayo. Kuenje Stefano wa imba ovaso kilu, loku popia hati: ‘Tali! Ndete Yesu kilu o tãi kondio ya Suku.’ Alume va sitika ovatui avo, kuenje volumũhĩla Stefano. Vo kuata kuenda vo tundisa vimbo.

Va lula ovikutu viavo yu va vieca peka liumalẽhe otukuiwa Saulu. Saulu u lete palo? Noke alume vamue va fetika oku imba ovawe ku Stefano. Stefano wa kekama, ndomo ocilete. Eye okasi loku likutilila ku Suku hati: ‘A Yehova, kuka va tendele ekandu liavo.’ Eye wa kũlĩhĩle okuti, valua va kembiwile lasongui vaco. Noke liovina evi, Stefano wa fa.

Nda umue waku linga eci cĩvi, u fetuluinya, ale o pinga ku Suku oco o lingevo eci cĩvi? Eci hacoko Stefano la Yesu va linga. Ovo va kala vakuacisola ndaño muẽle lomanu vana vava suvukile. Tu kuami ongangu yavo.

Ovilinga 6:8-15; 7:1-60.



Apulilo

  • Helie wa kala Stefano? Kuenda Suku wo kuatisa oku linga nye?
  • Nye Stefano a popia lasongui vetavo okuti ca va temisa?
  • Eci alume va tundisa Stefano vimbo nye vo linga?
  • Vociluvialuvia eci helie umalẽhe u o kasi oku lava ndeti ovowalo?
  • Eci handi Stefano ka file nye eye a likutilila ku Yehova?
  • Loku kuama ongangu ya Stefano, nye tu sesamẽla oku linga eci omunu umue a tu linga cimue cĩvi?

Apulilo akuavo

  • Tanga Ovilinga 6:8-15.

    Ovohembi api asongui vatavo va siata oku popia oco va tateke upange woku kunda Wolombangi via Yehova? (Ovil. 6:9, 11, 13)

  • Tanga Ovilinga 7:1-60.

    Nye ca kuatisa Stefano oku loñoloha koku teyuila olondaka viwa Vekanga? Kuenda nye tu lilongisilako? (Ovil. 7:51-53; Va Rom. 15:4; 2 Tim. 3:14-17; 1 Pet. 3:15)

    Ocituwa cipi tu sukila oku kuata lovanyali va tateka upange wetu woku kunda? (Ovil. 7:58-60; Mat. 5:44; Luka 23:33, 34)